މިއަހަރުގެ ތެރޭ ސައިބާ ކްރައިމްގެ 814 މައްސަލައެއް ރިޕޮޓުކޮށްފައިވާކަމަށް ފުލުހުން މައުލޫމާތުދީފިއެވެ. 

ފުލުހުން މި މައުލޫމާތުތައް ހިއްސާކޮށްފައިވަނީ އެންޓި ސްކޭމް ސެންޓަރާއި ސައިބަރ ކްރައިމް ސެންޓަރުން ކުރަމުންދާ މަސައްކަތްތަކާ ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ. 

ފުލުހުން ބުނި ގޮތުގައި މިއީ 2024 ވަނަ އަހަރަާއި އަޅާ ބަލާއިރު %90.2 އިތުރު އަދަދެއްކަމަށެވެ.  

މި އަހަރު ރިޕޯޓުކުރެވުނު މައްސަލަތަކުގެ ތެރޭގައި އެންމެ ގިނައީ ސްކޭމްގެ މައްސަލަތަކެވެ. އެގޮތުން މި އަހަރުގެ ތެރޭގައި ސްކޭމްގެ 542 މައްސަލައެއް ރިޕޯޓުކުރެވިފައިވެއެވެ. މިއީ މި އަހަރު ހުށަހެޅުނު ޖުމުލަ ސައިބަރ މައްސަލަތަކުގެ %66.6 އެވެ.

މި މައްސަލަތަކުގެ %10.2 އަކީ ހެކް ކުރުމުގެ މައްސަލަތަކެވެ. އެގޮތުން ސޯޝަލް މީޑިއާ އަދި މޯބައިލް ފޯން ހެކް ކުރުމުގެ 71 މައްސަލައެއް ރިޕޯޓުކޮށްފައިވއެވެ. 

ރިޕޯޓުކުރެވުނު ކުއްތަކުގެ %9.6 އަކީ އޮންލައިން ހެރޭސްމެންޓް މައްސަލަތަކެވެ. އޮންލައިން ހަރާސްމަންޓުގެ ތެރޭގައި ބަރަހަނާ މަންޒަރު މެދުވެރިކޮށް ބިރު ދެއްކުމާއި، ބްލެކްމެއިލް ކުރުމާއި، ޑިފެމޭޝަން އަދި ބުލީ ކުރުމުގެ މައްސަލަތައް ހިމެނެއެވެ. 

ފުލުހުން ބުނާގޮތުގައި މިވަގުތު 111 މައްސަލައެއް ދަނީ ތަހުގީގުކުރެވެމުންނެވެ. އަދި މިއަހަރުގެ ތެރޭގައި ސައިބަރ ކްރައިމްގެ އެކި ހާދިސާތަކާއި ގުޅިގެން 1095 ފަރާތަކަށް އެހީ ފޯރުކޮށްދީފައިވާކަމަށްވެސް ފުލުހުން ބުނެއެވެ. 

ފުލުހުންގެ ތަފާސްހިސަބުތަކުން ދައްކާ ގޮތުގައި ދުވާލަކު 3 ސައިބަރ ކުށުގެ ހާދިސާ ރިޕޯޓުކުރެވެއެވެ. 

މީގެ އިތުރުން ފުލުހުން ވިދާޅުވީ ސްކޫލު ދަރިވަރުންނަށާއި ބެލެނިވެރިންނަށް އަމާޒުކޮށް ހިންގާ ކޮންފެޝަން ޕޭޖް ތަކުން 3 ޕޭޖެއް  ސީޒްކޮށް، 19 ޕޭޖެއް ޓޭކް ޑައުން ކޮށްފައި ވާކަމަށެވެ. އަދި މީގެ ތެރެއިން 30 މައްސަލައެއް މިހާރު ދަނީ ތަހުގީގު ކުރަމުންނެވެ.