ދުނިޔޭގެ އެކި ކަންކޮޅުތަކުގައި އިންސްޓަގްރާމް ބޭނުންކުރާ ގާތްގަނޑަކަށް 17 މިލިއަން މީހުންގެ އަމިއްލަ ޒާތީ މައުލޫމާތު ލީކުވެފައިވާކަމަށް ރިޕޯޓްތަކުން ދައްކައިފިއެވެ.

މި މައުލޫމާތުތަކަކީ 2024 ވަނަ އަހަރު ހިނގި ހާދިސާއަކާ ގުޅުންހުރި މައުލޫމާތުތަކެއް ނަމަވެސް، 2026 ވަނަ އަހަރުގެ މިހާތަނަށް ލިބިފައިވާ ރިޕޯޓްތަކަށް ބަލާއިރު، މި މައުލޫމާތުތައް މިހާރު ވަނީ ހެކަރުންގެ ފޯރަމްތަކުގައި އަލުން ދައުރުވާން ފަށާފައެވެ.

މިކަމާ ގުޅިގެން ރާއްޖޭގެ އެންޓި-ސްކޭމް ސެންޓަރުން ވަނީ މި މައުލޫމާތު ލީކުވުމާ ގުޅިގެން ދިވެހި ރައްޔިތުންވެސް ސަމާލުވުމަށް އިންޒާރު ދީފައެވެ.

ލީކުވެފައިވާ މައުލޫމާތުގެ ތެރޭގައި ބޭނުންކުރާ ފަރާތްތަކުގެ އީމެއިލް އެޑްރެސް، ފޯނު ނަންބަރު އަދި ޔޫސަރނޭމް ހިމެނެއެވެ. ސްކޭމް ކުރާ ފަރާތްތަކުން މި މައުލޫމާތު ބޭނުންކޮށްގެން ސައްހަ ކަމަށް ދައްކާ ފިޝިންގ މެސެޖުތައް ފޮނުވުމުގެ ފުރުސަތު ބޮޑުކަމަށް އެ ސެންޓަރުން ފާހަގަކުރެއެވެ.

އިންސްޓަގްރާމް އެކައުންޓްތަކުގެ ރައްކާތެރިކަން ކަށަވަރުކުރުމަށްޓަކައި ތިރީގައިވާ ފިޔަވަޅުތައް އެޅުމަށް އެންޓި-ސްކޭމް ސެންޓަރުން ވަނީ އިލްތިމާސްކޮށްފައެވެ:

ޕާސްވޯޑް ބަދަލުކުރުން: އިންސްޓަގްރާމްގެ ރަސްމީ އެޕް މެދުވެރިކޮށް ޕާސްވޯޑް ބަދަލުކުރުން.

ޓޫ ފެކްޓަރ އޮތެންޓިކޭޝަން (2FA): އެކައުންޓަށް އިތުރު ރައްކާތެރިކަމެއް ހޯދުމަށްޓަކައި އޮތެންޓިކޭޓަރ އެޕެއް ބޭނުންކޮށްގެން 2FA އެކްޓިވޭޓް ކުރުން.

ލިންކުތަކަށް ސަމާލުވުން: ޝައްކުކުރެވޭ ފަދަ ޕާސްވޯޑް ރިސެޓް ލިންކުތަކަށް ނުފިއްތުން. އަދި އެއްވެސް މީހަކާ އޯ.ޓީ.ޕީ (OTP) ކޯޑު ހިއްސާ ނުކުރުން.

ތާރޑް ޕާޓީ އެޕްސް: އެކައުންޓާ ގުޅުވާފައިވާ ނޭނގޭ އެޕްތައް ޗެކްކޮށް، އެފަދަ އެޕްތައް ވަގުތުން އުނިކުރުން.

އެންޓި-ސްކޭމް ސެންޓަރުން އިތުރަށް ބުނެފައިވަނީ، ސްކޭމަރުންނަށް ކާމިޔާބު ލިބެނީ ބޭނުންކުރާ ފަރާތްތަކުން މިފަދަ ކަންކަމަށް ހޭލުންތެރި ނުވެ ހިމޭނުން ތިބުމުން ކަމަށެވެ.

އެހެންކަމުން، އެއްވެސް ބާވަތެއްގެ ސްކޭމެއް ހިނގައިފިނަމަ ނުވަތަ ޝައްކުކުރެވޭ ކަމެއް ފާހަގަކުރެވިއްޖެނަމަ ލަސްނުކޮށް ފުލުހުންނަށް ރިޕޯޓްކުރުމަށް ވަނީ އެދިފައެވެ.