ރައީސް މުއިއްޒުގެ މޭޔަރު ކަމުގައި މާލޭގެ ބިމެއް ނުވިއްކާ، ނުގަވައިދުންވެސް ދޫނުކުރޭ: އަރީޝް
ރައީސް ޑރ.މުހައްމަދު މުއިއްޒު މާލޭގެ މޭޔަރުކަމުގައި ހުންނެވި އިރު މާލޭގެ އެއްވެސް ބިމެއް ވިއްކާފައި ނުވާ ކަމަށާއި ގަވާއިދާ ހިލާފަށް ބިމެއް ކުއްޔަށް ދީފައި ވެސް ނުވާ ކަމަށް ވިދާޅުވެ މާލޭގެ ޑެޕިއުޓީ މޭޔަރު މުހައްމަދު އަރީޝް ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމަށް ރައްދު ދެއްވައިފި އެވެ.
އެމްޑީޕީގެ ޓިކެޓްގައި މާލޭގެ މޭޔަރު ކަމަށް ވާދަކުރައްވަން ކެންޕެއިން ކުރައްވަމުންދާ އަލީ އާޒިމް ދާދިފަހުން ވަނީ ރައީސް މުޢިއްޒުގެ މޭޔަރު ކަމުގައި ނުގަވައިދުން ބިން ދޫކުރެއްވި ކަމަށް ތުހުމަތު ކުރައްވައި، އޭނާގެ މޭޔަރު ކަމުގައި އެ މައްސަލަތައް ބައްލަވާނެ ކަމަށް ވިދާޅުވެފައެވެ.
އެކަމާގުޅިގެން ޢަރީޝް އެކްސްގައި ކުރެއްވި ޕޯސްޓެއްގައި ވިދާޅުވީ މާލެ ސިޓީގެ މޭޔަރުކަމުގައި، ރައީސް މުޢިއްޒު ހުންނެވި 2 އަހަރާއި 6 މަސް ދުވަހުގެ ތެރޭގައި، މާލެ ސިޓީގެ އެއްވެސް ބިމެއް ބަޔަކަށް ވިއްކަވާފައެއް ނުވާ ކަމަށެވެ. އަދި ނުގަވާއިދުން ކުއްޔަށްދެއްވި އެއްވެސް ބިމެއްވެސް ނެތް ކަމަށެވެ.
ޢަރީޝް ވިދާޅުވިގޮތުގައި؟ ރައީސް މުޢިއްޒުގެ މޭޔަރުކަމުގެ މުއްދަތަކީ މާލެ ސިޓީގެ މުނިސިޕަލް ޚިދުމަތްތައް ރަނގަޅުކޮށް، ސިޓީ ފެހިކޮށް، ސާފުތާހިރުކޮށް، ދީނީ އިޖްތިމާޢީ ރޫޙު ސިޓީގައި ދިރިއުޅޭ ރައްޔިތުންގެ މެދުގައި އާލާކޮށް، ރައްޔިތުންނާ ސީދާ ބައްދަލުކުރެއްވުން ގިނަ ކުރައްވައި، ކޮންމެ ހަފުތާއަކު ގޭގެއަށް ޒިޔާރަތް ކުރައްވާ ހާލުއަހުވާލު ބައްލަވާ، ސީދާ ރައްޔިތުން އެދޭގޮތަށް މާލެ ސިޓީގެ ކަންކަން މިސްރާބު ކުރެއްވި ދުވަސްތަކެކެވެ.
މި ހަގީގަތްތައް ހަޖަމު ނުކުރެވިގެން، އެއްވެސް ހަގީގަތެއް ނެތް ދޮގު ވާހަކަތައް މާލޭގެ މޭޔަރުކަމުގެ ކެމްޕޭނުގައި ދައްކާ، މާލެ ސިޓީ ކައުންސިލުގެ މޭޔަރަކަށް އައުމަށްފަހު ކުރާނެ ކަމަކީ، ކޯޓުތަކަށް އަބަދު ދުވެ، ދައުވާތައްކޮށް، އަނެކުންނަށް ބިރުދައްކާ، "ގޭންގެއްގެ ގޮތުގައި" މާލެ ސިޓީ ހިންގުންކަމަށް ސިފަވާ ގޮތަށް ވާހަކަތައް ދެއްކުމަކީ ދަށުދަރަޖައިގެ އެއްވެސް އަމާޒެއްނެތް ކެންޕޭނެއް.
ޢަރީޝް
މިއާއެކު ޢަރީޝް ވިދާޅުވީ، ލޯކަލް ކައުންސިލްތަކަކީ އޮންނަ ސަރުކާރަކަށް ޖެއްސުންކޮށް ޖަދަލުކުރާން ޤާނޫނީ ގޮތުން އުފައްދާ އިދާރާތަކެއް ނޫން ކަމަށެވެ. އަދި އެއީ ސަރުކާރާ ގުޅިގެން ރައްޔިތުންނަށް ބޭނުންވާ މުނިސިޕަލް ޚިދުމަތްތަކާއި ރަށްވެހި ތަރައްޤީ ގެނައުމުގެ މަސައްކަތް ކުރާ ތަނެއް ކަމަށެވެ.
ޢަރީޝް ވިދާޅުވީ، މާލެ ސިޓީއަކީ ވަކި ޕާޓީއެއްގެ ސިޔާސީ ގޮތްޕަކަށް ހަދައިގެން ރެޔާދުވާލު މުޒާހަރާކޮށް ”ކޯޓުތައް ހައިޖެކް ކުރާ ތަނެއްގޮތަށް“ ހަދާނެކަމަށް ބުނެ ކުރާ ކެންޕޭނަކުން ރައްޔިތުންގެ ވޯޓު އިތުރެއް ނުވާނެ ކަމަށާ، ރައްޔިތުންނަކަށް އެކަމުން ލިބޭނެ ފަސޭހައެއްވެސް ނޯންނާނެ ކަމަށެވެ.
އަދި ރައީސް މުޢިއްޒުގެ އިސްތަށިފުޅުގައި ދޮގު އިލްޒާމު އަޅުވަން އެއްވެސް ހެއްކެއް ހަގީގަތެއް ނެތް ޚިޔާލީ ހަރުކަށި އިންޒާރުތައް ދިނުމަކީ، އެ ސިޓީގެ މޭޔަރުކަމަށް ކުފޫ ހަމަވާ ޒާތުގެ އަމަލެއް ނޫން ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
