ބޮޑުކަންނެލީ މަސްވެރިންގެ އިހުތިޖާޖުގެ ތެރެއިން ފުލުހުންގެ ބެލުމުގެ ދަށަށް ގެނެވުނު ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޒާކިރު (މަޓޭ) ޑޮކްޓަރަށް ދެއްކީ ފުލުހުންގެ ބަންދުގައި ހުންނަވަނިކޮށް ދިމާވި ކަމަކުން ނޫންކަމަށް ފުލުހުން ބުނެފިއެވެ.
ޒާކިރު ފުލުހުންގެ ބެލުމުގެ ދަށަށް ގެންދަނިކޮށް އަނިޔާވެ އަދި ފުލުހުންގެ ބެލުމުގެ ދަށުގައި ހުންނަވަނިކޮށް އަނިޔާ ލިބިގެން ހޮސްޕިޓަލުން ފަރުވާ ހޯދި ވާހަކަތަކެއް ބައެއް މީޑިއާތަކުގައި ވަނީ ދައުރުވެފައެވެ.
ޒާކިރު ފުލުހުންގެ ބެލުމުގެ ދަށަށް ގެންގޮސްފައިވަނީ އިހުތިޖާޖުގެ ތެރެއިން ޑިސެމްބަރުމަހުގެ 11 ވަނަ ދުވަހުއެވެ. މިކަމާ ގުޅިގެން ފުލުހުން މިރޭ ބުނެފައިވަނީ ބަންދުގައި ހުންނަވަނިކޮށް ޛާކިރު ޑޮކްޓަރަށް ދެއްކުމަށް ހޮސްޕިޓަލަށް ގެންގޮސްފައިވަނީ، ޑޮކްޓަރަށް ދެއްކުމަށް އަމިއްލައަށް އެދިވަޑައިގަތުމުން ކަމަށެވެ.
އެގޮތުން ޒާކިރު ހޮސްޕިޓަލަށް ގެންގޮސްފައިވަނީ ކަސްޓޯޑިއަލްގައި އެވަގުތު އިންނެވި ޑޮކްޓަރު ބެއްލެވުމަށްފަހު ޑޮކްޓަރުގެ ލަފަޔާއެކު، ފުލުހުންގެ ކަސްޓޯޑިއަލް ބަންދުގައި ތިބޭ މީހުން ޑޮކްޓަރަށް ދެއްކުމުގައި އަމަލުކުރާ އުސޫލުގެ މަތިން ކަމަށެވެ.
ފުލުހުން ބުނީ ޒާކިރު ބަންދުން ދޫކޮށްލާފައިވާކަމަށާއި، ފުލުހުންގެ ބެލުމުގެ ދަށަށް ގެނެވޭ ފަރާތްތަކާ މެދު އަމަލުކުރުމުގަޔާއި އެފަރާތްތަކުގެ ހައްގުތައް ރައްކާތެރިކުރުމުގައި، ގާނޫނާއި ގަވާއިދުތަކާއި އިންސާނީ ހައްގުތަކުގެ އުސޫލުތަކާ އެއްގޮތަށް ހަރުދަނާ މިންގަނޑުތަކެއްގައި ހިފަހައްޓަމުންދާކަމަށެވެ.
Advertisement
This content is created and paid for by advertisers and does not involve Voice Journalists
