2026 ވަނަ އަހަރު ޒުވާން ޚަޠީބުންގެ އަދަދު 1000 އަށް ވުރެ މަތިވާނެ ކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. 

ވަޒީރު މިހެން ވިދާޅުވެފައިވަނީ އެކްސްގައި އިއްޔެ ކުރެއްވި ޓްވީޓެއްގައެވެ. މި ޓްވީޓުގައި މި އަހަރަުގެ ތެރޭގައި އެ ވުޒާރާއިން ކަނޑައަޅައިފައިވާ ލަނޑުދަނޑިތަކަށްވެސް ވަޒީރު ވަނީ އަލި އަޅުވާލާފައެވެ.

އެގޮތުން 2026 ވަނަ އަހަރު ޒުވާން އިމާމުންނާއި ޒުވާން ޚަޠީބުންނާއި ޙާފިޒުންގެ ޤައުމީ މަހާސިންތާ ބޭއްވިގެންދާނެކަމަށާއި، އިސްލާމީ ވުޒާރާއާއި ވުޒާރާގެ ދަށުން ހިނގާ މުއައްސަސާތަކުގެ 10 އަހަރުގެ އިސްތިރާޖީ ޕްލޭން އެކުލަވައިލެވިގެންދާނެކަމަށާއި، ރައީސް އިޢުލާންކުރައްވާފައިވާ ޤުރުއާނަށް ޚާއްޞަ ވަޤުފު ބިލްޑިންގ މަޝްރޫޢު އަމަލީ ގޮތުން ފެށިގެންދާނެކަމަށް ވަޒީރު ވިދާޅުވިއެވެ. 

މީގެ އިތުރުން ހުޅުމާލެ ފޭސް 1/2 ގައި 5 ދާއިމީ މިސްކިތް ހުޅުވި، އިތުރު 4 މިސްކިތެއްގެ މަޝްރޫޢު ފެށި، ރާއްޖޭގެ އެކި ސަރަޙައްދުތަކުގައި ގިނަ މިސްކިތްތަކާއި ސެންޓަރުތަކާއި ވަޤުފު މަޝްރޫޢުތަކުގެ މަސައްކަތް ކުރިއަށްދާނެ ކަމާއި  ޒަކާތު ފަންޑާއި ވަޤުފު ފަންޑުގެ އިންވެސްޓްމަންޓްތައް އިތުރުވެ، އަލަށް އެކުލަވާލެވުނު ޒަކާތު ޤާނޫނަށް ޢަމަލުކުރެވިގެންދާނެކަމަށާއި، ޒަކާރު ބެނެފިޝަރީ ކާޑު ފަޤީރުންގެ ދަފްތަރުގައި ހިމެނޭ ފަރާތްތަކަށް ފޯރުކޮށްދީ، އިސްލާމީ ޙަޟާރަތުގެ އަސާސްތައް ވަރުގަދަކުރެވިގެންދާނެކަމަށް ވެސް މި ޓްވީޓުގައި ވަޒީރު ވިދާޅުވިއެވެ.

އަދި 2026 ގައި  ހާފިޒުން އުފެއްދުމުގެ މަޝްރޫޢު ފުޅާކުރެވި، ރާއްޖޭގެ ޙާފިޒުންގެ އަދަދު 300 އިން މަތިވެގެންދާނެކަމަށާއި، ގިނަ ޢަދަދެއްގެ އިލްމީ ރިފަރެންސް ފޮތްތަކުގެ ދިވެހިތަރުޖަމާ ނެރެވި، ޤުރުއާން މަރުކަޒުގެ ގިނަ ގޮފިތައް ހުޅުވާ، ރައީސް ޑރ މުއިއްޒުގެ މެނިފެސްޓޯގައި ހިމެނޭ އިސްލާމީ ވައުދުތަކަށް އިތުރު ފުރިހަމަކަންލިބިގެންދާނެ އަހަރެއްކަމަށްވެސް ވަޒީރު ވިދާޅުވިއެވެ. 

އިސްލާމީ ކަންތައްތަކާއިި ބެހޭ ވުޒާރާއިން މިހާރު ވަނީ 2026 ވަނަ އަހަރުގެ އެކްޝަން ޕްލޭން އެކުލަވާލާ އާއްމު ކޮށްފައެވެ. މި އެކްޝަން ޕްލޭންގައި އެ ވުޒާރާގެ މިއަހަރުގެ މުހިންމު ލަނޑުތަނޑިތައް ތަފްސީލުކޮށް ހިމަނާފާއިވެއެެވެ.