ނައިޖީރިއާގެ ނައިޖާ ސްޓޭޓްގެ ލަޕާއީގައި ކުޑަ ވިޔަފާރިއެއް ކުރާ އަންހެނެއްގެ ބޭންކު އެކައުންޓަށް އޮޅިގެން ޖަމާވި 330 މިލިއަން ނައިރާ (ގާތްގަނޑަކަށް 228,000 ޑޮލަރު) އަނބުރާ ރައްދުކޮށް، ތެދުވެރިކަމުގެ ނަމޫނާ ދައްކައިފިއެވެ.

އައިޝާ އިސާ ޔެލްވާ ނަމަކަށް ކިޔާ މި އަންހެން މީހާއަށް އޭނާގެ ފަސްޓް ބޭންކް އެކައުންޓަށް މިހާ ގިނަ އަދަދެއްގެ ފައިސާ ޖަމާވެފައި ހުރިކަން އެނގުނީ، މިދިޔަ ހޯމަ ދުވަހު (29 ޑިސެމްބަރު 2025) ގެ މެންދުރުފަހު 3:49 ހާއިރު އޭނާގެ އެކައުންޓް ބެލެންސް ޗެކްކުރި ވަގުތުއެވެ.

އައިޝާ ބުނި ގޮތުގައި އޭނާ އެކައުންޓް ޗެކްކުރީ، އޭނާގެ ވިޔަފާރި ކުރިއެރުވުމަށް މީގެ ކުރިން ނަގާފައިވާ ލޯނުތަކަކާ ގުޅިގެން، ބޭންކުން ތަކުރާރުކޮށް އެކައުންޓުން ފައިސާ ކަނޑަމުންދާތީ އެކަމުގެ ޝަކުވާ ހުށަހެޅުމަށްފަހު އެ މައްސަލަ ހައްލުވެފައިވޭތޯ ބެލުމަށެވެ. ނަމަވެސް އެކައުންޓް ބަލައިލިއިރު، އޭނާގެ މުޅި އުމުރުގައިވެސް އަތްނުލާހާ ގިނަ އަދަދެއްގެ ފައިސާ އެކައުންޓުގައި ހުރުމުން އޭނާ އަށް ލިބުނީ ބޮޑު ސިހުމެކެވެ.

މި ފައިސާ ޖަމާވިކަމުގެ އެއްވެސް މެސެޖެއް ނުވަތަ އެއީ ކޮން ފަރާތަކުން ޖަމާކުރި ފައިސާއެއްކަން އެނގޭނެ އެއްވެސް މަޢުލޫމާތެއް ފެންނާކަށް ނެތެވެ.

"އެއީ ބޭންކުގެ ޓެކްނިކަލް އެރޯ އެއްތޯ ޔަގީންކުރުމަށްޓަކައި އަހަރެން އެ އެކައުންޓުން އެއް މިލިއަން ނައިރާގެ މުއާމަލާތެއް ކުރިން. އެކަމަކުވެސް އެއްވެސް އެލާޓެއް ނައުމުން އަހަރެން މާ ބޮޑަށް ކަންބޮޑުވެ ހާސްވި،" ލަޕާއީ ޓީވީއަށް ދިން އިންޓަވިއުއެއްގައި އައިޝާ ބުންޏެވެ.

އެ ރޭ ހިމޭނުން ހުރުމަށްފަހު، އަންގާރަ ދުވަހު ހެނދުނު އައިޝާ ވަނީ އޭނާގެ ވަކީލަކާއެކު ފަސްޓް ބޭންކުގެ ލަޕާއީ ބްރާންޗަށް ގޮސް އެކަން ރިޕޯޓްކޮށްފައެވެ.

ބޭންކުގެ ބްރާންޗް މެނޭޖަރު ވަނީ އައިޝާގެ ތެދުވެރިކަމަށް ތައުރީފުކޮށް، އެއީ ސިސްޓަމަށް ދިމާވި މައްސަލައަކުން ވީ ކަމެއްކަން ކަށަވަރުކޮށްދީފައެވެ. އަދި ބޭންކުން ވަނީ ވަގުތުން އެ މުއާމަލާތް ރިވާސްކޮށް، ފައިސާ އަނބުރާ ގެންގޮސްފައެވެ.

އައިޝާގެ މި އަމަލާ ގުޅިގެން އާންމުންގެ ބައެއް މީހުން އެ ފައިސާ ބޭނުންނުކޮށް އަނބުރާ ދިނީ ކީއްވެގެންތޯ ސުވާލު ކުރުމުން، އޭނާ ބުނީ އޭނާގެ ނިންމުމާ މެދު ވަރަށް ބޮޑަށް ހިތްހަމަޖެހޭ ކަމަށެވެ.

"ފައިސާ އަނބުރާ ދެވުމުން ވަރަށް އުފާވޭ. އަހަރެން މިއީ މައެއް. އަހަރެންގެ ދަރިންގެ މުސްތަގުބަލަކީ އަހަންނަށް އެންމެ މުހިންމު އެއްޗަކީ. މާލީ ގޮތުން ކިތަންމެ ދަތިތަކެއް ހުރި ނަމަވެސް، އަހަރެންގެ އަމިއްލަ އެއްޗެއް ނޫން އެއްޗެއްގައި ހިފާކަށް ބޭނުމެއް ނޫން،" އައިޝާ ބުންޏެވެ.

މި ހާދިސާއާ ގުޅިގެން ބޭންކުން ވަނީ އައިޝާއަށް އެއްވެސް ގާނޫނީ ޒިންމާއެއް އުފުލަން ނުޖެހޭނެ ކަމުގެ ޔަގީންކަން ދީފައެވެ.

މިއަދުގެ ދުނިޔޭގައި މާލީ ދަތިތަކުގެ ސަބަބުން ގިނަ ބަޔަކު ނުބައި މަގުތަކުން ފައިސާ ހޯދަން މަސައްކަތް ކުރަމުންދާ ދަނޑިވަޅެއްގައި، އައިޝާ ދެއްކި މި ތެދުވެރިކަމުގެ ސަބަބުން ގިނަ ބައެއްގެ ލޯބި ވަނީ އޭނާއަށް ލިބުފައެވެ.