އިސްލާމީ ކަންތައްތަކާބެހޭ ވުޒާރާގެ ދަޢުވާ އެންޑް ގައިޑެންސް ސެކްޝަންގެ "ވާއިޒު މުޝާރިކް" މަޤާމަށް އައްޝައިޚް މުޙައްމަދު އިބްރާހިމް (ނައިފަރީ) ހަމަޖައްސަވައިފިއެވެ.

މި މަޤާމަކީ ރޭންކް 7 ގެ މަޤާމެކެވެ. މަގާމުގެ މުސާރައަކީ 14،225 ރުފިޔާއެވެ. 

އައްޝައިޚް މުޙައްމަދު އިބްރާހިމް އިއްޔެއާ ހަމައަށް ހުންނެވީ މަދްރަސަތުލް އިފްތިތާޙްގެ އިސްލާމް ޓީޗަރެއްގެ މަޤާމުގައެވެ. ނަމަވެސް، ލޮލުގެ ފެނުން ގެއްލުމާ ގުޅިގެން ޝައިޚް ނޯޕޭ ލީވްގައި ހުންނަވާތާ 4 އަހަރު ވެއްޖެއެވެ.

އިސްލާމީ ކަންތައްތަކާ ބެހޭ ވުޒާރާއިން ބުނީ ޝައިޚަކީ ޓީޗަރަކަށް ހުންނެވި އިރުވެސް އެ ވުޒާރާއާ ގުޅިގެން އަދި އަމިއްލަ ގޮތުންވެސް ދީނީ ހޭލުންތެރިކަން އިތުރު ކުރުމުގެ މަސައްކަތް ކުރައްވާ އިލްމުވެރިއެއް ކަމަށެވެ. އެހެންވެ އެބޭފުޅާ އެއްވެސް އާމްދަނީއެއް ނުލިބި އެހާ ދުވަސް ހުންނަވާތީ އެ ވުޒާރާއިން އިސްނަގައިގެން ސިވިލް ސަރވިސް ކޮމިޝަންގައި ޝެއިޚްގެ ވަޒީފާ ބަދަލު ކޮށްދެއްވުމަށް އެދުނު ކަމަށްވެސް ބުންޏެވެ.

އަފި ސީއެސްސީން ޤާނޫނާއި ގަވާއިދުން ލިބިދޭ އިޚްތިޔާރުގެ ދަށުން އެ ވުޒާރާގެ އެދުމާއެކު އެކު ވަޒީފާ ބަދަލުކޮށްދިންކަންވެސް ފާހަގަކޮށްފައިވެއެވެ.

ވާޢިޡު މުޝާރިކުންނަކީ ދިވެހިންގެ މެދުގައި، އިސްލާމީ، ވަޙްދަތު ހިފެހެއްޓުމަނާއި ދީނީ ހޭލުންތެރިކަން އިތުރުކުރުމަށް ޢައްޔަނުކުރެވޭ ބޭފުޅުންނެވެ.

ވާޢިޡު މުޝާރިކުންނަކީ ދިވެހިންގެ މެދުގައި، އިސްލާމީ، ވަޙްދަތު ހިފެހެއްޓުމަނާއި ދީނީ ހޭލުންތެރިކަން އިތުރުކުރުމަށް ޢައްޔަނުކުރެވޭ ބޭފުޅުންނެވެ. މަގާމަށް އައްޔަނު ކުރާ މީހުންގެ މަސްއޫލިއްޔަތުގެ ތެރޭގައި ތަފާތު މީޑިޔާ ބޭނުންކޮށްގެން ހިންގޭ ޕްރޮގްރާމްތަކުގައި ބައިވެރިވެ އިސްލާމީ ޝަރީޢަތުގައި ކަނޑައެޅިފައިވާ ޙުކުމްތަކާ ގުޅިގެން، ކުރެވޭ ސުވާލުތަކުގެ ޖަވާބު ފޯރުކޮށްދިނުމާ، އިސްލާމްދީނާމެދު ކުރެވޭ ކުށްހީތަކަށް ޖަވާބުދާރީވުމަށް ބޭނުންވާ ދިރާސާތައް ކުރުމާ، އެ ދިރާސާތައް ކުރުމުގައި އެހެނިހެން އިސްލާމީ، ޤައުމުތަކުގައި، އެފަދަ ކަންކަން ނިންމާފައިވާ ގޮތްތަކަށް ރިޢާޔަތްކުރުން ހިމެނެއެވެ.

މީގެ އިތުރުން މީޑިޔާގެ ތަފާތު ވަސީލަތްތަކުން، އިސްލާމްދީނާ ބެހޭގޮތުން ފަތުރަމުންދާ ދޮގުވާހަކަތައް ދެނެގަނެ އެކަންކަމަށް ޖަވާބުދާރީވުމަށް، ބޭނުންވާ ދިރާސާކުރުންވެސް ހިމެނެއެވެ. 

ލޮލުގެ ފެނުން ގެއްލުނުފަހުންވެސް ޝެއިޚްގެ ދީނީ ދަޢުވަތު މެދު ކަނޑުވާނުލައި، މީސްމީޑިއާ މެދުވެރިކޮށް އަންނަނީ ރައްޔިތުންގެ ސުވާލުތަކަށް ޖަވާބު ދެއްވަމުންނެވެ. 

އިސްލާމީ ވުޒާރާއިން ބުނީ ވާޢިޡުގެ މަޤާމުގައި ހުންނަވައިގެން ދީނީ ހޭލުންތެރިކަން އިތުރު ކުރުމަށް މިނިސްޓްރީން ކުރިއަށް ގެންދާ އެކި ޕްރޮގްރާމްތަކުގައި ޝެއިޚް މަސައްކަތް ކުރައްވާނެ ކަމަށެވެ.

ޝެއިޚްއަށް އާމްދަނީ ލިބޭނެ މަގު ބަންދުވެ: ބޭސްފަރުވާ ކުރާނެ ގޮތެއްވެސް ނެތި ލަސްވެފައި ވަނިކޮށް ބޭސްފަރުވާގެ ކަންކަން ދިވެހިންގެ އެހީގައި ހަމަޖައްސައިދިނީ އެހީ ޖަމިއްޔާއިންނެވެ. އެ އެހީގައި ޝެއިޚް މިހާރު ތައްޔާރުވަމުން އަންނަނީ ލޮލުގެ ފަރުވާއަށް ބޭރަށް ފުރުމަށެވެ.