ތަޅުމުގައި ކުރާނެ އިތުރު މަސައްކަތެއް ނެތުމުން ބައިގަޑިއިރު ނުވަނީސް މަޖިލީހުގެ ދައުރުން ބޭރުން ބޭއްވި ޖަލްސާ ނިންމާލައިފިއެވެ. 

މަޖިލީހުގެ ދައުރުން ބޭރުން މިއަދު ބޭއްވީ ޖަލްސާއަށް ހާޒިރުވީ 93 މެންބަރުންގެ ތެރެއިން 39 މެންބަރުންނެވެ. ޖަލްސާގެ އެޖެންޑާގައި އޮތީ ހިޔުމަންރައިޓްސް ކޮމިޝަންގެ ރައީސް ކަމަށް އެކޮމިޝަންގެ މެންބަރު ޑރ ޢާއިޝަތު ރަމީލާ އައްޔަނު ކުރުމާމެދު ކޮމިޓީން އެކުލަވާލި ރިޕޯޓް ހުށަހަޅައި އެއަށް ބަހުސްކޮށް ވޯޓަށް އެހުމެވެ. 

ރިޕޯޓް ހުށަހެޅުމުން އެއާ ގުޅިގެން ވާހަކަދެއްކެވީ ދިއްގަރު ދާއިރާގެ މެންބަރުން އަބްދުالله ނާޒިމް އެކަންޏެވެ. އިތުރު މެންބަރެއް ވާހަކަދައްކަން އެދިފައި ނެތުމުން މަޖިލީހުގެ ރައީސް އަބްދުއްރަޙީމް އަބްދުالله ވަނީ އެ މައްސަލައަށް ވޯޓަށް އެހުމަށްފަހު ޖަލްސާ ނިންމަވާލައްވާފައެެވެ. 

ޖަލްސާ ނިންމާލެވިކަން އިއުލާން ކުރެއްވުމުގެ ކުރީ އަބްދުއްރަޙީމް ވަނީ ދައުރުން ބޭރުން ބާއްވަމުންދާ ޖަލްސާ ތަކަކީ ވަކި މަސައްކަތްތަކެއް ކުރުމަށް މަޖިލީހުގެ 31 މެންބަރުން ސޮއި ކުރައްވައި ހުށަހެޅުއްވި ހުށަހެޅުއްވުމާ ގުޅިގެން ބާއްވާ ޖަލްސާ ތަކެއް ކަމަށް ވިދާޅުވެފައެވެ.

”އެ ހުށަހެޅުމުގައި މަސައްކަތް ތަކުގެ ތެރެއިން މިވަގުތަށް ނިންމެން ހުރި މަސައްކަތް މި ނިމުނީ. އެހެން ހުރިހާ މަސައްކަތެއް އޮތީ ކޮމިޓީ މަރުހަލާގައި. އެހެންވީމާ އިތުރު މަސައްކަތެއް ކުރާކަށް ނެތް އެޖެންޑާގައެއް. އެކަމަކު މި ދަންނަވަނީ މަޖިލީހުގެ ޖަލްސާތަކުގައި ކުރާނެ މަސައްކަތް ނެތް ވާހަކައެއްނޫން.  މިއީ އާއްމު ޖަލްސާއެއް ނޫން. މިއީ ވަކި ކަމެއް ކުރުމަށް އެދި ހުށަހެޅުމުން ބޭއްވި ޖަލްސާއެއް.“ އަބްދުއްރަޙީމް ވިދާޅުވިއެވެ.