ރާއްޖޭގެ އަމިއްލަ ކޮލެޖެއްކަމަށްވާ އެވިޑުން އަވައްޓެރި ލަންކާގައި ޤަވާއިދާހިލާފަށް ކޯސްތަކެއް ހިންގި މައްސަލައެއް ފެންމަތިވެއްޖެއެވެ.
މިކަމާ ގުޅޭގޮތުން މޯލްޑިވްސް ކޮލިފިކެޝަން އޮތީރިޓީން ނެރުނު ބަޔާނެއްގައި ބުނެފައިވަނީ އެވިޑުން އެ ޕްރޮގްރާމްތައް ލަންކާގައި ހިންގާފައިވަނީ އެ އޮތޯރިޓީގެ އުސޫލްތަކާ ހިލާފަށްކަމަށެވެ. އެގޮތުން އެމް.ކިއު.އޭ އިން އެކްރެޑިޓޭޝަން ދީފައިވާ ޕުރޮގުރާމުތައް ދިވެހިރާއްޖެއިން ބޭރުގައި ހިންގުމާބެހޭ ގަވާއިދާ ހިލާފަށް ޤަވާއިދު ސްރީލަންކާގެ "އެމަޒޯން ކޮލެޖް" އަދި "އަލްޒެޓް ޔުނިވަރސިޓީ" ވަކި ޤައުމެއްކަން ނޭނގޭ އެތަނުގައި ޕްރޮގްރާމްތައް ހިންގައި، ދަރިވަރުންނަށް އެވިޑުން ސަނަދު ދީފައިވާކަމަން އެމްކިއުއޭއިްނ ފާހަގަކުރިއެވެ.
އެމްކިއުއޭއިން ބުނީ މިކަން ފާހަގަކުރެވިފައިވަނީ، އެ ޕުރޮގުރާމުތައް ފުރިހަމަކޮށް ގްރެޖުއޭޓްވެގެން ހޯދާފައިވާ އެވިޑް ކޮލެޖްގެ ސަނަދުތަކުގެ ސައްޙަކަން ކަށަވަރުކުރުމަށް ދަރިވަރުންނާއި، އެކި ޤައުމުތަކުގެ ކޮލިފިކޭޝަންސް އެޖެންސީތަކުންނާއި އަދި އެވިޑް ކޮލެޖުން އެ އޮތޯރިޓީއަށް ޙިއްޞާކޮށްފައިވާ މަޢުލޫމާތުތަކުންނެވެ.
މީގެ އިތުރުން ސްރީލަންކާގެ "ޗެސްޓަރ ކޮލެޖް އޮފް ހަޔަރ އެޑިޔުކޭޝަން" އާއި "އިމްޕީރިއަލް ވިސްޑަމް ގްރެޖުއޭޓް ކެމްޕަސް" އާއި "އިނޮވޭޓަސް ކެމްޕަސް" އާއި "ސިލޯން ކޮލެޖް އޮފް އެޕްލައިޑް ސްޓަޑީޒް" އަދި "ބިޓްވިން ކެމްޕަސް"ގައި އެވިޑް ކޮލެޖްގެ ޕްރޮގްރާމްތައް ސްރީލަންކާގައި ހިންގުމަށް އިޝްތިހާރުކޮށް އިޢުލާންކޮށްފައިވާކަންވެސް އެ އޮތޯރިޓީން ވަނީ ބުނެފައެވެ. އެގޮތުން އެތަންތަނަކީ މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ވޮކޭޝަނަލް އެޑިޔުކޭޝަން" ގައި މަތީ ތަޢުލީމު ދިނުމަށް ރަޖިސްޓަރީކޮށްފައިވާ ތަންތަން ނޫންކަމަށްވެސް އެ އޮތޯރިޓީން ވަނީ ބުނެފައެވެ.
އެމްކިއުއޭއިން ބުނީ އެކްރެޑިޓޭޝަން ދީފައިވާ ޕްރޮގްރާމްތައް އެ އެކްރެޑިޓޭޝަން ދިން ގޮތާ ޚިލާފަށް ނުހިންގުމަށް 2024 ވަނަ އަހަރުގެ އޮަގަސްޓްމަހުގެ 29 ވަނަ ދުވަހުން ފެށިގެން ތަކުރާރުކޮށް އެވިޑް ކޮލެޖަށް އަންގައި ނަސޭހަތްތެރިވަމުން އަންނަ ކަމަށެވެ. އެހެން ނަމަވެސް މިއަދާ ހަމަޔަށް އާއިއިރުވެސް އެވިޑް ކޮލެޖުން ދީފައިވާ ނަސޭހަތާ ހިލާފަށް ކަންކަން ކުރަމުން އައިސްފައިވާކަން ވަނީ ފާހަގަކޮށްފައެވެ.
އެމްކިއުއޭއިން ބުނީ މިފަދަ އަމަލުތަކުގެ ސަބަބުން ، ބައިނަލްއަޤްވާމީ ފެންވަރުގައި ދިވެހިރާއްޖޭގެ މަތީ ތަޢުލީމާއި ތަމްރީނު ފޯރުކޮށްދޭ މުއައްސަސާތަކާ މެދު ޤާއިމްވެފައިވާ އިތުބާރާއި ޔަޤީންކަމަށް އިޢާދަނުކުރެވޭފަދަ ގެއްލުންތައް ލިބޭނޭކަމަށެވެ. އަދި މިފަދަ ކަންކަމުގެ ސަބަބުން ދޭދޭ ގައުމުތަކުގެ މެދުގައި ދެމިއޮންނަ ގާތް އެކުވެރި ގުޅުމަށް ހީނަރުކަން އަންނާނެކަން ވަނީ ފާހަގަކޮށްފައެވެ.
އެމްކިއުއޭއިން ވަނީ މަތީ ތަޢުލީމުދޭ މަރުކަޒުތަކަށް އެކްރެޑިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި އެ އޮތޯރިޓީގެ ހުއްދަ ނުހޯދާ ނުހިންގުމަށް ހުރިހާ މަރުކަޒުތަކަށް އަންގާފައެވެ. ހަމަ މިއާއެކު އެއޮތޯރިޓީން ވަނީ އެވިޑްކޮލެޖަށް އެފަދަ ކަންކަން ނުކުރުމަށްވެސް ނަސޭހަތްތެރިވެފައެވެ.
Advertisement
This content is created and paid for by advertisers and does not involve Voice Journalists
