ފެނަކައިން އިސްނަގައިގެން ކުރިއަށްގެންދާ ލޭހަދިޔާކުރުމުގެ ޤައުމީ ކެމްޕެއިން މިއަދު ފަށައިފިއެވެ.

"ލޭހަދިޔާކުރުން މުޅި ރާއްޖެއިން" މި ޝިއާރުގެ ދަށުން ކުރިއަށްދާ ކެމްޕެއިން ފަށާފައިވަނީ އެކަމަށްޓަކައި މިއަދު ފެނަކައިގެ ހެޑް އޮފީޙުގައި ބޭއްވި ރަސްމިއްޔާތެއްގައެވެ.

މޯލްޑިވްސް ބްލަޑް ސާވިސްއާ ގުޅިގެން ހިންގާ މި ކެމްޕެއިން އިފްތިތާހްކޮށްދެއްވީ މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤް ހަލީމް އާއި ހުޅުމާލޭ ހޮސްޕިޓަލުގެ ޑިރެކްޓަރ ޖެނެރަލް މޫސާ ކަލީމް އާއި މޯލްޑިވިއަން ބްލަޑް ސާވިސްގެ ޑިރެކްޓަރ ޖެނެރަލް، އަހްމީމް ފާރިޝް އަދި ފެނަކައިގެ ޑެޕިއުތީ މެނޭޖިންގ ޑިރެކްޓަރ އާދަމް ތައުފީގެވެ. 

ފެނަކައިން ބުނީ މާލެ ސަރަހައްދުގެ އިތުރުން ފެނަކައިގެ ބްރާންޗުތައް ހުންނަ ހުރިހާ ރަށެއްގައި މި ކެމްޕެއިން ކުރިއަށްދާނޭކަމަށެވެ. އެގޮތުން މި ކެމްޕެއިނަކީ ރާއްޖޭގެ ތާރީހުގައިވެސް މިހާތަނަށް ބާއްވާ އެންމެބޮޑު  މިފަދަ ކެމްޕެއިންކަންވެސް ފެނަކައިން ބުންޏެވެ.

މި ކެމްޕެއިނަކީ ލޭ ބޭނުންވާ ފަރާތްތަކަށް އެ ފުރުސަތު ތަނަވަސްކޮށް ތެލަސީމިއާ ބައްޔަށް ފަރުވާކުރާ މީހުންނާއި އެކި ބަލިތަކަށް ފަރުވާ ހޯދާމީހުންގެ އިތުރުން އޮޕަރޭޝަން ކުރުމަށް ބޭނުންވާ މީހުންނަށް ލޭ ފޯރުކޮށްދިނުމަށް ލުއިފަސޭހަ މަގެއް ހުޅުވައިދިނުމުގެ ގޮތުން ކުރިއަށްގެންދާ ކެމްޕެއިނެއްކަމަށެވެ.