އަހަރުގެ ފުރަތަމަ އަމާޒަކަށް ވާންވީ، ލޯކަލް ކައުންސިލް އިންތިހާބުން ސަރުކާރު ބަލިކުރަން: ޝާހިދު
އާ އަހަރުގެ ފުރަތަމަ އަމާޒަކަށް ވާންވީ ކުރިއަށްއޮތް ލޯކަލް ކައުންސިލް އިންތިހާބުން ވެރިކަން ކުރާ ޕީއެންސީ ބަލިކުރަންކަމަށް އިދިކޮޅު އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
އާ އަހަރުގެ މުނާށަބަތުގައި ކުރީގެ ފޮރިން މިނިސްޓަރިކަންވެސް ކުރެއްވި ޝާހިދު، މީސްމީޑިއާގައި އާއްމުކުރެއްވި ވީޑިއޯ މެސެޖެއްގައި ވިދާޅުވީ، އިންތިހާބުގައި ދޮގާއި، މަކަރާއި ހީލަތާއި ކޮރަޕްޝަނަށް ފުރުސަތު ނުދޭނަމޭ ބުނެ، ޕީއެންސީ ސަރުކާރަށް ބޮޑުކޮށް ނޫނެކޭ ބުނެ، ޕީއެންސީ ސަރުކާރު ބަލިކުރުމަށް އަޅާ ފުރަތަމަ ފިޔަވަޅު އަޅާ އަހަރަށް ހަދަންޖެހޭކަމަށެވެ.
ޝާހިދު ވިދާޅުވީ މި އަހަރަކީ ރައްޔިތުންނާ އަނެއްކާވެސް ބައްދަލުކުރާ ރަނުގެ ފުރުސަތެއްކަމަށާއި، މިއީ މިސަރުކާރުން އަވަދިކޮށްލި ދިވެހި އިޤްތިޞާދު ނަގާ ކޮޅަށްޖެހުމަށް ޢަޒުމު އާކުރާންވީ ވަގުތުކަމަށެވެ. އެގޮތުން މިއީ ތަދުމަޑުކަން އާންމުކޮށް، ދިވެހި ރައްޔިތުން ބިކަކޮށް ޙާލުގަ ޖެއްސުމަށް މި ސަރުކާރުން ތަންފީޒު ކުރަމުންދާ ނޭއްގާނީ ސިޔާސަތުތަކަށް ފާޅުގަ ނޫނެކޭ ބުނަންވީ ވަގުތުކަމަށް ޝާހިދު ވިދާޅުވިއެވެ.
އަދި މިއީ ހައްގުތަށް ކަށަވަރުކުރުމަށް ތެދުވަންވީ ވަގުތުކަމަށާއި، މިއީ ޑިމޮކްރަސީ އުވާލިޔަ ނުދިނުމަށް ނުކުންނަންވީ ވަގުތުކަމަށެވެ. ހަމައެއެއާއެކު، މިއީ ދިވެހި ގައުމުގެ ދިފާޢުގައި ބަހާއި ޢަމަލުން ސާބިތުވާންވީ ވަގުތުކަމަށްވެސް ޝާހިދު ވިދާޅުވިއެވެ.
ޝާހިދު ވިދާޅުވީ މިދިޔަ އަހަރު ފާހަގަކުރެވުނީ ދިވެހި ތާރީޚުވެސްދެކެފައި ނުވާފަދަ ކޮރަޕްޝަންގެ ބޮޑެތި ޢަމަލުތައް ސަރުކާރުންހިންގި އަހަރެއްގެ ގޮތުގައިކަމަށާއި، އެގޮތުން ޤާނޫނުތައް ބަދަލުކޮށް، އާންމުކޮށް އިޢުލާން ކުރުމަކާ ނުލާ، ސަރުކާރުގެ ވެރިންގެ މެދުގައި 2.7 ބިލިއަން ރުފިޔާގެ ޕްރޮޖެކްޓްތައް ބަހާލިކަން ފާހަގަކުރެއްވިއެވެ. މީގެ އިތުރުން ދައުލަތުގެ ކުންފުނިތަކުން ރައްޔިތުންގެ މުދަލަށް ޚިޔާނާތްތެރިވުން ސަރުކާރުގެ އާއްމުކަމަކަށް ވެއްޖެކަން ފާހަގަކުރައްވަމުން ޝާހިދު ވިދާޅުވީ ޤާނޫނު އަސާސީން ކަށަވަރު ކޮށްދިން ޢަދުލު އިންސާފުގެނިޒާމަށް އޮތް އިތުބާރު ކޯޓުތަކަށް ނުފޫޒު ފޯރުވައިގެން މިސަރުކާރުން ނަގާލާފައިވާކަމަށެވެ.
ޤާނޫނުއަސާސީއަށް ޣައިރު ގާނޫނީ ބަދަލުތައް ގެނެސް، ނުޙައްގުން ފަނޑިޔާރުން މަޤާމުން ވަކިކޮށް، ރައްޔިތުންގެ މަޖިލިހުގެމެމްބަރުން އަޅުވެތިކޮށް، މިނިވަން މުވައްސަސާތަކުގެ އިސް މަޤާމްތަކަށް ސިޔާސީ އެކްޓިވިސްޓުން އައްޔަންކޮށް، ދިވެހި ދަޢުލަތުގެ ޑިމޮކްރަސީގެ އެންމެހާ އަސާސްތައް ޕީ.އެން.ސީގެ ސަރުކާރުން ނެތިކޮށްލާފައިވާކަމަށް ވިދާޅުވެ ޝާހިދު ވަނީ ސަރުކާރަށް ވަރަށްބޮޑަށް ފާޑުވިދާޅުވެފައެވެ. މީގެ އިތުރުން ނޫސްވެރިކަން ހިސޯރުކޮށް މިނިވަން މީޑިޔާގެ ފުރުސަތު ހަނިކޮށްފައިވާކަންވެސް ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
