ޓީޗާސް އެސޯސިއޭޝަން ހޭލައިފި؛ ގޯސް ކުރީ އައްޑޫ ހައި ސްކޫލުގެ އިސްވެރިން
މިދިޔަ ބުދަ ދުވަހު އައްޑޫ ހައި ސްކޫލުގައި ޓީޗަރަކާއި ދަރިވަރަކާ ދެމެދު ހިނގައިދިޔަ ހަމަނުޖެހުމަކީ، އެ ސްކޫލުގެ މެނޭޖްމަންޓް ފެއިލްވެފައި އޮތުމުގެ ސަބަބުން ހިނގާފައިވާ ކަމެއް ކަމަށް ޓީޗަރުންގެ އެސޯސިއޭޝަނުން ބުނެފިއެވެ.
އައްޑޫ ހައިސްކޫލް މައްސަލާގައި ކަންބޮޑުވުން ފާޅުކޮށް ޓީޗާސް އެސޯސިއޭޝަނުން އިއްޔެ ނެރުނު ބަޔާނުގައި ބުނީ، އެއް ދަރިވަރެއްގެ ހައްގު އޮންނަ ފަދައިން ކްލާސްރޫމްގައި ތިބި ބާކީ ތިބި ދަރިވަރުންގެ ހައްގުވެސް އޮންނާނެ ކަމަށާއި، ދަރިވަރުންގެ ހައްގުގައި ތެދުވާ ޓީޗަރަކު ފަޟީހަތްކޮށް ބަދުނާމުވުމަކީ ބަލައިގަނެވޭނެ ކަމެއް ނޫން ކަމަށެވެ.
އަދި އެފަދަ މައްސަލަތައް ރަނގަޅަށް ނުބަލައި ޓީޗަރަށް އަދަބު ދިނުމުގެ ސަބަބުންނާއި، ދަރުވަރުންގެ ފަރާތުން ދިމާވާ މިފަދަ ކަންކަމަށް ފިޔަވަޅު ނާޅައި ދޫލޮށްލުމުގެ ނަތީޖާއަކަށް ވަނީ ތައުލީމީ ދާއިރާއަށް ލޯބިކުރާ އެތައް ޓީޗަރުންނެއް ދާއިރާ ދޫކޮށް، ދާއިރާ ދެކެ ފޫހިވުން ކަމަށް އެ އެސޯސިއޭޝަނުން ބުންޏެވެ.
ޓީޗަރުންގެ އެސޯސިއޭޝަނުން އިތުރަށް ބުނީ، މީގެ ކުރިންވެސް އައްޑޫ ހައި ސްކޫލުގައި ޓީޗަރުންނަށް އުނދަގޫކުރުމާއި ހަނގާކުރުމުގެ މައްސަލަތައް ފެންމަތިވެފައިވާ ކަމަށާ އެފަދަ ކަންކަމަކީ އެ ސްކޫލުގައި އާންމު ކަމެއް ކަމަށް، އެ އެސޯސިއޭޝަނުން ބެލިބެލުމުން އެނގިފައިވާ ކަމަށެވެ.
"އަދި މި ކަމަކީ އެ ސްކޫލުގައި އާންމު ކަމަކަށްވެ، ދަރިވަރުންނަށް އެއްވެސް ފިޔަވަޅެއް ނޭޅި ދިއުމުގެ އާޚިރު ނަތީޖާއަކަށް މިވީ، ޓީޗަރަކު ސްޓްރެސްވެ، އެހެން ދަރިވަރުންގެ ހައްގުގައި ކުރި މަސައްކަތަކުން ނުވަތަ ކުރެވުނު ކަމަކުން އެ ޓީޗަރަށް އަދަބު ލިބި ސޯޝަލް މީޑިއާގައި ފަޟީހަތްވުން،" އެސޯސިއޭޝަނުން ބުންޏެވެ.
މިއާއެކު އެ އެސޯސިއޭޝަނުން ބުނީ ދަރިވަރުންގެ ފަރާތުން ދިމާވާ މިފަދަ ކަންކަމަށް މެނޭޖުމަންޓުން ފިޔަވަޅު ނާޅައި އޮތް ކަމުގެ އެއް ހެއްކަކީ ދަރިވަރުން ކްލާސްތަކަށް ފޯނު ގެންދިޔުމުގެ ހުއްދަ އޮތުމާއި، އެ ހުއްދަ އޮތްއިރު އެކަމަށް އެއްވެސް އުސޫލެއް ހެދިފައި ނެތް ކަން ކަމަށެވެ. އޭގެ ނަތީޖާއެއްގެ ގޮތުން ފޯނުގެ ބޭނުން ނަހަމަ ގޮތުގައި ކުރަމުން އަންނަކަންވެސް ފާހަގަކޮށްފައިވެއެވެ.
ރާއްޖެއަށް ވުރެ ތަހުޒީބު ގައުމުތަކުގައި ވެސް ދަރިވަރުން ފޯނު ގެންދާކަން ފާހަގަކޮށް، ރާއްޖޭގައި ވެސް ދަރިވަރުން ސްކޫލުތަކަށް ފޯނު ގެންދަން ހުއްދަދޭނަމަ، އުސޫލެއް ކަނޑައެޅިފައި އޮންނަން ޖެހޭނެކަން ޓީޗަރުންގެ އެސޯސިއޭޝަނުން ފާހަގަކުރިއެވެ.
"އައްޑޫ ހައި ސްކޫލުގައި ހިނގި ހާދިސާއާ ގުޅިގެން މި އެސޯސިއޭޝަނުން ބެލި ބެލުމުން ފާހަގަވި އެންމެ މުހިންމު ކަމަކީ އެ ސްކޫލުގެ ދަރިވަރުން ބެލެހެއްޓުމުގައި ސްކޫލުގެ މެނޭޖްމަންޓް ފެއިލްވެފައިވާކަން. މެނޭޖްމަންޓް ފެއިލްވުމުގެ ސަބަބުން ހިނގާ މި ބާވަތުގެ ކަންކަމުގައި ޓީޗަރުން ކަތިލެވުމަކީ މި އެސޯސިއޭޝަނުން ބަލައިގަންނަ ކަމެއްނޫން،" އެ އެސޯސިއޭޝަނުން އިތުރަށް ބުންޏެވެ.
މިއާއެކު ޓީޗަރުންގެ އެސޯސިއޭޝަނުން ވަނީ، ވަކި ފަރާތަކަށް ބުރަވުމެއް ނެތި، ޓީޗަރަށް ދަރިވަރު އުނދަގޫކުރި މައްސަލަ ބަލައި ފިޔަވަޅު އަޅައިދޭން ގޮވާލައިފައެވެ.
އައްޑޫ ހައި ސްކޫލުގައި ކިޔަވަމުން އަންނަ ދަރިވަރަކާއި ބިދޭސީ ޓީޗަރަކާ ދެމެދު ހިނގި ހަމަނުޖެހުމާ ގުޅޭ ގިނަ ވީޑިއޯ ތަކެއް މީސްމީޑިއާގައި އާއްމުވެފައިވާއިރު، އެ މައްސަލައާ ގުޅިގެން ހަމަ އެދުވަހު ޓީޗަރު ސަސްޕެންޑުކޮށްފައިވެއެވެ. އަދި އަޚުލާގީ ޕްރޮގްރާމެއް ފުރިހަމަކޮށް ޓީޗަރު ގާތުން މައާފަށް އެދެން ދެން އައްޑޫ ސްކޫލުން ވަނީ ދަރިވަރުވެސް ސަސްޕެންޑުކޮށްފައެވެ.
Advertisement
This content is created and paid for by advertisers and does not involve Voice Journalists
