”ފޮަޓޯއެއް ނަގާލަން“ ސައުދީ އެމްބަސީ ފުރާޅަށް އެރި ޒުވާނަކު ހައްޔަރުކޮށްފި
ރާއްޖޭގައި ހުންނަ ސައުދީ ޢަރަބިއްޔާގެ އެމްބަސީގެ ފުރާޅަށް އެރި ޒުވާނަކު ހައްޔަރު ކޮށްފިއެވެ.
މި މައްސަލާގައި ހައްޔަރުކޮށްފައިވަނީ މާލެ އަށް ނިސްބަތްވާ 19 އަހަރުގެ ފިރިހެނެކެވެ. އޭނާއަށް ކުރެވެނީ ހުއްދަނޫން ތަނަކަށް ވަނުމުގެ ތުހުމަތެވެ.
އެ ޒުވާނާގެ ބަންދު އަމުރުގައިވާގޮތުން، އޭނާ އެ ކުށްކުރިކަމަށް ތުހުމަތުކުރެވޭ މިންވަރަށް ހެކިހުށަހަޅާފައިވެއެވެ. އަދި އޭނާ ހައްޔަރު ކޮށްފައިވަނީ އިޖުރާއަތާ އެއްގޮތަށް ކަމަށްވެސް ބުނެފައިވާއިރު މައްސަލަ ބެއްލެވި ގާޒީ ވަނީ، އޭނާގެ ބަންދަށް ފަސްދުވަސް ޖަހާފައެވެ.
ޒުވާނާ ހައްޔަރުކޮށް ކޯޓަށް ގެންދިޔުމުން، ފުރާޅަށް އެރި އިރު، އެ އެރުނީ ސަޢުދީ ޢަރަބިއަން އެމްބަސީގެ ފުރާޅަށްކަން އޭނާއަށް ނޭނގޭކަމަށް ބުނިކަމަށް ބަންދު އަމުރުގައިވެއެވެ.
އަދި، އެތަނުގައި އެފަދަ ނިޝާނެއް އިންކަމެއް ފާހަގަ ނުކުރެވޭކަމަށާއި އޭނާ އެތަނުގެ ފުރާޅަށް އެރީ އެ ތަނުގައި މީހުން ފޮޓޯ ނަގާފައި ހުންނަ ތަން ފެންނާތީ، ފޮޓޯ ނަގަން ކަމަށް ބުނި ކަމަށްވެސް އަމުރުގައިވެއެވެ.
” ނަމަވެސް، އެތަނަށް އެރުމަށްފަހު، 10 ވަރަކަށް މިނެޓް ތެރޭގައި، އެތަނުން ފައިބާފައިވާނެކަމަށާއި އެތަނަށް އެރުމުން މީހުން ބަލާތީ، ކުރެވުނީ ރަނގަޅު ކަމެއް ނޫންކަމަށް އިޙްސާސް ކުރެވިގެން ފޭބީ ކަމަށް“ އޭނާ ބުނިކަމަށް ބަންދު އަމުރުގައި ފާހަގަކޮށްފައިވެއެވެ.
އޭނާއަކީ މީގެ ކުރިން ދުވަހަކުވެސް މިފަދަ ތަނަކަށް ގެނެވި މިފަދަ ކަމެއް ކޮށްފައިވާ މީހެއް ނޫންކަން ފާހަގަކޮށް، އެކަމަށް އޭނާ މާފަށްވެސް އެދިފައިވާ ކަމަށް އަމުރުގައި ބުނެފައިވެއެވެ.
ބަންދު އަމުރުގައި ވާގޮތުން އޭނާއަކީ މީގެ ކުރިން ހައްޔަރު ބަންދު ލޮގް އޮތް މީހެއް ނޫނެވެ.
Advertisement
This content is created and paid for by advertisers and does not involve Voice Journalists
