މާލޭ ސަރަހައްދުގައި މިހާރު އެންމެ ބައިބޯ ތަނަކަށް ހަމަ ގައިމުވެސް ހުޅުމާލެ ދެވަނަ ފިޔަވަހި ވާނެއެވެ. ދެވަނަ ފިޔަވަހީގައި ބިނާކުރި ހިޔާ 16 ޓަވަރާއެކު ފޭސް ދޭއްގެ އާބާދީ އިތުރުވަމުން ދިޔައިރު، ވިނަރެހާއި، އަމިއްލަ ކުންފުނިތަކުގެ ޓަވަރުތަކާއެކު އެތަނުގެ އާބާދީ ވަނީ ވަރަށްބޮޑުތަން އިތުރުވެފައެވެ. އަދި މިފަހުން ފަހިދިރިއުޅުން ކޯޕަރޭޝަނުގެ ޓަވަރުތަކަށް މީހުން ބަދަލުވަމުންދާއިރު، ކުރިއަށްއޮތް ތަނުގައި ފޭސް ދޭއްގެ އާބާދީ ވެގެންދާނީ ރާއްޖޭގައި އާބާދީގެ ގޮތުން ރާއްޖޭގައި އެންމެ ބައިބޯ ސަރަހައްދަށެވެ. ފޭސް ދޭއްގެ އާބާދީ ބޮޑުވަމުންދާއިރު، އެންމެ ބާރުބޮޑުވާ އެއް ސަރަހައްދަކީ ފޭސް ދޭއްގެ ތަވަރު 12 އާ ދިމާލަށް އޮންނަ އަތިރިމަތީ ސަރަހައްދެވެ.

ހުޅުމާލޭ ފޭސް ދޭއްގެ އަތިރިމަތި އެ ސަރަހައްދަކީ ކޮންމެ ދުވަހެއްގެ ހެނދުނު އަދި ހާއްސަގޮތެއްގައި ހަވީރު ގަޑީގައި ގިނަ އާއިލާތަކެއް ޒިޔާަރަތްކުރާ ތަނެކެވެ. އެޗްޑީސީން ހަޓްތަކެއް ހެދިފަހުން އެތަނަކީ މިހާރު ކޮންމެ ދުވަހެއްގެ ހަވީރު ގިނަ ބަޔަކު ވަގުތުހޭދަކުރުމަށް ޖަމާވާ ސަރަހައްދެކެވެ. ފޭސް ދޭއްގެ އިތުރުން ފޭސް އެކެއް އަދި މާލޭގައި ދިރިއުޅެމުންދާ ބައެއް އާއިލާތަކުންވެސް ހަވީރުގަޑީގައި އެތަނަށް ސައެއް ބޯލައި އާއިލާއާ އެކު އުފާވެރި ވަގުތުތަކެއް ހޭދަކޮށްލުމަށް ޒިޔާރަތްކުރާކަން ފާހަގަކުރެވެއެވެ.

އިއްޔެ ގިނަ ބައެއްގެ ޝަކުވާއަކަށްވީ މިފަހުން އެތަނުގައި ކުރިއަށްދިޔަ ނައިޓްމާކެޓް އިއްޔެ ރޭ ނިންމާލިއިރު، ވިޔަފާރިކުރާ ފަރާތްތަކުން މުޅިތަން ގޮނޑުކޮށްފައި ދިޔަ މައްސަލައެވެ. ހަވީރު ވީ އިރުވެސް މުޅީތަނުގައި އޮތީ ހުސް ކުންޏެވެ. ނައިޓްމާކެޓްތަކުގެ ސްޓޯލްތައް ހެދުމަށް ބޭނުންކުރި މޮހޮރުޖަހާފައި ހުރި ފިލާތަކާއި، އެކި ކަހަލަ ކުނިބުނިތަކުން މުޅި ސަރަހައްދު އޮރީ ފުރިފައެވެ. ވިޔަފާރީގެ އުސޫލުން އެތަނުގައި ހަޓްތައް ނަގައިގެން ވިޔަފާރިކުރަމުންދިޔަ ފަރާތްތަކުންވެސް ވަނީ އެތަން ގޮނޑުކޮށްފައި އޮތުމުން އެ ޝަކުވާ ކޮށްފައެވެ. މީގެ އިތުރުން އެތަނަށް ހަވީރު ގަޑީގައި ކުދިވެރިން ގޮވައިގެން ދިޔަ މީހުންވެސް ވަނީ އެތަން ގޮނޑުކޮށްފައި އޮތުމުން އެކަމުގެ ޝަކުވާކޮށްފައެވެ.

ފޭސް ދޭއްގެ އަތިރިމައްޗަށް އުކާލާފައިހުރި ބައެއް ތަކެތި... ފޮޓޯ: ވޮއިސް

ވޮއިސްއާ މައުލޫމާތު ހިއްސާކުރި ބައެއް މީހުން ވަނީ މީގެ ކުރިންވެސް އެތަނުގައި ބާޒާރު ބާއްވާއިރު، ބައެއް މީހުންގެ ސަބަބުން ތަން ގޮނޑުވާ ވާހަކަ ފާހަގަކޮށްފައެވެ.

ވޮއިސްއާ ވާހަކަދެއްކި ބައެއް މީހުން ވަނީ މިފަދަ ކަންކަން މިއަށްވުރެ ރަނގަޅު އިންތިޒާމަކުން ކުރިއަށްގެންގޮސް ނިންމާލަންޖެހޭކަން ފާހަގަކޮށްފައެވެ. އެގޮތުން ކުނި މެނޭޖްކުރުމުގެ ކަންކަން އަތިރިމަތި ބޭނުންކުރަމުން އަންނަ މީހުންނަށް އުނދަގޫ ނުވާނޭހެން އިންތިޒާމްކުރަން ޖެހޭކަން ވަނީ ފާހަގަކޮށްފައެވެ. ފޭސް ދޭއްގެ އަތިރިމަތީ ސަރަހައްދު އިއްޔެ ގޮނޑުކޮށްފައި އޮތްއިރު، އިއްޔެ އެތަން ސާފްކުރުމުގެ މަސައްކަތުގައި އެޗްޑީސީގެ މުއައްޒަފުން ވަނީ ހަރަކާތްތެރިވެފައެވެ. 

އެޗްޑީސީން ވަނީ ފޭސް ދޭއްގެ އެކި ސަރަހައްދުތަކުގައި ކުނިއަޅާ ޑަސްބިންތައްވެސް ބަހައްޓާފައެވެ. ނަމަވެސް ނައިޓްމާކެޓްގައި ބައިވެރިވި ބައެއް ފަރާތްތަކުން ޑަސްބިނަށް ކުނިތައް އެޅުމުގެ ބަދަލުގައި ކުނިތައް ދޫކޮށްލާފައިވަނީ މުޅި ތަނަށެވެ. އެހެންކަމުން އިއްޔެއަކީ އެ ސަރަހައްދަށް ހިތްފަސޭހަކޮށްލުމަށް ޒިޔާރަތްކުރި އާއިލާތަކަށް ވަރަށްބޮޑު ތަކްލީފެއް އުފުލަންޖެހުނު ދުވަހެއްކަމަށް އެފަރާތްތަކުން ވަނީ ފާހަގަކޮށްފައެވެ.