ސަރުކާރުން ދޭންޖެހޭ ފައިސާއެއް ހުރިނަމަ ދައުލަތަށް ދައްކަންޖެހޭ ޓެކްސްއިން އެބައި އުނިކުރެވޭނެ އުސޫލެއް ހައްދަވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ކުދި އަދި މެދުފަންތީގެ ވިޔަފާރިވެރިންގެ ހުރި ކަންބޮޑުވުންތައް އަޑުއެއްސެވުމަށް ވިޔަފާރިވެރިންނާއެކު ބޭއްވި ބައްދަލުވުމުގައި ގިނަ ވިޔަފާރިވެރިން ވަނީ އެސްއޯއީތަކުން އަދި ސަރުކާރުން އެ ކުންފުނިތަކަށް ދައްކަންޖެހޭ ފައިސާ ނުލިބޭ ކަމުގެ ކަންބޮޑުވުން ފާޅުކޮށްފައެވެ. އަދި އެކަމުގެ ސަބަބުން ދައުލަތުގެ ޓެކްސް އިދާރާއަށް ދައްކަންޖެހޭ ފައިސާ ދެއްކުމުގައިވެސް ގޮންޖެހުންތަކެއް ކުރިމަތިވާކަމަށް ވިޔަފާރިވެރިން ވަނީ ފާހަގަކޮށްފައެވެ.
ވިޔަފާރިވެރިންގެ އެ ކަންބޮޑުވުން އަޑުއެއްސެވުމަށްފަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ ސަރުކާރުން އަމިއްލަ ފަރާތްތަކަށް ދައްކަންހުރި ފައިސާ ދެއްކުމުގެ މަސައްކަތް ކުރިއަށްދާކަމަށާއި، އެގޮތުން ފިނޭންސް މިނިސްޓްރީން ކަމާބެހޭ ފަރާތްތަކާއެކު މިހާރުވެސް އެމަސައްކަތް ކުރަމުންދާކަމަށެވެ.
ވިޔަފާރިވެރިންނާއެކު ރައީސް ބޭއްވި ބައްދަލުވުމުގެ ތެރެއިން.. ފޮޓޯ: ރައީސް އޮފީސް
ރައީސް ވިދާޅުވީ އެސްއޯއީތަކުން ނުވަތަ މިނިސްޓްރީތަކުން ފައިސާ ނުލިބިދާ ހާލަތުގައި އަމިއްލަ ކުންފުނިތަކުން ދައުލަތައް ދައްކަންޖެހޭ ޓެކްސް ދެއްކުމުގައި އުސޫލެއް ގާއިމްކުރުމާ ގުޅޭގޮތުން ފިނޭންސް މިނިސްޓްރީ އާއި ޓެކްސް އިދާރާއާއެކު ވާހަކަދައްކައިގެން އެކަމަށް ރަނގަޅުގޮތެއް ނިންމަވާނޭކަމަށެވެ.
އެގޮތުން އެކަމުގައިވެސް ވިޔަފާރިވެރިންނަށް ރަނގަޅު އުސޫލެއް ގާއިމްކޮށްދެއްވާނޭކަމަށް ރައީސް ވަނީ ޔަގީންކަންދެއްވާފައެވެ.
މިހާރުވެސް ކޮންމެވެސް ވަރަކަށް ކުރާކަމެއް. އެހެންނަމަވެސް އެއަށްވުރެ ފުޅާކޮށް، ތަންކޮޅެއް ކޮމްޕްރިހެންސިވް ގޮތަކަށް ވީހާވެސް ގިނަބަޔަކަށް އުސޫލެއްގެ ތެރެއިން އެޕްލައިވާނެ ގޮތަކަށް ތިބޭފުޅުން ދައްކަން އޮތް އެއްޗެއް ސަރުކާރުން ދައްކަން އޮތް އެއްޗަކާ އަޅާކެނޑޭނެ ގޮތެއް. ދެން އޭގައި ޤާނޫނީ ގޮތުން އެއްވެސް ކަމެއް ބަލަން އޮތްތޯ ބެލުމާ އެކީގައި މީރާ އާއި ފިނޭންސާ އެކީގައި އިށިއިނދެގެން އަޅުގަނޑުމެން ބަލައިދޭނަން އެއަށްވެސް އެންމެ ރަނަގޅު ހައްލެއް ގެނެސްދޭން
ރޭގެ ބައްދަލުވުމުގައި ބައެއް ވިޔަފާރިވެރިން ބުނެފައިވަނީ އެސްއޯއީތަކުގެ މަސައްކަތްތައް ނިންމާތާ އެތައް ދުވަހެއް ފާއިތުވެގެންދާއިރުވެސް ބިލްތަކަށް ފައިސާ ނުލިބޭކަމަށެވެ. އެހެންވުމުގެ ސަބަބުން ޓެކްސްބަޔާން ހުށަހަޅަންޖެހޭއިރު މާލީގޮތުން ދަތިތަކާ ކުރިމަތިވާކަން ބައެއް ފަރާތްތަކުން ބުންޏެވެ.
އަޅުގަނޑުމެނަށް އެސްއޯއީތަކުން ލާރިނުދީ ހިފަހައްޓާފައި ހުންނައިރުގައި އަދި މީރާއިން އަޅުގަނޑުމެން ފަހާއެބަދުވޭ އިނގޭތޯ.އަޅުގަނޑުމެން އެކައުންޓް ހިފަހައްޓައި ފުރީޒްކުރަން. އަޅުގަނޑުމެން ވަރަށްބޮޑަށް އެދޭކަމެއް އެސްއޯއީއަށް ލާރިދެވެން ނެތިއްޔާމު އަޅުގަނޑުމެން ސަރުކާރަށް ދައްކަން އޮންނަ އެއްޗަކާ ލާޖައްސާލަ ދެއްވާށޭ
ބައްދަލުވުމުގައި ބައިވެރިވި ވިޔަފާރިވެރިއަކު ބުންޏެވެ
ރޭގެ ބައްދަލުވުމުގައި ވިޔަފާރިވެރިން އެންމެބޮޑަށް ފާހަގަކުރި ކަންތައްތަކުގެ ތެރޭގައި ހިމެނެނީ، އެސްއޯއީތަކުން ފައިސާ ނުލިބި ލަސްވާ މައްސަލައާއި މުދާ ކުލިއާ ކުރުމުގައި ކަމާބެހޭ އިދާރާތަކުން ކުރިމަތިވާ ދަތިތަކެވެ. އެގޮތުން ޑެމަރޭޖް މައްސަލަ އާއި އެއަށް ދައްކަންޖެހޭ ފައިސާ ޑޮލަރުން ދައްކަންޖެހޭ ޖެހުންވެސް ވިޔަފާރިވެރިން ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
