މަސްވެރިންގެ އެއްވެސް ހިޔާލަކީ ބޭކާރު ހިޔާލެއް ނޫންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ މަސްވެރިންގެ ދުވަސް ފާހަކުރުމުގެ ގޮތުން ދުވާފަރަށް ކުރެއްވި ދަތުރުފުޅުގެ ތެރެއިން މަސްވެރިންގެ ފޯރަމްގައި ބައިވެރިންނާއި ބައްދަލުކޮށް ވާހަކަފުޅުދައްކަވަމުންނެވެ.
ރައީސް ޑރ.މުއިއްޒު ވިދާޅުވީ މަސްވެރިންގެ ހިޔާލަކީ ބޭކާރު ހިޔާލެއްނޫންކަމަށާއި މަސްވެރިކަމުގެ ސިނާއަތު ކުރިއަރުވާނީ މަސްވެރިންގެ ހިޔާލު ހޯދައިގެންކަމަށެވެ. އެގޮތުން މަސްވެރިކަން ކުރިއެރުވުމުގައި މި ސިނާއަތުގައި މަސައްކަތް ކުރައްވާ ފަރާތްތަކުގެ ހިޔާލާއި މަޝްވަރާ ވަރަސް މުހިންމު ކަމަށް ރައީސް ވިދާޅުވިއެވެ.
ރައީސް ވިދާޅުވީ ބޭނުންވަނީ ހަގީގީ މާނާގައި މަސްވެރިކަމުގެ ސިނާއަތް ކުރިއަރުވަން ކަމަށާއި، އެމަނިކްފާނު ވެރިކަމާ ހަވާލުވުމަށްފަހު ފުރަތަމަ ދުވަހުން ފެށިގެން މި ސިނާއަތުގައި ހުރި ކަންބޮޑުވުންތައް ހައްލުކުރަން ފަށާފައިވާކަމަށެވެ. ބޭރުގެ ބައެއް ފަރާތްތަކުގެ ލޯނުގެ އެހީގައި ކުރިއަށްގެންދާ ބައެއް ކަންކަން ލަސްވިނަމަވެސް ގިނަ ކަންކަން ފެށުމުގެ މަރުހަލާއަށް ގޮސްފައިވާކަން ރައީސް ވަނީ ވިދާޅުވެފައެވެ.
މަސްވެރިކަމުގެ ސިނާއަތް ކުރިއެރުވުމަކީ ސަރުކާރުން ހާއްސަ އިސްކަމެއް ދީގެން ކުރަމުން އަންނަ މަސައްކަތެކެވެ. އެގޮތުން މިހާރުވެސް ރާއްޖޭގެ އެކި ސަރަހައްދުތަކުގައި މަސްވެރިކަން ކުރިއެރުވުމަށް އެތައް މަޝްރޫއުތަކެއް ކުރިއަށް ގެންދަމުންދެއެވެ.
މަސްވެރިކަމުގެ ދުވަހުގެ މުނާސަބަތުގައި ބާއްވާ ރަސްމީ ޖަލްސާ ބޭއްވުމަށް ހަމަޖެހިފައިވަނީ ރ.ދުވާފަރުގައި މިރެއެވެ.
Advertisement
This content is created and paid for by advertisers and does not involve Voice Journalists
