ދިރިއުޅުމުގައި ދިމާވި ބަލިމަޑު ކަމާ، އިމްތިޙާނު ތަކުގެ ސަބަބުން އެނގި ހާމަވެގެންދިޔައީ އެކަންކަމަށް ކެތްތެރިވުމުން ލިބިދޭ ފައިދާތައް ކަމުގައި ދީނީ ޢިލްމުވެރިޔާ އައްޝެއިޚް މުޙައްމަދު އިބްރާހީމް (ނައިފަރީ) ވިދާޅުވެއްޖެއެވެ. 

ދިވެހި ރައްޔިތުން ދީނީ ގޮތުން ހޭލުންތެރި ކުރުވާ ދިވެހި މުޖްތަމައުގައި ދީނީ އިލްމު ފެތުރުމުގެ މަސައްކަތް ޝެއިޚް ނައިފަރީ ފެއްޓެވީ ކިޔަވައި ނިންމަވައި ލެއްވުމުގެވެސް މާ ކުރީންނެވެ. ދީނީ ފޮތްތައް ދިވެހި ބަހަށް ތަރުޖަމާ ކުރައްވައި، ކިޔަވާ ވިދާޅުވާން އުޅުއްވިއިރު އެކުގައި އުޅުނު އެހެން ބޭފުޅުންނަށްވެސް ކަންކަން އޮޅުންފިލުވައި ދެއްވުމުގެ އިތުރުން ބަންދު ތެރޭގައި ރަށުގައި ހުންނަވާ ދުވަސްތަކުގައިވެސް ރަށުގެ ރައްޔިތުންނަށް ދަރުސް ދެއްވުމުގެ މަސައްކަތް ކުރެއްވިއެވެ.

އެފަހުން، ކިޔަވާވިދާޅުވެ ނިންމަވައި ޝެއިޚެއްގެ ގޮތުގައި ދަރުސްތައް ދެއްވަވަން ފެއްޓެވިފަހުން، ދެއްވި ދަރުސްތަކުން ފާހަގަކޮށްލެވޭ، ދަރުސްތަކުގެ ތެރޭގައި މުޞީބާތްތަކުގައި ކެތްތެރިވުމުގެ ފައިދާއާއި އެކަމުގެ މުހިންމު ކަމަށް އަލިއަޅުވާލައި ދެއްވި ދަރުސްތައް ހިމެނެއެވެ. އެ ދަރުސްތަކުގައި، މާތްاللهގެ އަޅާއަށް މުސީބާތްތައް ކުރިމަތި ކުރައްވާ ސަބަބުތަކާއި، އެކަންކަމަށް ކެތްތެރިވާނެ ގޮތާއި، ކެތްތެރިވުމުން ލިބިދޭ ފައިދާތަކުގެ މައްޗަށް އަލިއަޅުވާލައްވާފައިވެއެވެ.

އެއިން އެތައް ބަޔަކަށް ފައިދާކުރިއެވެ. މިހާރުވެސް އަންނަނީ ކުރަމުންނެވެ. އެކަން އެނގެނީ، ބައެއް މީހުން ޝެއިޚަށް ގުޅާފައިވެސް އެވާހަކަ ދައްކާތީއެވެ. 

ޝެއިޚްގެ ދަރުސްތަކުން ފައިދާ ކުރީ ހަމައެކަނި އެ އަޑުއެހި މީހުންނަށް އެކަންޏެއް ނޫނެވެ. އެހެނެއްކަމަކު، އެއިން އެންމެ ބޮޑު ފައިދާއެއް ކުރި އެކަނީ ޚުދު ޝެއިޚެވެ. އެކަން ޝެއިޚް ހާމަކުރެއްވީ، އަލް އަސްރުން އާދިއްތަ ދުވަހުގެރޭ ގެނެސްދިން ޕޮޑްކާސްޓުގައެވެ. 

”އަޅުގަނޑަށް މިހުރީ ވަރަށް ގިނަ މުސީބާތްތަކާ ކުރިމަތިވެފައި. މިހާރުވެސް ބޮޑު އިމްތިހާނެއްގައި ހޭދަކުރަމުން މިދަނީ. އަޅުގަނޑު ދީންވެސް ކިޔަވާފައި މިހުރީ ކިޔެވުނު ވަރަކަށް. އަޅުގަނޑަށް ހާދަ ފައިދާއެއް ވެއްޖެއޭ މި އިމްތިހާނުގައި. ދީނީ ގޮތުން. ދުނިޔެވީ ގޮތުން އެއްޗެކޭ ބުނާކަށް ނެތިން އެކަމަކު ދީނީ ގޮތުން އަޅުގަނޑަށް ކުރިން ނުވާ އެތައް ފައިދާއެއްވެއްޖެ މި އިމްތިހާނުގެ ސަބަބުން. އަޅުގަނޑު މިއީ މުސީބާތާ ބެހޭ ގޮތުން ދަރުސްވެސް ދިން މީހާ. ދަރުސްދީފައި އަޅުގަނޑާ މިކުރިމަތިވީ.“ ޝެއިޚް ވިދާޅުވިއެވެ. 

ޝެއިޚް އިތުރަށް ވިދާޅުވީ، މީހުންނަށް ދަރުސްދޭއިރު، އެ ދަރުހަކީ ހަމައެކަނި އަޑުއަހަންތިބޭ މީހުންނަށް ދޭ އެއްޗެއް ނޫން ކަމަށެވެ. އެހެނެއް ކަމަކު، ދަރުސްދޭ މީހާވެސް އެ ދެވޭ ދަރުހާއި އެއްގޮތަށް ޢަމަލުކުރަންޖެހޭ ކަމަށެވެ. އެގޮތުން މުސީބާތްތަކުގައި ކެތްތެރި ވުމާއި ބެހޭގޮތުން ޝެއިޚް ދަރުސްތައް ދެއްވާފައިވާއިރު، ޝެއިޚްއަށް މުސީބާތްތައް ކުރިމަތިވުމުން، އެ ބަސްތަކާއި ޝެއިޚްގެ ޢަމަލާވެސް ދިމާވުމަކީ މުހިންމުކަމެއްކަން ފާހަގަކުރެއްވިއެވެ. 

މުސީބާތްތަކަށް ކެތްތެރިވުމަށް ދެއްވި ދަރުސްތަކުގެ އިތުރުން، ތައުހީދާއި، އިމާންކަމުގެ ރުކުންތަކުގެ މައްޗަށް ތަފްސީލީ ގޮތެއްގައި އަލިއަޅުވާލައްވައި ދެއްވާފައިވާ ދަރުސްތަކަކީ އެތައްބަޔަކަށް އެއިން ފައިދާކުރަމުން އަންނަ ދަރުސްތައްކަން ފާހަގަކޮށްލަން ޖެހެއެވެ. 

ޝެއިޚްގެ ދަރުސްތަކާއި ފޮތްތަައް އަންނަނިވި ލިންކުން ބަލާލެވޭނެއެވެ. 

https://drive.google.com/drive/folders/1zZI_uZJU3moqz5iNb6b8o_T0mMQFwOpV