ފައްތާޙްގެ ޢާއިލާއަށް ރައީސް މުޢިއްޒު ތަޢުޒިޔާ ވިދާޅުވެއްޖެ
ރޭ ކުއްލި ގޮތަކަށް ނިޔާވި ޢަބްދުލްފައްތާޙް ޢަބްދުލްޤައްޔޫމް ނިޔާވުމާއި ގުޅިގެން އާއިލާއަށް ރައީސް ޑރ. މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.
ހއ. ކެލާ, ކާނިގަސްދޮށުގޭ އަބްދުލްފައްތާހް ނިޔާވީ ސްޓްރޯކެއް ޖެހި ފަރުވާ ދެމުން ދަނިކޮށެވެ. ސްޓްރޯކް ޖެހި ހާލު ދެރަވީ ކެލާގައި ހުއްޓަ އެވެ. ވަގުތުން ދިއްދޫގައި ހުންނަ ހއ އަތޮޅު ހޮސްޕިޓަލަށް ގެންދިޔަ އެވެ. ނަމަވެސް ފަރުވާ ދެނިކޮށް ވަނީ ނިޔާވެފަ އެވެ.
ފައްތާޙް ނިޔާވުމާއި ގުޅިގެން ރައީސް މުޢިއްޒު ކިރެއްވި ޕޯސްޓެއްގައިވަނީ ޢާއިލާއަށް ތައުޒިޔާ ވިދާޅުވެ، އޭނާއަށް ސުވަރުގޭގެ ދާއިމީ ނިޢުމަތް ދެއްވާ، މާތްاللهގެ ރުއްސެވުމާއި ފުއްސެވުމުގައި ލެހެއްޓެވުން އެދި ދުޢާ ދަންނަވާފައެވެ.
ފައްތާހް ނިޔާވީ އުމުރުން 54 އަހަރުގަ އެވެ. އޭނާގެ މައްޗަށް ކަށުނަމާދު ކުރުން އޮތީ ރޭ ފަތިސް ނަމާދަށް ފަހު ދިއްދޫ, މަސްޖިދުލް ޣުފްރާން -- ހުކުރު މިސްކިތުގަ އެވެ. ވަލުލާފައުވަނީ އެ ރަށު ދެކުނު ސަހަރާގަ އެވެ.
ފައްތާހްގެ ކުއްލި ވަކިވުމާއެކު ވަރަށް ގިނަ ބަޔަކު ދަނީ ހިތާމަކޮށް ތައުޒިޔާ ކިޔަމުންނެވެ. ފިލްމީ މަސައްކަތުން މުޅީން ދުރުވެ އަމިއްލަ ވިޔަފާރީގައި ކެލާގައި ދިރިއުޅޭތާ އަހަރުތަކެއްވީއިރު، އޭނާ ވަނީ ކުރިއަށް އޮތް ކައުންސިލް އިންތިހާބުގައި ވާދަކުރަން ނިންމާ ސަރުކާރު ހިންގާ ޕިއެންސީގެ ޓިކެޓް ވެސް ހޯދާފައެވެ.
އެގޮތުން އޭނާ ވާދަކުރަން ނިންމީ ކައުންސިލްގެ ރައީސްގެ މަގާމަށެވެ. އެކަމަށް އޭނާ ގެންދިޔައި ކެންޕެއިން މަސައްކަތް ވަރަށް ފޯރީގައި ކުރަމުންނެވެ.
Advertisement
This content is created and paid for by advertisers and does not involve Voice Journalists
