އެމެރިކާގެ ރައީސް ޑޮނަލްޑް ޓްރަމްޕް، ގްރީންލޭންޑް އެމެރިކާގެ ބާރުގެ ދަށަށް ގެނައުމަށް، އެކަމާ ގުޅޭގޮތުން މަޝްވަރާކުރަމުންދާ ކަމަށް ވައިޓް ހައުސްއިން ހާމަކޮށްފިއެވެ.
މި މަޝްވަރާތަކުގައި އެ ރަށް ހޯދުމަށް އެމެރިކާގެ އަސްކަރިއްޔާ ބޭނުންކުރުމުގެ ފުރުސަތު އޮތްކަންވެސް ވައިޓް ހައުސްއިން ވަނީ ފާހަގަކޮށްފައެވެ.
ވައިޓް ހައުސްއިން ނެރުނު ބަޔާނެއްގައި ބުނެފައިވަނީ، އާކްޓިކް ސަރަޙައްދުގައި އެމެރިކާގެ ހަތުރުންގެ ނުފޫޒު ކުޑަކުރުމަށްޓަކައި ގްރީންލޭންޑް ހޯދުމަކީ ގައުމީ ސަލާމަތަށް ބަލާއިރު އިސްކަންދޭންޖެހޭ މުހިންމު ކަމެއް ކަމަށް ޓްރަމްޕް ދެކޭ ކަމަށެވެ. އަދި މި ޚާރިޖީ ސިޔާސަތު ކާމިޔާބު ކުރުމަށްޓަކައި އެކި ގޮތްގޮތުން މަޝްވަރާ ކުރެވެމުންދާ ކަމަށާއި، ކޮމާންޑަރ-އިން-ޗީފްގެ ހައިސިއްޔަތުން އަސްކަރީ ބާރުގެ ބޭނުންކުރުމަކީވެސް އޮތް އިޚްތިޔާރެއް ކަމަށް އެ ބަޔާނުގައިވެއެވެ.
ގްރީންލޭންޑަކީ އެމެރިކާގެ ބައެއްގެ ގޮތުގައި ވުމަށް އެ ގައުމުން ބޭނުންވާކަން ތަކުރާރުކޮށް ބުނަމުންދާއިރު، ވިލާތުގެ ގައުމުތަކާއި ކެނެޑާއިން ވަނީ ގްރީންލޭންޑަކީ އެތަނުގެ ރައްޔިތުންގެ މިލްކެއް ކަމަށް ބުނެ ޓްރަމްޕްގެ ނިންމުމާ ދެކޮޅަށް ތެދުވެފައެވެ.
އެމެރިކާގެ ގާތް އެކުވެރިއެއް ކަމަށްވާ ޑެންމާކުގެ އަތުން އަސްކަރީ ބާރު ބޭނުންކޮށްގެން ގްރީންލޭންޑް އަތުލައިގަނެފިނަމަ، މިއީ ނޭޓޯގެ އިއްތިޙާދަށް ލިބޭނެ ބޮޑު ސިހުމަކަށް ވެގެންދާނެއެވެ.
ޓްރަމްޕްގެ މި ޝައުގުވެރިކަން އަލުން އުފެދިފައި މިވަނީ، ވެނެޒުއޭލާގެ ރައީސް ނިކޮލަސް މަދޫރޯ އެމެރިކާއިން ހައްޔަރުކުރުމާ ގުޅިގެންނެވެ. އެގޮތުން ޓްރަމްޕް މިހާރު ވަނީ ކިއުބާ އާއި ކޮލަމްބިއާއަށްވެސް ފިއްތުންތައް ކުރަން ފަށާފައެވެ.
އެމެރިކާގެ އިސް އޮފިޝަލަކު ނަން ހާމަނުކުރުމަށް ޝަރުތުކޮށް ރޮއިޓާސްއަށް ބުނީ، ގްރީންލޭންޑް ހޯދުމަށްޓަކައި އެ ރަށް މުޅިން ގަނެލުން ނުވަތަ "ކޮމްޕެކްޓް އޮފް ފްރީ އެސޯސިއޭޝަން" އެއްގެ ދަށުން އެމެރިކާއާ ގުޅާލުމުގެ މަޝްވަރާތައް ކުރެވެމުންދާ ކަމަށެވެ. އަދި ރައީސް ޓްރަމްޕަކީ ވިޔަފާރީގެ މުޢާމަލާތްތަކަށް ލޯބިކުރާ މީހަކަށްވާތީ، ޑިޕްލޮމެޓިކް އުސޫލުން ރަނގަޅު އެއްބަސްވުމަކަށް އާދެވޭތޯ ބެލުމަކީ އޭނާ ފުރަތަމަ އިސްކަންދޭނެ ގޮތް ކަމަށްވެސް އެ އޮފިޝަލް ބުންޏެވެ.
މި ސަރަޙައްދަށް ރަޝިޔާ އާއި ޗައިނާގެ ޝައުގުވެރިކަން އިތުރުވަމުންދާ ދަނޑިވަޅެއްގައި، ގްރީންލޭންޑަކީ އެމެރިކާގެ މަރުކަޒަކަށް ހެދުމަށް ޓްރަމްޕް އެންމެ ފުރަތަމަ ޝައުގުވެރިކަން ފާޅުކުރީ 2019 ވަނަ އަހަރުގައެވެ.
Advertisement
This content is created and paid for by advertisers and does not involve Voice Journalists
