ގްރީންލޭންޑުން އެއްބަސްވިއަސް ނުވިއަސް އެމެރިކާއިން އެގައުމު ހިފާނެކަމުގެ ހަރުކަށި އިންޒާރު ޓްރަމްޕް ދީފިއެވެ. 

ތެއޮ ކުންފުނިތަކުގެ އިސްވެރިންނާ ވައިޓް ހައުސްގައި ބޭއްވި ބައްދަލުކުރެއްވުމުގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ގްރީންލޭންޑަކީ އާކްޓިކް ސަރަހައްދުގެ ސަލާމަތަށް ސްޓްރެޓީޖިކް ގޮތުން އިންތިހާއަށް މުހިންމު ތަނެއް ކަމަށެވެ. އެހެންކަމުން އެމެރިކާއިން އެތަން ހިފަން ބޭނުންވަނީ ރަޝިޔާ ނުވަތަ ޗައިނާއިން އެތަނަށް އަތްގަދަކުރުން ހުއްޓުވުމަށް ކަމަށް ޓްރަމްޕް ވިދާޅުވިއެވެ.

ގްރީންލޭންޑުން އެމެރިކާ އަށް ބޭނުންވާ އެއް ސަބަބެއް ކަމަށް ޓްރަމްޕް ވިދާޅުވީ، މިލިިޓަރީ އާލާތްތައް އުފެއްދުމުގައި ބޭނުންކުރާ މިނެރަލް އެ ތަނުގައި ގިނައިން ހުރުމެވެ. އަނެއް ސަބަބަކީ ވެސްޓާން ހެމިސްފިއާގައި އެމެރިކާގެ ނުފޫޒު އޮންނަން ޖެހޭނެ ކަމަށް އޭނާ ގަބޫލުކުރައްވާ ޤަބޫލުކުރެއްވުމެވެ.

އެމެރިކާއިން ބުނެފައިވަނީ ގްރީންލަންޑްގެ ރައްޔިތުންނަށް ރިޝްވަތު ދީގެން ވިއަސް ނުވަތަ އަސްކަރީ ބާރުގެ ބޭނުންކޮށްގެން ވީނަމަވެސް ގްރިންލޭންޑު އެޤައުމުގެ ބާރުގެ ދަށަށް ގެންނާނެކަމަށެވެ.

މިކަމާއި ގުޅިގެން ޑެންމާކުގެ ބޮޑުވަޒީރު މެޓޭ ފްރެޑްރިކްސަން ވަނީ، އެމެރިކާއިން ހަތިޔާރުގެ ބޭނުންކޮށްގެން ގްރީންލޭންޑް ހިފަން އުޅެފިނަމަ، އެއީ 'ނޭޓޯ' އިއްތިހާދު ރޫޅިގެންދާނެ ކަމެއް ކަމުގެ އިންޒާރު ދީފައެވެ. ނަމަވެސް، ޔޫރަޕްގައި ހުންނަ ނޭޓޯގެ ކޮމާންޑަރު، ޖެނެރަލް އެލެކްސަސް ގްރިންކެވިޗް ވިދާޅުވެފައިވަނީ، މިވަގުތު އިއްތިހާދުގެ ތެރޭގައި އެފަދަ ބިރުވެރިކަމެއް ނެތް ކަމަށާއި، އިއްތިހާދުގެ ކޮންމެ އިންޗިއެއް ދިފާއުކުރަން ވެސް އެމެރިކާ އޮތީ ތައްޔާރަށް ކަމަށެވެ. 

ޑެންމާކުގެ ދަށުން އަމިއްލަ އިހުތިޔާރު ލިބިގެންވާ ގްރީންލޭންޑް ވަށައިގެންވާ ކަނޑުގެ ސަރަހައްދު ރަނގަޅަށް ބެލެހެއްޓުމުގައި އެގައުމު ފެއިލްވެފައިވާ ކަމުގެ ތުހުމަތުވެސް ޓްރަންޕު ވަނީ ކޮށްފައެވެ.

މިކަމާ ގުޅިގެން ގްރީންލޭންޑުގެ ފޮރިން މިނިސްޓަރު ވިވިއަން މޮޓްޒްފެލްޑް ވިދާޅުވީ، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ އެކު ބާއްވާ މަޝްވަރާތަކުގައި އިސްކޮށް އޮންނަންވާނީ ގްރީންލޭންޑް ކަމަށެވެ. އަދި ޑެންމާކާ ނުލައި އެމެރިކާއާ ސީދާ ވާހަކަ ދެއްކުމުގެ ފުރުސަތު ގްރީންލޭންޑަށް އޮންނަން ޖެހޭނެ ކަމަށެވެ. 

ގްރީންލޭންޑުގެ މަންޒަރެއް-- ފޮޓޯ/ ގެޓީއިމަޖެސް

އާބާދީގައި 57،000 މީހުން ދިރިއުޅެމުންދާ ގްރީންލަންޑުގެ ރައްޔިތުން ޑެންމާކުން ވަކިވެ، އެމެރިކާގެ ބަޔަކަށް ވާން ރުއްސުމަށް ޓަކައި އެ މީހުންނަށް، ބޮޑެތި އަދަދުތަކުން ފައިސާ ދޭން ވެސް އެމެރިކާގެ އޮފިޝަލުން އަންނަނީ މަޝްވަރާ ކުރަމުންނެވެ. އެގޮތުން 10،000 ޑޮލަރާއި 100،000 ޑޮލަރާ ދެމެދުގެ އަދަދެއް، ގްރީލަންޑްގެ ކޮންމެ މީހަކަށް ދޭން މަޝްވަރާ ކޮށްފައިވާ ކަމަށް ރިޔާސީ ގަނޑުވަރުގެ އޮފިޝަލުން ހިމެނޭހެން އެމެރިކާގެ އޮފިޝަލުންނާ ހަވާލާދީ އެގައުމުގެ ނޫސްތަކުން ރިޕޯޓުކޮށްފައިވެއެވެ. 

އެމެރިކާއިން ދާދި ފަހުން ވެނެޒުއޭލާއަށް ހަމަލާދީ، އެ ގައުމުގެ ރައީސް ނިކޮލަސް މަޑޫރޯ އެމެރިކާގެ ބާރުގެ ދަށަށް ގެންދިޔަ ހާދިސާއާ ގުޅިގެން، ގްރީންލޭންޑް ހިފުމާއި މެދު ޓްރަމްޕް ގެންގުޅޭ މި ހަރުކަށި ވިސްނުމާ މެދު ބައިނަލްއަގުވާމީ މުޖުތަމައުގައި ވަނީ ބޮޑެތި ކަންބޮޑުވުންތަކެއް އުފެދިފައެވެ.

އެގޮތުން ޑެންމާކާއި ޔޫރަޕިއަން ޔޫނިއަންގެ އެހެން ބައެއް ގައުމުތަކުން ވެސް ޓްރަމްޕްގެ އެ ސިޔާސަތާ ދެކޮޅު ހަދައި ބުނަމުން އަންނަނީ، ގްރީންލަންޑުގެ ކަންތައްތައް ނިންމާނީ އެޤައުމާއި ޑެންމާކުގެ ރައްޔިތުން ކަމަށެވެ. މި ދެ ޤައުމު ގުޅިގެން ވަނީ މިދިޔަ އަންގާރަ ދުވަހު ހާއްސަ ބަޔާނެއް ވެސް އެ މޭރުމުން ނެރެފަ އެވެ. 

އެމެރިކާގެ ސިޔާސަތާ ދެކޮޅު ހަދައި ގްރީންލޭންޑުގެ ސަަރަހައްދީ ސަރުކާރާއި ޑެންމާކުން ވެސް ބުނަމުން އަންނަނީ ގްރީންލޭންޑަކީ ވިއްކާ ތަނެއް ނޫން ކަމަށެވެ. އަދި ގްރީންލޭންޑުގެ ބޮޑުވަޒީރު ޖެންސް ފްރެޑެރިކް ނީލްސެން ވިދާޅުވީ އެޤައުމު ހޯދުމުގެ "ހިޔާލީ ފޮލާ" އެމެރިކާއިން ދޫކޮށްލަން ޖެހޭ ކަމަށެވެ. މިއާ ގުޅުވާ ގްރީންލޭންޑުގެ ފޮރިން މިނިސްޓަރު ވިދާޅުވެފައިވަނީ، ގްރީންލޭންޑަށް އެމެރިކާ ބޭނުންވާ ފަދައިން، އެމެރިކާއަށް ވެސް ގްރީންލޭންޑް ބޭނުންވާ ކަމަށާއި، ދެ ގައުމުގެ ދެމެދުގައި އޮތް އިތުބާރު އަލުން ގާއިމުކުރަން ޖެހޭ ކަމަށެވެ.