އީރާނުގެ ހޮރްމުޒްއަށް ވެހުނު ވާރެއާއެކު ގޮނޑުދޮށްތައް ރަތްކުލައަށްވެ، މޫދުވެސް ރަތްވެއްޖެއެވެ. މި ކަމަށް ދުނިޔޭގެ ގިނަ ބައެއްގެ ސަމާލުކަން ވަނީ ލިބިފައެވެ.

އެގޮތުން ބޯކޮށް ވާރޭ ވެހުމާ ގުޅިގެން، ޕާޝިއަން ގަލްފުގައިވާ މި ރަށުގެ ގޮނޑުދޮށްތަކާއި މޫދު، ކްރިމްސަން ރަތް ކުލައަކަށް ބަދަލުވެފައިވާ މަންޒަރު ފެންނަ ވީޑިއޯތައް މީސްމީޑިއާގައި އާއްމުވެ ވައިގައި ހިފާފައިވާއިރު، އެތަން ވެފައިވަނީ ގިނަ ބަޔަކު ޝައުގުވެރިކުރުވަނިވި މަންޒަރަކަށެވެ. އަދި ބައެއް މީހުން އެކަމާމެދު ކަންބޮޑުވުންވެސް ފާޅުކޮށްފައުވާކަން ފާހަގަކޮށްލަންޖެހެއެވެ. 

އެހެންކަމުން މިއީ ކިހިނެއް ވާ ކަމެއް ކަމާއި، މިކަމުގެ ސަބަބުން ސިއްޙީގޮތުން، ނޫނީ އެހެންވެސް ގޮތަކުން ގެއްލުމެއް ވެދާނެތޯ ނޫންތޯ ބަލާލުމަކީ މުހިންމު ކަމެކެވެ.

ސައިންސްގެ ނަޒަރިއްޔާއިން ބަލާލާނަމަ، މި ހައިރާން ކުރުވަނިވި މަންޒަރާ ގުޅިފައިވަނީ ހޮރްމުޒްގެ ޚާއްސަ ބިމުގެ މައްޗަށެވެ. އެގޮތުން ހޮރްމުޒް އަކީ   އަޔަން އޮކްސައިޑް، ޚާއްސަކޮށް ހެމަޓައިޓް ގިނަ ރަށެކެވެ. މި މަޢުދަނުގެ ބިމަށާއި ގާތަކަށް ރަތް ކުލައެއް ގެނެސްދޭ މާއްދާއެކެވެ.

ބިމާ ބެހޭ ސައިންސްވެރިން ބުނާ ގޮތުގައި، ވާރޭ ފެން މި ރަށުގެ އަޔަން ގިނަ ބިމުގެ ތެރެއަށް ފޭދިގެންދާ އިރު، ފެނުގެ ތެރެއަށް އޮކްސައިޑް ޑިސޯލްވެއެވެ. އަދި، އެ ފެން އަތިރިމައްޗާ ހަމައަށް ވާސިލްވުމުން އަތިރިމަތީގައި ހުންނަ ވެލިވެސް އެއްކޮށް ރަތްވެއެވެ. އަދި ގޮނޑުދޮށަށް ޖަހާލާ ރާޅުތަކާއެކު އެ ވެލިތައް މޫދުގެ ތެރެއަށްދާއިރު، މޫދުވެސް ރަތްވެއެވެ. މީގައި ފާހަގަކޮށްލަންޖެހޭ އަނެއް ކަމަކީ ގޮނޑުދޮށުގެ، ގިނައިން ގިރާ ސަރަހައްދުތަކުގައި މި ރަތްކުލަ އިތުރަށް ގަދަވާ ކަމެވެ.

ކައުނުގައިވާ ގުރަހަތަކުގެ ތެރެއިން މާސްވެސް ރަތްކުލައިން ފެންނަ މައިގަނޑު ސަބަބަކަށްވާ ހެމަޓައިޓަކީ، އޭގައި ފެންޖެހި ތެތްވުމުން ވަރަށް އަވަހަށް އޮކްސައިޑްވާ މަޢުދަނެކެވެ.

ބައެއް ފަހަރު "ޕާޝިއަން ގަލްފުގެ ރެއިންބޯ އައިލެންޑް" ގެ ނަމުން ނަންދީފައިވާ ހޮރްމުޒް ރަށަކީ އެކި ކުލަކުލައިގެ މަޢުދަންތައް ގިނަކަމުން މަޝްހޫރު ރަށެކެވެ.

މި ހާދިސާއަކީ މުޅިން ގުދުރަތީ އަދި އެއްވެސް ނުރައްކަލެއް ނެތް ކަމެއް ކަމުގައި ވިޔަސް، މި ކުލައިގައި ލޭގެ ކުލައާ އެއްގޮތް ކަމެއް ހުރުމުން އިންޓަނެޓްގައި ވަނީ މިކަމަށް ބޮޑު ސަމާލުކަމެއް ލިބިފައެވެ.

ތިމާވެށީގެ ތަޖުރިބާކާރުން ބުނާގޮތުން މިފަދައިން ކަންދިމާވުމަކީ ތިމާވެށި ތަޣައްޔަރުވާ ކަމެއް ނޫން ކަމަށާއި، ނުވަތަ އެއްވެސް އިކޮލޮޖިކަލް ނުރައްކަލެއްގެ އެލާމެއް ނޫންކަމަށެވެ.