އަމިއްލަ ހޮސްޕިޓަލް ތަކަށާއި ކްލިނިކްތަކުން ހޯދުމަށް ކުރަންޖެހޭ ހަރަދު އާސަންދަ ސްކީމް މެދުވެރިކޮށް ލިބޭނޭ އިންތިޒާމް ހަމަޖައްސައިފިއެވެ.

އެންސްޕާއިން މިއަދު ވަނީ އެ އިދާރާއިން ފެށުމަށް ނިންމި މުހިންމު 5 ޕްރޮގްރާމެއް ތައާރަފްކޮށް އެކަން ރަސްމީކޮށް އިއުލާނުކޮށްފައެވެ. މިކަމަށްޓަކައި މިއަދު ބޭއްވި ރަސްމިއްޔާތުގައި އެ ޕްރޮގްރާމްތައް އިފްތިތާހްކޮށްދެއްވީ، ހެލްތު މިނިސްޓަރު ޢަބްދުﷲ ނާޒިމެވެ.

މިއަދު ތައާރަފްކުރި ޕްރޮގްރާމްތަކުގެ ތެރެއިން އެންމެ ފާހަގަކޮށްލެވެނީ ޕްރައިވެޓް ހޮސްޕިޓަލްތަކަށާއި ކްލިނިކްތަކުން އާއްމުން ހޯދަމުން އަންނަ ހިދުމަތްތައް އާސަންދައިގެ ދަށަށް ބަދަލުކުރުމެވެ. މީގެ ތެރޭގައި ކްލިނިކްތަކުން ލިބޭ ހުރިހާ ބާވަތެއްގެ ތެރަޕީ ހިދުމަތްތައް އާސަންދަ ސްކީމް މެދުވެރިކޮށް ހަމަޖެއްސުން ހިމެނެއެވެ. މީގެ ތެރޭގައި ނަފްސާނީ ބައްޔަށް ހިނގާ ހުރިހާ ހަރަދެއް އާސަންދަ ސްކީމް މެދުވެރިކޮށް ހަމަޖެއްސުން ހިމެނެެވެ.

އެންސްޕާގެ މުހިންމު 5 ޕްރޮގްރާމެއް ތައާރަފްކުރުން...

މި ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު އަބްދުﷲ ނާޒިމް ވިދާޅުވީ، ވަކިވަކި ފަރުދުންގެ ސިއްހީ ދުޅަހެޔޮކަމާއި ރައްކާތެރިކަމަކީ، މުޅި މުޖުތަމައުގެ ދުޅަހެޔޮކަމާއި ރައްކާތެރިކަން ކަމަށާއި، ސިއްހީ ހިދުމަތް ތަރައްޤީކުރުމާއި ސޯޝަލް ޕްރޮޓެކްޝަންގެ ތެރެއިން ރައްޔިތުންނަށް ދޭ ހިދުމަތްތައް ފުޅާކުރުމަކީ މި ސަރުކާރުން ވަރަށް ބޮޑު އިސްކަމެއްދެމުން އަންނަ ކަމެއްކަމަށެވެ. އެކަމަށްޓަކައި ސިޔާސަތައް އެކަށައެޅި އެކަންކަން ތަންފީޒްކުރައްވަމުން އަންނަކަން މިނިސްޓަރު ފާހަގަކުރެއްވިއެވެ. 

މިއަދު ތައާރަފްކުރި އިތުރު ހިދުމަތްތަކުގެ ތެރޭގައި ތެލަސީމިއާ ފަރާތްތަކަށް ކޮންމެ މަހަކަށް 2،000 ރުފިޔާ ލިބޭ އެލަވަންސެއް ހަމަޖެއްސުމާއި، ފިލިޕީންސްގައި ދިރިއުޅެމުންދާ ދިވެހިން ބޭސްފަރުވާކުރުމަށް ހޭދަވާ ހަރަދުގެ 65 އިންސައްތަ މެރަނަ ސްކީމްގެ ދަށުން ހަމަޖެއްސުން ހިމެނެއެވެ.

ސިއްހީ ފަރުވާގެ އެކިއެކި ހިދުމަތްތައް އަމިއްލަ ކްލިނިކްތަކުން ހޯދުމަށް ރައްޔިތުންގެ އަތުން ބޮޑު ހޭދައެއްކުރަން ޖެހުމަކީ ބައެއް ރައްޔިތުންގެ ވަރަށްބޮޑު ޝަކުވާއެކެވެ. އެގޮތުން ކްލިނިކްތަކުން ތެރަޕީތަކަށާއި، އެނޫންވެސް ހިދުމަތްތަކަށް އަމިއްލަ ޖީބުން ބޮޑު ހޭދައެއްކުރަންޖެހޭކަމަށް އެފަރާތްތަކުން ފާހަގަކުރެއެވެ.