ގާނޫނެއް އެކުލަވައިގެން ނަމަވެސް ރާއްޖެއަށް ހޯމް ސްކޫލިން ތަޢާރަފް ކުރަން ކުރީގެ މިނިސްޓަރު ރާޝިދާ އެދިވަޑައިގެންފި
ރާއްޖޭގެ ސުކޫލުތަކުން ކިޔަވައިގެން އަންނަ ކުދިންގެ އަޚްލާގީ އަދި އެނޫންވެސް އެތައް މައްސަލަތަކެއް ހުންނަ ކަމަށާ، އެހެން ކަމުން ދިރާސާތަކެއް ހަދައި ގާނޫނެއް އެކުލަވާލައިގެން ނަމަވެސް ރާއްޖެއަށް ހޯމް ސްކޫލިން ތާރަފްކުރަންޖެހޭ ކަމަށް ކުރީގެ މިނިސްޓަރު ރާޝިދާ ޔޫސުފް ވިދާޅުވެއްޖެ އެވެ.
ރާޝިދާއަކީ ޓީޗިން ދާއިރާއިން މަތީ ތައުލީމް ހާސިލްކުރައްވާފައިވާ ސުކޫލު ހިންގުމުގެ ދާއިރާގައިވެސް ދިގު މުއްދަތަކަށް މަސައްކަތްކުރެއްވި ބޭފުޅެކެވެ. އޭނާ އަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ޔޫތު އެންޑް ވިމެންސް އެފެއާޒް މިނިސްޓަރުކަމާއި ވިމެންސް އެފެއާޒް އެންޑް ސޯޝަލް ވެލްފެއާ މިނިސްޓަރުކަމާއި ވިމެން އެންޑް ސޯޝަލް ސެކިއުރިޓީ މިނިސްޓަރުކަން އަދި ލަންކާގައި ހުންނަވާ ހައި ކޮމިޝަނަރުކަން ވެސް ކުރައްވާފައިވާ ބޭފުޅެކެވެ.
ގަލޮޅު ރައްޔިތުންގެ ބައްދަލުވުމުގެ ތެރެއިން: ފޮޓޯ/ ރައީސް އޮފީސް
ރައީސް ޑރ. މުހައްމަދު މުއިއްޒު ގަލޮޅު ރައްޔިތުންނާ އެކު ރޭ ބޭއްވެވި ބައްދަލުވުމުގައި ރާއްޖޭގެ ތަޢުލީމީ ހާލަތާމެދު ކަންބޮޑުވުން ފާޅުކުރައްވައި ރާޝިދާ ވިދާޅުވީ މާލޭގައި ސުކޫލުތަކުގައި ކުދިން ވަރަށް ގިނަ ކަމަށެވެ. އެގޮތުން އެ ސުކޫލުތައް ހިންގާން ތިބި މީހުންނަށް ކުޅަދާނަ ވަރަށްވުރެވެސް ކުދިން ގިނަކަން އޭނާ ފާހަގަކުރެއްވިއެވެ.
”ސުކޫލުތަކުގެ ކުދިންނާ، ބެލެނިވެރިންނާ، ޓީޗަރުން ހަމަޖެހިލައިގެން ނޭވާލާނެ ވަގުތުކޮޅެއް ނުލިބޭތީ. މިހާރު ސުކޫލުތަކުގައި މިއީ ހުސް މުބާރާތް އޮންނަހެން އަޅުގަނޑަށް ހީވަނީ. ކިޔެވުން ވެސް ބޮޑު މުބާރާތަކަށް ވެއްޖެ. އެކްސްޓާ އެކްޓިވިޓީސްތައް ވެސް މުބާރާތަކަށް ވެއްޖެ. ދުވަސްތައް ފާހަގަކުރުން ވެސް މުބާރާތަކަށް ވެއްޖެ. ހުރިހާ ކަމެއްވެސް މުބާރާތަކަށް ވެއްޖެ.،" ރާޝިދާ ވިދާޅުވި އެވެ.
ގަލޮޅު ރައްޔިތުންގެ ބައްދަލުވުމުގެ ތެރެއިން: ފޮޓޯ/ ރައީސް އޮފީސް
މިއީ މިދެތިން އަހަރު ތެރޭ ވީ ކަމެއް ނޫން ކަމަށާ، އެގޮތަށް އެކަން ހިނގަމުންދާތާ ގިނަ އަހަރުތަކެއް ވެފައިވާ ކަމަށް އޭނާ ވިދާޅުވިއެވެ. އޭނާ ސުކޫލު ހިންގެވި އިރުވެސް އެކަން ފެށިފައި އޮތް ކަމަށާ އެއީ ވަރަށް ކަންބޮޑުވެވަޑައިގެންނެވި ކަމެއްކަން ފާހަގަކުރެއްވިއެވެ.
މުބާރާތް ބޭއްވުމަކީ އޭގެ ޒާތުން ގޯސްކަމެއް ނޫން. އެކަމަކު މިހާރު މި ބޭއްވޭ ގޮތުން ވާގޮތަކީ، އަޅުގަނޑުމެންގެ ނަފްސާނީ ދުޅަހެޔޮކަމަށް ނޭދެވޭ އަސަރުކުރާ މިންވަރަށް އެކަންތައް ހިނގައްޖެ މިހާރު.
ރާޝިދާ
ކަންމިހެން ހުރުމުން ވަށާޖެހޭ ތަޢުލީމެއް ހާސިލް ކޮށްގެން މުޖުތަމަޢުއަށް ނުކުންނަ ކުދިން މަދުވެފައިވާ ކަމަށާ، 12 އަހަރު ދުވަސް ވަންދެން ސުކޫލުގައި އުޅެ، ވަޒީފާގެ މާހައުލަށް ނުކުންނަ ކުދިންނަށް ސިޓީއެއް ލިޔެލަންވެސް ނޭނގޭ ކަމަށް ރާޝިދާ ވިދާޅުވުއެވެ. އަދި އެ ކުދިންނަށް ދިވެހިބަހުން ވާހަކަދައްކަންވެސް ނޭނގޭތަނުގައި މީހުންނަށް އިހްތިރާމް ކުރަންވެސް ނޭނގޭކަން އޭނާ ފާހަގަކުރެއްވިއެވެ. މީގެ އިތުރުން ވަޒީފާއެއްގައިވެސް ކުދިން ހަރުނުލާ ކަމަށާ، ކުދިންގެ ކަންކަން ދަނީ އެއްބަޔަކަށްވެސް ފަސޭހަ ގޮތަކަށް ނޫންކަމަށް އޭނާ ވިދާޅުވިއެވެ.
އަޅުގަނޑުމެން ބޭނުންވޭ ކުދިން ސިކުނޑީގެ ބޭނުންކޮށްގެން ހޯދައި، ބަލައި ފިކުރުކުރަން. އެހެންނެއްް ނުވޭ މިހާރަކު.
ރާޝިދާ
ރާޝިދާ ވިދާޅުވީ، މިހާރު ކުދިން ކިޔަވަނީ ވިޔަފާރި އުސޫލުން ހައްދާ ޕާސްޓްޕޭޕަރުތަކުގައި ހުންނަ ސުވާލުތަކާ ޖަވާބުތައް ހިތުދަސްކޮށްގެން ކަމަށާ، އަދި ޕްރައިމަރީ ކުދިންނަށްވެސް ޕްރޮޖެކްޓުތަކާއި އެސައިންޓްމެންޓްތައް ވިޔަފާރި އުސޫލުން ހައްދައިދޭ ކަމަށެވެ.
މިކަހަލަ ކުދިންތަކެއް ނެރެގެން މުސްތަގުބަލުގައި އަޅުގަނޑުމެން ކިހިނެއް ގައުމު ހިންގާނީ. މިހާލަތުގައި އަޅުގަނޑުމެން އެބަޖެހޭ ވިސްނަން ތަފާތު ގޮތްގޮތް ހޯދަން. ކުދިންނަށް ތަޢުލީމު ދޭނެ ތަފާތު ގޮތްގޮތް ހޯދަން. ދުނިޔޭގެ އެހެން ތަންތާގައި ތަޖުރިބާ ކުރާ ތަފާތު ގޮތްގޮތް ހޯދަންޖެހޭ. އެކަހަލަ ކަމެއް ތައާރަފް ކުރާއިރު ވަރަށް ބައިވަރު ދިރާސާ ކޮށްގެން މީގެ ހެވާއި ނުބައި ހޯދައިގެން، ގާނޫނީ އޮނިގަނޑަކަށް ފައްތަންޖެހެންޏާ ފައްތައިގެންނަމަވެސް ތަފާތު އޮޕްޝަންތައް ތައާރަފްކުރަންޖެހޭ. އެގޮތުން އަޅުގަނޑު ހުށަހަޅަން ހޯމް ސްކޫލިން ތަޢާރަފްކުރަން.
ރާޝިދާ
ވަރަށް ބޮޑަށް ތަރައްގީވެފައިވާ ބޭރު ގައުމުތަކުގައިވެސް ހޯމް ސުކޫލިން އަކީ އާއްމު ކަމެކެވެ.
ރާއްޖޭގެ ސުކޫލުތަކަކީ ރައްކާތެރި ތަނެއް ނޫން ކަމަށްބުނެ ރާއްޖޭގައިވެސް އެކަން ތަޢާރަފް ކުރުމަށް ގިނަ ބަޔަކު އަންނަނީ ގޮވާލަމުންނެވެ.
Advertisement
This content is created and paid for by advertisers and does not involve Voice Journalists
