ވެލާނާ އިންޓަނޭޝަނަލް އެއާޕޯޓް މެދުވެރިކޮށް ވައިގެމަގުން އަންނަ މުދަލާގުޅޭގޮތުން ކަސްޓަމްސްއިން ދޭންޖެހޭ ހިދުމަތްތައް 24 ގަޑިއިރަށް ބަދަލުކޮށްފި އެވެ.

މޯލްޑިވްސް ކަސްޓަމްސް އިން މިއަދު ބުނީ ވައިގެމަގުން އަންނަ މުދާ ކްލިއަރކުރުމާ ގުޅޭގޮތުން ކަސްޓަމްސްއިން ދޭންޖެހޭ އެންމެހާ ހިދުމަތްތައް، 24 ގަޑިއިރަށް ބަދަލުކޮށްފައިވާ ކަމަށެވެ.

ކަސްޓަމްސް އިން މިގޮތަށް ނިންމީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެ ގޮތަށް ނިންމެވުމަށް އެންގެވުމުންނެވެ. ރައީސް އެ ގޮތަށް އެންގެވީ ކުދި އަދި މެދު ފަންތީގެ ވިޔަފާރިވެރީންނާއެކު މި މަހުގެ 18 ވަނަ ދުވަހުގެ ރޭ ބޭއްވި ބައްދަލްވުމުގައި ވިޔަފާރިވެރީން އެކަމަށް އެދުމާއި ގުޅިގެންނެވެ.

އެރޭގެ ބައްދަލްވުމުގައި ރައީސް ވަނީ މުދާ ކުލިއާ ކުރަން ފްރީކޮށް ހަމަޖެހިފައިވާ 80 ގަޑިއިރުގެ ބަދަލުގައި 124 ގަޑިއިރަށް އިތުރުކުރަން ނިންމާފައިވާ ކަމަށް ވެސް އިއުލާނު ކުރައްވާފަ އެވެ. އަދި ކަސްޓަމާއި އެމްއޭސީއެލްގެ އިސްބޭފުޅުންނާއި މަޝްވަރާ ކުރެއްވުމަށް ފަހު ކްލިއަރެންސް މަަސައްކަތް ސައުވީސް ގަޑިއިރަށް ބަދަލު ކުރަން ނިންމާފައިވާ ކަމަށް ވިދާޅުވި އެވެ.

"މި 80 ގަޑިއިރު 124 ގަޑިއިރަށް އިރާދަކުރެެއްވިއްޔާ, ޑެމެރެޖް ނާރާ ގޮތަށް އިތުރުކޮށްދޭނެ. އަދި ކަސްޓަމާއި އެމްއޭސީއެލް ގުޅިގެން ކްލިއަރެންސް މަަސައްކަތަށް މި އޮންނަނީ 18 ގަޑިއިރާއި 30 މިނެޓް. އެގޮތަށް އޮތުމުގެ ބަދަލުގައި 24 ގަޑިއިރަށް ބަދަލުކޮށްދޭނަން އިރާދަކުރެއްވިއްޔާ," މި މަހުގެ 18 ވަނަ ދުވަހުގެ ރޭ ކުދި އަދި މެދު ފަންތީގެ ވިޔަފާރިވެރީންނާއެކު ރައީސް ބޭއްވެވި ބައްދަލުވުމުގައި  އިއުލާނު ކުރެއްވި އެވެ.