އައު އަހަރާ ދިމާކޮށް ފުލުހުންގެ އިންޒާރެއް؛ އިޖުތިމާއީ މިންގަނޑުން ބޭރުވާނަމަ ފިޔަވަޅު އަޅާނަން
އައު އަހަރާ ދިމާކޮށް ފުލުހުން ކުރިއަށްގެންދާ ހާއްސަ އޮޕަރޭޝަން ފަށައިފިއެވެ.
ކޮންމެ އަހަރަކުވެސް ކުރިއަށްއޮތް އަހަރު ފެށުމާ ދިމާކޮށް ފުލުހުން އޮޕަރޭޝަނެއް ކުރިއަށްގެންދެއެވެ. މިކަމާ ގުޅޭގޮތުން ފުލުހުން ނެރުނު ބަޔާނެއްގައި ބުނީ، އައު އަހަރާ ދިމާކޮށް ފުލުހުން ކުރިއަށްގެންދާ އޮޕަރޭޝަން "ރިވެލި" އިއްޔެއިން ފެށިގެން ކުރިއަށްގެންދާކަމަށެވެ.
އެގޮތުން މި އޮޕަރޭޝަނުގެ ދަށުން ގިނަ އަދަދެއްގެ ފުލުހުން މަގުމަތީގައި ހަރަކާތްތެރިވަމުންދާނޭކަމަށް ފުލުހުން ބުންއެވެ. އޮޕަރޭޝަނުގައި މާލޭގެ އެކި ސަރަހައްދުތަކުގައި ވީސީޕީ ޤާއިމްކޮށް މީހުންނާ ސުވާލުކުރުމާއި އުޅަނދުތައް ޗެކްކުރަމުންދާނޭކަމަށް ފުލުހުން ބުނެއެވެ. މީގެ އިތުރުން އޮޕަރޭޝަނުގެ ތެރެއިން ހާއްސަ ސަމާލުކަމެއް ދީގެން ވައްކަމާއި ފޭރުން ހުއްޓުވުމާއި، ބަނގުރަލާއި މަސްތުވާތަކެއްޗާ ގުޅުންހުރި މައްސަލަތަކާއި، ސައިލެންސަރު މޮޑިފައިކޮށް އަޑުގަދަކޮށް ދުއްވާފަރާތްތަކަށް ފާރަވެރިވާނެއެވެ. އަދި އާންމު އިޖުތިމާއީ މިންގަނޑުތަކާއި ހިލާފަށް އުޅޭ މީހުން ހުއްޓުވައި ފިޔަވަޅު އަޅަމުންދާނޭކަމަށްވެސް ފުލުހުން ބުންޏެވެ.
ފުލުހުން ވަނީ މިދިޔަ އަހަރުތަކުގައިވެސް އައު އަހަރާ ދިމާކޮށް މި އޮޕަރޭޝަން ކުރިއަށްގެންގޮސްފައެވެ. އެގޮތުން ބަނގުރާ އަދި މަސްތުވާތަކެތި ވިއްކުމާއި، ވިޔަފާރިކުރުން އިތުރުވެގެންދާނޭ ކަމަށް ބަލައި، ހުޅުމާލެ ފަޅުތެރެ ޕެޓްރޯލްކުރުމާއި ރަށުތެރެއަށް ބަނގުރަާ އަރުވައި، ބަނގުރާ ވިއްކުމަށް ޝައްކުކުރެވޭ ކެފޭ، ރެސްޓޯރެންޓުތައް މޮނީޓަރކުރުން ވަނީ ކުރިއަށް ގެންގޮސްފައެވެ.
މީގެކުރީ އަހަރުތަކުގައި ކުރިއަށްގެންދިޔަ އޮޕަރޭޝަންތަކުގައި ގިނަ އަދަދެއްގެ މީހުން ހައްޔަރުކޮށްފައިވާކަން ފާހަގަކޮށްލެވެއެވެ. މީގެ ތެރޭގައި މާލެއާއި އަތޮޅުތެރޭގެ ރަށްތައްވެސް ހިމެނެއެވެ.
Advertisement
This content is created and paid for by advertisers and does not involve Voice Journalists
