ލަންޑަނުގައި ފަލަސްތީނު ދައުލަތުގެ އެމްބަސީ ރަސްމީކޮށް ހުޅުވައިފިއެވެ.

ހުޅަނގު ލަންޑަނުގެ ހެމާސްމިތުގައި ހޯމަ ދުވަހު ބޭއްވި އިފްތިތާހީ ރަސްމިއްޔާތުގައި ވާހަކަދައްކަވަމުން، އިނގިރޭސިވިލާތަށް ކަނޑައަޅުއްވާފައި ހުންނަވާ ފަލަސްތީނުގެ ސަފީރު ޙުސާމް ޒޮމްލޮޓް ވިދާޅުވީ، މި އެމްބަސީ ގާއިމުކުރެވުމަކީ އިނގިރޭސިވިލާތާއި ފަލަސްތީނުގެ ގުޅުމުގައި ކުރިއަށް އެޅުނު ވަރަށް މުހިންމު އަދި ތާރީޚީ ފިޔަވަޅެއް ކަމަށެވެ.

މި އެމްބަސީ ހުޅުވާފައި ވަނީ، ޣައްޒާގައި އިސްރާއީލުން ހިންގަމުންދާ ހަނގުރާމައިގައި އެތައް ހާސް ފަލަސްތީނު ރައްޔިތުންނެއް ޝަހީދުވަމުންދާ ދަނޑިވަޅެއްގައި، މިދިޔަ ސެޕްޓެމްބަރު މަހު އިނގިރޭސިވިލާތުން ފަލަސްތީނަކީ މިނިވަން ދައުލަތެއްގެ ގޮތުގައި ރަސްމީކޮށް ބަލައިގަތުމާ ގުޅިގެންނެވެ.

އިނގިރޭސިވިލާތަށް ކަނޑައަޅުއްވާފައި ހުންނަވާ ފަލަސްތީނުގެ ސަފީރު ޙުސާމް ޒޮމްލޮޓް-- ފޮޓޯ/ސްކައިނިއުސް

ޒޮމްލޮޓް ވިދާޅުވީ ގައްޒާ އާއި، އިރުމަތީ ގުދުސް ހިމެނޭހެން އިސްތިއުމާރުކޮށްފައިވާ ހުޅަނގު އައްސޭރީގެ ރައްޔިތުންނާއި، ރެފިއުޖީ ކޭމްޕުތަކާއި ދުނިޔޭގެ އެކި ކަންކޮޅުތަކުގައި ދިރިއުޅެމުންދާ ފަލަސްތީނުގެ ރައްޔިތުންތަކަށް ވެސް މި އެމްބަސީއަކީ އެމީހުންގެ އަމިއްލަވަންތަކަން ހާމަކޮށްދޭނެ ރަމްޒެއްކަމަށެވެ. އަދި ގަރުނަކަށްވުރެ ގިނަ ދުވަހު އަމިއްލަ މިނިވަންކަމާއި އިޚްތިޔާރުން މަހުރޫމްކޮށްފައިވާ ބަޔަކަށް މިއީ ތާރީޚީ ގޮތުން ފާހަގަކޮށްލެވޭ ވަރަށް މުހިންމު ވަގުތެއްކަމަށެވެ. 

ލަންޑަންގެ އައު އެމްބަސީގެ ހަނދާނީ ބިނާ އިފްތިތާހުކޮށްދެއްވުމަށްފަހު، ޑިޕްލޮމެޓިކް ކޯޕްސްގެ މާޝަލް އެލިސްޓަރ ހެރިސަން ވެސް ވިދާޅުވީ، މިއީ ފަލަސްތީނަށް ލިބުނު ތާރީޚީ ކާމިޔާބީއެއް ކަމަށެވެ. އަދި މިއީ ދެ ގައުމުގެ ދެމެދުގައި އޮތް ގުޅުމުގެ ވަރަށް މުހިންމު ދަނޑިވަޅެއް ކަމަށާއި، މިއީ ދެ ގައުމުގެ ގުޅުން އައު ހަރުފަތަކަށް ގެންދިއުމަށް އެޅުނު ފުރަތަމަ ފިޔަވަޅު ކަމުގައި އޭނާ ފާހަގަކުރެއްވިއެވެ.

މި ރަސްމިއްޔާތުގައި ގައްޒާގައި ހިންގަމުންދާ ގަތުލުއާންމުން ސަލާމަތްވި އުމުރުން 14 އަހަރުގެ ކުޑަކުއްޖެއްކަމަށްވާ އުބައިދާ ބައިވެރިވެފައިވެއެވެ. އޭނާ ވަނީ މި ހަނގުރާމާއިގެ ވާހަކަތައް ނުހަނު އަސަރާއިއެކު ކިޔަިދީފައެވެ. އުބައިދާ ބުނި ގޮތުގައި، އެ ހަނގުރާމައިގެ މައިދާނުގައި ލިބުނު އެކިވަރުގެ ޒަޚަމްތައް އޭނާގެ ހަށިގަނޑުގައި އަދިވެސް ފެންނަން އެބަ ހުއްޓެވެ. އަދި އޭނާގެ އާއިލާގެ ބައެއް މީހުން އިނގިރޭސިވިލާތުގައި ތިބި ނަމަވެސް، ލޯބިވާ ބައްޕަ އަދިވެސް ހުރީ ބިރުވެރިކަމުން ފުރިގެންވާ ގައްޒާގެ ބިމުގައި ކަމަށްވުމުން އެކަމާއި އިންތިހާއަށް ދެރަވެ ބިރުގަންނަކަން އޭނާ ވަނީ ހިއްސާކޮށްފައެވެ. 

14 އަހަރުގެ ކުޑަކުއްޖެއްކަމަށްވާ އުބައިދާ

އުބައިދާ ބުނި ގޮތުގައި އޭނާގެ އެންމެ ބޮޑު އެއް އުންމީދަކީ ކޮންމެވެސް ދުވަހަކުން ސަފީރަކަށް ވުމެވެ. އެގޮތުން އިނގިރޭސިވިލާތަށް ކަނޑައަޅާ ސަފީރަކަށް ވެ، ފަލަސްތީނުގެ ރައްޔިތުންނަށް އެހީތެރިވެ، އެމީހުންގެ އަޑު މުޅި ދުނިޔެއަށް އިއްވުމަކީ އޭނާގެ އެންމެ ބޮޑު ހުވަފެނެވެ.

އުބައިދާ އިތުރަށް ބުނީ މި އެންބަސީގެ ސަބަބުން އޭނާ ފަދަ ކުޑަކުދިންނަށް ދިރިއުޅުމާއި، އުގެނުމުގެ ފުރުސަތު ފަހިވެ، ބިރުވެރިކަމެއް ނެތް މާހައުލެއްގައި ބޮޑުވުމުގެ ހުވަފެން ދެކުމުގެ ފުރުސަތު ލިބިގެންދާނެކަމަށެވެ. އަދި މިއީ އާއިލާތަކަށް ރައްކާތެރިކަން ލިބި، ޣައްޒާއާއި، ގުދުސްއާއި، ހުޅަނގު އައްސޭރީގެ އިތުރުން މުޅި ފަލަސްތީނުގެ ހުރިހާ ކުޑަކުދިންނަށްވެސް، އިންސާނީ ކަރާމާތާއި އުންމީދާއެކު ދިރިއުޅުމުގެ ފުރުސަތު ލިބިގެންދާނެ މާހައުލެއްކަމަށެވެ. 

އިނގިރޭސިވިލާތުން ފަލަސްތީނަކީ ވަކި ދައުލަތެއްގެ ގޮތުގައި ބަލައިގަތީ 1967 ވަނަ އަހަރެވެ. ހަމައެއާއެކު، ދައުލަތަކަށް ލިބިދޭންޖެހޭ އެންމެހައި ގާނޫނީ ހައްގުތަކާއި ޒިންމާތައް ފަލަސްތީނަށް ލިބިގެންވާކަން ވެސް އިނގިރޭސިވިލާތުން ވަނީ ގަބޫލުކޮށްފައެވެ.