ލީބިޔާގެ އާމީ ޗީފް، މުޙައްމަދު އަލީ އަޙްމަދު އަލް-ޙައްދާދު، ތުރުކީގެ ވެރިރަށް އަންކާރާ ދަތުރުކުރަމުންދިޔަ ޖެޓްވެއްޓި އެއިން ދަތުރުކުރި އެންމެން މަރުވެއްޖެއެވެ.

އަންކާރާގެ އެއަރޕޯޓަކުން ފުރައިގެން ދަތުރުކުރަމުން ދަނިކޮށް ވެއްޓުނު މި ބޯޓުގައި އި އަލް-ޙައްދާދުގެ އިތުރުން ލީބިޔާގެ އިސް އަސްކަރީ ހަތަރު ބޭފުޅަކާއި، ބޯޓުގެ ތިން ކްރޫ މެންބަރުން ތިއްބެވެ.

ތުރުކީގެ އޮފިޝަލުން އަލްޖަޒީރާއަށް މަޢުލޫމާތު ދެއްވަމުން ވިދާޅުވެފައިވަނީ، ތަޙްޤީޤުތަކުން ދައްކާ ގޮތުގައި މި ހާދިސާއަކީ ކުރިމަތިވެފައިވަނީ ބޯޓަށް ދިމާވި ޓެކްނިކަލް މައްސަލައެއްގެ ސަބަބުން ކަމަށެވެ.

ލީބިޔާގެ ބޮޑުވަޒީރު ޢަބްދުލް ޙަމީދު ދަބީބާ ވިދާޅުވޫ، މި ހިތާމަވެރި ހާދިސާ ހިނގާފައިވަނީ ލީބިޔާގެ ވަފްދުގެ ބޭފުޅުން ޤައުމަށް އެނބުރި ވަޑައިގަންނަވަނިކޮށް ކަމަށެވެ.

"މިއީ ޤައުމަށާއި، އަސްކަރިއްޔާއަށާއި، ހުރިހާ ރައްޔިތުންނަށް ލިބުނު ވަރަށް ބޮޑު ގެއްލުމެއް. އަޅުގަނޑުމެންނަށް ގެއްލިގެންދިޔައީ އިޚްލާޞްތެރިކަމާއި ވެފާތެރިކަމާއެކު ޤައުމަށް ޚިދުމަތްކުރެއްވި ބޭފުޅުން. އެބޭފުޅުންނަކީ ޒިންމާދާރުކަމާއި، ޤައުމީ ލޯބީގެ މިސާލެއް،" ދަބީބާ ވިދާޅުވިއެވެ. 

އަލް-ޙައްދާދަކީ ލީބިޔާގެ ހުޅަނގު ފަރާތުގެ އެންމެ އިސް އަސްކަރީ ކޮމާންޑަރެވެ. އަދި 2011 ވަނަ އަހަރު ނޭޓޯގެ އެހީތެރިކަމާއެކު ހިންގި ބަޣާވާތެއްގައި ދިގު މުއްދަތެއްގައި ވެރިކަން ކުރެއްވި މުޢައްމަރު ގައްދާފީ ވެއްޓި، އަވަހާރަކޮށްލެވުނު ފަހުން، ބައިބައިވެފައިވާ ޤައުމު އެއްބައިވަންތަކުރުމަށް އ.ދ. މެދުވެރިވެގެން ކުރިއަށްދާ މަސައްކަތްތަކުގައި މުހިންމު ދައުރެއް އަދާކުރެއްވި ބޭފުޅެކެވެ.

މި ހާދިސާގައި މަރުވި އަނެއް ހަތަރު އަސްކަރީ އޮފިސަރުންނަކީ، ލީބިޔާގެ ގްރައުންޑް ފޯސްގެ ވެރިޔާ ޖެނެރަލް އަލް-ފިތޫރީ ޣަރީބިލް، އަސްކަރީ އުފެއްދުންތަކާ ބެހޭ އިދާރާގެ ވެރިޔާ ބްރިގޭޑިއަރ ޖެނެރަލް މަޙްމޫދު އަލް-ޤަޠާވީ، އާލީސްޓާފްގެ ވެރިޔާގެ މުޝީރެއްގެ ގޮތުގައި ހުންނެވި މުޙައްމަދު އަލް-އަސަވީ ދިޔާބް، އަދި އާލީސްޓާފްގެ އޮފީހުގެ އަސްކަރީ ފޮޓޯގްރާފަރު މުޙައްމަދު ޢުމަރު އަޙްމަދު މަޙްޖޫބް އެވެ.