މޮނިޔުމަންޓްގެ ގޮތުގައި ދިރޭތަކެތީގެ ސޫރަ ހެދުމަކީ ހަރާމް ކަމެއް: ފަތުވާދޭ މަޖިލިސް
ދިރޭތަކެތީގެ ސޫރަ ސިފަވާގޮތަށް މޮނިއުމަންޓްފަދަ ތަކެތި ހެދުމާއި ބެހެއްޓުމަކީ ޙަރާމް ކަމެއް ކަމަށް ބުނެ ފަތުވާ ނެރެފިއެވެ.
އެގޮތުން ފަތުވާ މަޖިލިސްގެ ފަތުވާ 34 ގައި އެފަދަ މޮނިޔުމަންޓް ބެހެއްޓުމުގެ ހުކުމާ ގުޅޭގޮތުން ބުނެފައިވަނީ، އިސްލާމްދީނުގައި ދިރޭ ތަކެތީގެ ސިފައިގައި ބުދު ނުވަތަ މޮނިއުމެންޓް ނުވަތަ އެނޫންވެސް އެފަދަ އެއްޗެއް ހެދުމާއި ބެހެއްޓުމަކީ ޙަރާމް ކަމެއް ކަމަށެވެ.
މިގޮތުން މައްކާ ފަތަޙަކުރެއްވި ދުވަހު ނަބިއްޔާ މުޙައްމަދު ﷺ ލާތަ އާއި ޢުއްޒާ، އަދި މަނާތު ފަދަ ބުދުތައް ނައްތާލެއްވުމަށް ޞަޙާބީން ފޮނުއްވި ކަމަށާ އަދި ޞަޙާބީންވެސް އެފަދަ ތަކެތި ނައްތަވައިލެއްވުމަށް ސަމާލުކަން ދެއްވައިފައިވާ ކަން ފާހަގަކޮށްފައިވެއެވެ.
އެގޮތުން ސުންނަތުން ސާބިތުވާ ބައެއް ހާދިސާތަކަށްވެސް ފަތުވާގައި އަލިއަޅުވާލާފައިވެއެވެ.
"އަބުލްހައްޔާޖް އަލްއަސަދީ" ވިދާޅުވިއެވެ. "އަލީ ބުން އަބީ ޠާލިބު ތިމަންނައަށް ވިދާޅުވިއެވެ. "الله ގެ ރަސޫލާ ﷺ ތިމަންކަލޭގެފާނު ފޮނުއްވެވި ކަމަކަށް ތިބާ ނުފޮނުވަން ހެއްޔެވެ؟ أَلَا أَبْعَثُكَ عَلَى مَا بَعَثَنِي عَلَيْهِ رَسُولُ اللهِ ﷺ أَنْ لَا تَدَعَ تِمْثَالًا إِلَّا طَمَسْتَهُ وَلَا قَبْرًا مُشْرِفًا إِلَّا سَوَّيْتَهُ" މާނައީ "އެއީ އެއްވެސް ބުދެއް އޭގެ ސިފަ ހަލާކުނުކޮށް ދޫކޮށްނުލުމަށާއި، އަދި އުސްކޮށް ހަދާފައިވާ އެއްވެސް ގަބުރެއް ބިމާ ހަމަނުކޮށް ދޫނުކޮށްލުމަށެވެ."
އަދިވެސް ރަސޫލާ ﷺ ޙަދީޘްކުރައްވާފައިވެއެވެ. قَالَ رَسُولُ اللَّهِ ﷺ إِنَّ أَشَدَّ النَّاسِ عَذَابًا يَوْمَ الْقِيَامَةِ الْمُصَوِّرُونَ "މާނައީ: ﷲގެ ރަސޫލާ ﷺ ޙަދީޘްކުރެއްވިއެވެ: "ހަމަކަށަވަރުން ޤިޔާމަތް ދުވަހު އެންމެ ގަދަފަދަ ޢަޛާބު ލިބޭހުށީ ފުރާނަ އެކުލެވޭ ތަކެތީގެ ސޫރަ ހަދާ މީހުންނަށެވެ."
މީގެ އިތުރުން ފަތުވާގައި ބުނިގޮތުގައި، ޞައްޙަ ޙަދީޘްފުޅުތަކުގައި ބަޔާންވެގެންވާ ގޮތުގައި، ޤިޔާމަތް ދުވަހާ ކައިރިވުމުން ބައެއް މީހުން އަލުން ބުދަށް އަޅުކަންކުރަން ފަށާނެއެވެ. މި ސަބަބަށްޓަކައި الله އަށް ޝަރީކުކުރުމަށް މަގުފަހިވެދާނެ އެއްވެސް ޢަމަލެއް ކުރުމަކީ އިސްލާމްދީނުގައި ހުއްދަވެގެންވާ ކަމަކަށް ނުވާކަމަށްވެސް ބުނެފައިވެއެވެ.
އެހެންކަމުން، ޢިލްމުވެރިންގެ އިޖުމާޢުން ބުދު ހެދުމާއި ބެހެއްޓުން ޙަރާމްވެގެންވާކަން ކަނޑައެޅިގެން އެނގޭ ކަމަށާ، މިކަން މަނާކުރެވިފައިވާ ސަބަބުތަކުގެ ތެރޭގައި މަލާއިކަތުން، ބުދު ނުވަތަ ސޫރަ ބަހައްޓައިފައި ހުންނަ ތަންތަނަށް ނުވެންނެވުމާއި، އެފަދަ ތަކެތީގެ ސަބަބުން ޝިރުކަށް މަގުފަހިވުންވެސް ހިމެނޭކަން ފަތުވާގައި ފާހަގަކޮށްފައިވެއެވެ.
”އެހެންކަމުން، މޮނިއުމެންޓުގެ ގޮތުގައި ދިރޭތަކެތީގެ ސޫރަ ހެދުމަކީ އިސްލާމްދީނުގައި ހުއްދަނޫން ޙަރާމްކަމެކެވެ. މުސްލިމުންގެ ހައިސިއްޔަތުން އަޅުގަނޑުމެން މިފަދަ ކަންކަމުން އެއްކިބާވެ، މާތް الله ރުހިވޮޑިގަތުން ހޯދުމަށް އެދި މަސައްކަތްކުރަންޖެހެއެވެ.“
ފަތުވާ މަޖިލިސް
ފަތުވާ މަޖިލީހުން މިފަދަ ފަތުވާއެއް ނެރެފައިވާއިރު، ރާއްޖޭގައި މީހުން ދިރިއުޅޭ ބައެއް ރަށްރަށުގައި މޮނިޔުމަންޓްގެ ގޮތުގައި ދިރޭ ތަކެތީގެ ސޫރަ ހަދައި ބަހައްޓާފައިވާކަން ފާހަގަކޮށްލަންޖެހެއެވެ.
އެގޮތުން، ވެލާ، މާކަނާ، މިޔަރު، މަޑި ފަދަ ތަކެތީގެ މޮނިޔުމަންޓް ހަދާފައި ހުރި އިރު، ހުރާ ގައި ހުރި މާކަނާ މޮނިޔުމަންޓަށް ބަޔަކު ގެއްލުންދީފައިވާކަންވެސް ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
