ނުކުޅެދުންތެރިކަން ހުންނަ މީހުންގެ ތެރަޕިއުޓިކް ފަރުވާތަކަށް މިދިޔަ މަހު 12.3 މިލިއަން ރުފިޔާ ހަރަދު ކޮށްފައިވާ ކަމަށް އެންސްޕާ އިން ބުނެފި އެވެ.

އެންސްޕާއިން އިއްޔެ އާއްމު ކުރި ނޮވެމްބަރުމަހުގެ ތަފާސްހިސާބުތައް ދައްކާ ގޮތުން އެމަހު، ނުކުޅެދުންތެރިކަން ހުންނަ ފަރާަތްތަކަށް ބޭނުންވާ ތެރަޕިޔުޓިކް ފަރުވާއަށް ޚަރަދު ހަމަޖައްސައިދިނުމުގެ ޕްރޮގްރާމްގެ ދަށުން 359 މީހުންނަށް އެހީ ހަމަޖައްސާފައިވެއެވެ. އަދި އެމީހުންނަށް މާލީ އެހީގެ ގޮތުގައި، 12،389،980 ރުފިޔާ ދައުލަތުން ހޭދަކޮށްފައިވެއެވެ. 

ތަފާސްހިސާބުތަކުން އެނގޭ ގޮތުން، ތެރެޕިޔުޓިކް ފަރުވާއަށް އެހީދިން މީހުންގެ ތެރެއިން ގިނައީ ފިރިހެނުންނެވެ. އެގޮތުން، 252 ފިރިހެނުންނަށް އެހީ ދީފައިވާއިރު، އެހީ ދިން އަންހެނުންގެ އަދަދަކީ 107 އެވެ. 

މީގެ އިތުރުން، ތަފާސް ހިސާބުން އެނގޭގޮތުން، ތެރަފިޔުޓިކް ފަރުވާގެ ތެރއިން އެންމެ ބޮޑު ހޭދައެއް ކޮށްފައި ވަނީ ބިހޭވިއާ ތެރަޕީއަށެވެ. އެއީ 3.5 މިލިއަން ރުފިޔާ އެވެ. ދެން އެންމެ ބޮޑު ހޭދައެއް ކޮށްފައިވާ އޮކިއުޕޭޝަނަލް ތެރަޕީ އަށް 3.4 މިލިއަން ރުފިޔާ ބަޖެޓުން ދިނެވެ. ތިން ވަނައަށް އެންމެ ބޮޑު ހަރަދެއް ކުރީ ސްޕީޗު ތެރަޕީއަށެވެ. އެއީ 3.2 މިލިއަން ރުފިޔާ އެވެ. 

އެންމެ ކުޑަ ހަރަދެއް ހިންގީ އާލީ އިންޓަވެންޝަނަށް ކަމަށް ވާއިރު މިދިޔަ މަހު އެ ފަރުވާ ހޯދި ދެ މީހުންނަށް އެންސްޕާ އިން ހަރަދުކުރީ 9،000ރ. އެވެ.

މީގެ އިތުރުން ތަފާސް ހިސާބުތަކުން އެނގޭ ގޮތުން މިދިޔަ މަހުގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓަރީ ކޮށްފައިވާ މީހުންގެ އަދަދަކީ 1،4398 އެވެ. އޭގެ ތެރެއިން 8،669 މީހުންނަކީ ފިރިހެނުންނެވެ.