މިދިޔަ އަހަރު ދުވާލެއްގެ މައްޗަށް ރާއްޖެއަށް 6000 އެއްހާ ފަތުރުވެރިން އައިސްފައިވާހަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ. 

އެ ވުޒާރާއިން އާއްމުކޮށްފައިވާ މައުލޫމާތުތަކުގައި ވާގޮތުން 2025 ވަނަ އަހަރު ދުވާލެއްގެ މައްޗަށް ގާތްގަންޑަކަށް 6،155 ފަތުރުވެރިން ރާއްޖެ ޒިޔާރަތްކޮށްފައިވެއެވެ. އެގޮތުން އެއް ދުވަސް ތެރޭ އެންމެ ގިނައިން ރާއްޖެއަށް ފަތުރުވެރިން އައިސްފައިވަނި 2025 ވަނަ އަހަރުގެ ޑިސެންބަރު 28 ވަނަ ދުވަހެވެ. އެ ދުވަހު 9،903 ފަތުރުވެރިން ރާއްޖެ ޒިޔާރަތްކޮށްފައިވެއެވެ. 

މިދިޔަ އަހަރު ދުވާލެއްގެ މައްޗަށް އެންމެ ގިނަ ފަތުރުވެރިން އައިސްފައިވަނީ ފެބުރުއަރި މެހެވެ. އެމަހު ގާތްގަނޑަކަށް 7،646 ފަތުރުވެރިން ކޮންމެ ދުވަހަކުވެސް ރާއްޖެ ޒިޔާރަތްކޮށްފައިވެއެވެ. 

މުޅި އަހަރުގެ ތެރޭގައި 2،246،516 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިއީ ތާރީހުގައިވެސް އަހަރެއްގެ ތެރޭގައި އެންމެ ގިނަ ފަތުރުވެރިން ރާއްޖެ އައި އަހަރެވެ. 

މިދިޔަ އަހަރު ރާއްްޖެއަށް އެންމެ ގިނައިން ފަތުރުވެރިން އައިސްފައިވަނީ ޑިސެންބަރު މަހުއެވެ. އެމަހުގެ ތެރޭގައި 224،455 ފަތުރުވެރިން ރާއްޖެ އައިސަފައިވެއެވެ. މިއި ރާއްޖޭގެ ތާރީހުގައިވެސް އެއް މަސްތެރޭގައި އެންމެ ގިނަ ފަތުރުވެރިން އައި ކަމަށް ރިޕޯޓުކުރެވިފައިވާ މަހެވެ. 

2025 ވަނަ އަހަރު ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޗައިނާއިންނެވެ. އެގޮތުން މިދިޔަ އަހަރު ރާއްޖެ އައި ފަތުރުވެރިންގެ %14.7 އަކީ ޗައިނާއަށް ނިސްބަތްވާ ފަތުރުވެރިންނެވެ. ޗައިނާއާއި ޖެހިގެން އެންމެ ގިނަ ފަތުރުވެރިން އައީ ރަޝީއާއިންނެވެ. އެގައުމުން %12.4 އިންސައްތަ ފަތުރުވެރިން އަދި އިނގިރޭސިވިލާތުން %9.0 ފަތުރުވެރިން ރާއްޖެ ޒިޔާރަތްކުރިއެވެ. އެއާ ޖެހިގެން އެންމެ ގިނަ ފަތުރުވެރިން އައިސްފައިވަނީ ޖަރުމަނުންނެވެ. އެއީ %7.5 އެވެ. އިޓަލީ ވިލާތުން މިދިޔަ އަހަރު ރާއްޖެ އައިސްފައިވަނީ %6.8 ފަތުރުވެރިންނެވެ. 

މިދިޔަ އަހަރަކީ ދިވެހިރާއްޖޭގެ ފަތުރުވެރިކަމުގައި ތާރިހީ އަހަރެކެވެ. އެގޮތުން އެ އަހަރުގެ ތެރޭގައި 2 މިލިއަނަށް ވުރެ ގިނަ ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. އަދި 2024 ވަނަ އަހަރާއި އަލާބަލާއިރު 2025 ވަނަ އަހަރު ފަތުރުވެރިކަމުގެ ސިނާއަތަށް %9.8 އަށް ވުރެ ބޮޑު ކުރިއެރުމެއް ލިބިފައިވާކަމަށް ފަތުރުވެރިކަމާއި ބެހޭ ވުޒާރާއިން މައުލޫމާތުދެއެވެ. 

ސަރުކާރުން ބުނިގޮތުންގައި އައު ޓާމިނަލްއާއިއެކު ކުރިއަށް އޮތް އަހަރުތަކުގައި އަދި ރާއްޖެއަށް އަހަރެއްގެ މައްޗަށް 2 މިލިއަންނަށް ވުރެ ގިނަ ފަތުރުވެރިން ޒިޔާރަތްކުރާނެއެވެ.