އީރާނުގެ އިޤްތިޞާދީ ހާލަތު ގޯސްވުމާ ގުޅިގެން އެ ޤައުމުގެ އެކި ސަރަޙައްދުތަކުގައި ކުރަމުންދާ މުޒާހަރާތައް ވަރުގަދަވެފައިވަނިކޮށް، މުޅި ޤައުމުން އިންޓަނެޓްގެ ޚިދުމަތް ކަނޑާލާފައިވާ ކަމަށް އިންޓަނެޓް މޮނިޓަރ ކުރާ ބައިނަލްއަޤްވާމީ ޖަމްޢިއްޔާއެއް ކަމަށްވާ 'ނެޓްބްލޮކްސް' އިން ހާމަކޮށްފިއެވެ.
ނެޓްބްލޮކްސް އިން ބުރާސްފަތި ދުވަހު ސޯޝަލް މީޑިއާގައި ބުނެފައިވާ ގޮތުގައި، އީރާނުގެ ސަރުކާރުން އިންޓަނެޓް ކަނޑާލާފައިވަނީ މުޒާހަރާތައް ހުއްޓުވުމަށް އަޅަމުންދާ ހަރުކަށި ފިޔަވަޅުތަކުގެ ތެރެއިންނެވެ. މިއީ މިފަދަ ނާޒުކު ދަނޑިވަޅެއްގައި ރައްޔިތުން މުއާމަލާތް ކުރުމަށް އޮތް ހައްޤަށް ހުރަސް އެޅުމުގެ ގޮތުން ކުރި ކަމެއް ކަމަށް އެ ޖަމްޢިއްޔާއިން ފާހަގަކޮށްފައިވެއެވެ.
މިދިޔަ ޑިސެމްބަރު މަހުގެ ފަހުކޮޅުން ފެށިގެން އީރާނުގެ ރައްޔިތުން މަގުތަކަށް ނުކުމެ މުޒާހަރާ ކުރަމުންދަނީ، ތަކެތީގެ އަގު އިންތިހާއަށް އުފުލުމާއި، އެ ޤައުމުގެ ފައިސާގެ އަގު ދަށްވަމުންދާތީ އެކަމުގެ ކަންބޮޑުވުމުގައެވެ. އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، މި މުޒާހަރާތަކުގައި ސަލާމަތީ ބާރުތަކުގެ މީހުން ހިމެނޭހެން މިހާތަނަށް މަދުވެގެން 21 މީހުން ވަނީ މަރުވެފައެވެ.
އަލްޖަޒީރާގައި ބުނި ގޮތުގައި، ބުރާސްފަތި ދުވަހުގެ ރޭގަނޑު އީރާނުގެ ވެރިރަށުގެ އެކި ސަރަޙައްދުތަކަށް އެތައް ހާސް ބަޔަކު އެއްވެ، ސަރުކާރާ ދެކޮޅަށް އަޑުއުފުލާފައިވެއެވެ. އަދި މުޒާހަރާގެ ބައިވެރިންނާއި ފުލުހުންނާ ދެމެދު ކުރިމަތިލުންތަކެއް ހިނގާފައިވާއިރު، އިޤްތިޞާދީ ދަތިކަމުގެ ސަބަބުން މެދުފަންތީގެ އަދި އާދައިގެ އާއިލާތަކުގެ އިތުބާރު ސަރުކާރަށް ގެއްލިފައިވާކަން ފާހަގަކުރެވެއެވެ.
މި ހަމަނުޖެހުންތަކާ ގުޅިގެން އީރާނުގެ ރައީސް މަސްޢޫދު ޕެޒެޝްކިއަން މުޒާހަރާތައް ކޮންޓްރޯލް ކުރުމުގައި ކެތްތެރިކަން އިސްކުރުމަށް ގޮވާލެއްވި ނަމަވެސް، އެ ޤައުމުގެ އެންމެ މަތީ ލީޑަރު އާޔަތުالله ޢަލީ ޚާމަނާއީ ވަނީ ހަމަނުޖެހުން ހިންގާ މީހުންނަށް ހަރުކަށި އަދަބު ދޭންޖެހޭނެ ކަމަށް ވިދާޅުވެފައެވެ. އަދި އީރާނުގެ އުއްތަމަ ފަނޑިޔާރު ޣުލާމް ހުސައިން މުޙްސިނީ އެޖެއީ ވަނީ، މުޒާހަރާ ކުރާ މީހުން މަސައްކަތް ކުރަމުންދަނީ އެމެރިކާ އާއި އިސްރާއީލު ފަދަ އީރާނުގެ ދުޝްމަނުންގެ ރޭވުމެއްގެ ދަށުން ކަމަށް ތުހުމަތު ކުރައްވާފައެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ އީރާނުގައި އިތުރު މީހުން މަރުވިޔަ ނުދިނުމަށް ގޮވާލައްވައި، ރައްޔިތުންނަށް ޚިޔާލު ފާޅުކުރުމާއި ސުލްހަވެރިކަމާއެކު އެއްވެ އުޅުމުގެ މިނިވަންކަން ދިނުމަށް އީރާނު ސަރުކާރަށް އިލްތިމާސް ކުރައްވާފައެވެ.
މީގެ އިތުރުން، އަމްނެސްޓީ އިންޓަނޭޝަނަލުން ވަނީ އީރާނުގެ ސަލާމަތީ ބާރުތަކުން ހޮސްޕިޓަލްތަކަށް ވަދެ، ޒަޚަމްވެފައިވާ މުޒާހަރާގެ ބައިވެރިން ހައްޔަރުކޮށް، ސިއްހީ ޚިދުމަތްތެރިންނަށް އަނިޔާކުރަމުންދާ ކަމަށް ބުނެ އެކަން ކުށްވެރިކޮށްފައެވެ. އީރާނުގައި މިފަދަ ވަރުގަދަ މުޒާހަރާތަކެއް އެންމެ ފަހުން ފެނިގެންދިޔައީ 2022 ވަނަ އަހަރު މަހްސާ އަމީނީ ފުލުހުންގެ ބެލުމުގެ ދަށުގައި ހުއްޓާ މަރުވުމާ ގުޅިގެންނެވެ.
Advertisement
This content is created and paid for by advertisers and does not involve Voice Journalists
