މަސްވެރިންނަށް ތެއޮ ވިއްކާ އަގު ހެޔޮކޮށް، މަސްވެރިންގެ އަތުން މަސްގަންނަ އަގު ބޮޑުކުރުމަށް ސަރުކާރުން ނިންމައިފިކަން އިއުލާނުކޮށްފިއެވެ.

މިކަން އިއުލާނުކޮށްފައިވަނީ ދަރަވަންދޫގައި ކުރިއަށްދާ މަސްވެރިންގެ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މި ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މަސްވެރިންގެ އެންމެބޮޑު އެއް ޝަކުވާއަކީ މަސްވެރިން ބާނާމަހަށް ރަނގަޅު އަގު ލިބެމުން ނުދާކަމުގެ ޝަކުވާކަމަށެވެ. އަދި މިފްކޯއަށް މަސްކިރުވުމަށްފަހު މަސްވެރިންނަށް ފައިސާ ނުލިބޭ ވާހަކައަކީވެސް މަސްވެރިންގެ ފަރާތުން އަންނަ ވަރަށްބޮޑު ޝަކުވާއެއްކަން ރައީސް ފާހަގަކުރެއްވިއެވެ.

ރައީސް ވިދާޅުވީ މަސްވެރިންނަށް ހުރި ގޮންޖެހުންތަކާއި ދަތިތައް ހައްލުކުރުމަށް ސަރުކާރުން ކުރަންފެށި މަސައްކަތުގެ ދަށުން ކިރުވާމަހަށް ފައިސާ ދިނުމުގައި ލަސްވަމުން އައި މައްސަލަ ހައްލުކޮށް މަސްވެރިންނަށް 48 ގަޑިއިރުގެ ތެރޭގައި ފައިސާ ދޫކުރަން ފަށާފައިވާކަމަށެވެ. މީގެއިތުރުން މަސްގަތުމުގައި މަސްވެރިންގެ ހުރި ޝަކުވާތައްބަލައި މަސް ގަންނަ އަގުވެސް ބޮޑުކުރަން ނިންމާފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ މާދަމައިން ފެށިގެން މިފްކޯއިން މަސްގަންނަމުންދާނީ އެންމެ ދަށްވެގެން ކިލޯއެއް 16 ރުފިޔާއަށްކަމަށެވެ. 

މަސްދޯނިފަހަރަށް ވިއްކަމުން އަންނަ ތެލާ ގުޅޭގޮތުން ރައީސް ވިދާޅުވީ މާދަމައިން ފެށިގެން މިފްކޯއިން މަސްވެރިންނަށް ތެއޮވިއްކުމުގައި ޖުމްލަކޮށް ލީޓަރަކުން 51 ލާރި އަގުހެޔޮވެގެން ދާނޭކަމަށެވެ. އަދި 3 ޓަނަށްވުރެ މަތިން މަސްކިރާ ފަރާތްތަކަށް 71 ލާރި އަގުހެޔޮވެގެން ދާނޭކަމަށްވެސް ރައީސް ޑރ.މުއިއްޒު ވިދާޅުވިއެވެ.

ރައީސް ވިދާޅުވީ ތެއޮ ގަންނަ އަގު ހެޔޮކުރުމާ ގުޅިގެން މަސްވެރިން ތެލަށް ކުރަމުން އަންނަ ހަރަދު އެދެވޭފަދަ މިންވަރަކަށް ލުޔެއް ލިބެމުންދާނޭކަމަށެވެ.