އޮަސްޓްރޭލިއާގެ ބޮންޑައިބީޗްގައި ދިން ބަޑީގެ ހަމަލާ ރާއްޖެއިން ކުށްވެރިކޮށްފި
އޮސްޓްރޭލިއާގެ ބޮންޑައި ބީޗްގައި އިއްޔެ ދިން ބަޑީގެ ހަމަލާ ރާއްޖެއިން ކުށްވެރިކޮށްފިއެވެ.
އިއްޔެ، ބޮންޑައި ބީޗްގައި ބަޑިހިފައިގެން ތިބި ބަޔަކު ވަނީ އެތަނުގައި ތިބި ޔަހޫދީން ތަކަކަށް އަމާޒުކޮށް ބަޑިޖަހައި އެތައްބަޔަކު މަރާލާފައެވެ. މި ހަމަލާތަކުގައި 16 މީހަކު މަރުވެފައިވާަކަމަށް ނިއުސައުތު ވޭލްސްގެ ފުލުހުން ވަނީ ބުނެފައެވެ. އަދި އެތައް ބަޔަކު ވަނީ ޒަހަމްވެފައެވެ.
އެކަން ކުށްވެރިކޮށް ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، މިފަދަ ލާއިންސާނީ ޢަމަލުތަކަކީ އެއްވެސް މުޖުތަމަޢެއްގައި ޖާގަ ދެވިގެންވާނެ ކަންކަމެއް ނޫން ކަމަށެވެ. އެ ހަމަލާގައި މައުސޫމް އެތައް ބަޔެއްގެ ފުރާނަ ގެއްލިފައިވާ ކަމަށާ، ދިވެހިރާއްޖެއިން އެކަމާ ހިތާމަފާޅުކޮށް، އެކަން ވަރަށް ބޮޑަށް ކުށްވެރިކުރާ ކަމަށް ބަޔާނުގައި ވެއެވެ.
މިއާއެކު ބަޔާނުގައި ވަނީ މި ޙަމަލާގައި ގެއްލުން ލިބުނު ފަރާތްތަކުގެ އާއިލާތަކަށް ހިތުގެ ފުންމިނުން ތައުޒިޔާ ކިޔައިފައެވެ. އަދި، މިޙަމަލާގައި އަނިޔާވި ފަރާތްތަކަށް އަވަސް ޝިފާއަކަށް އެދިފައިވެއެވެ.
މި އުނދަގޫ ދަނޑިވަޅުގައި އޮސްޓްރޭލިއާގެ ރައްޔިތުންނާއި ސަރުކާރާއެކު ދިވެހިރާއްޖެ އޮތް ކަމަށްވެސް ބަޔާނުގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
