އީރާނުގައި ކުރިއަށްދާ މުޒާހަރާތަކާ ގުޅިގެން އެމެރިކާއިން ވަރުގަދަ އަސްކަރީ ފިޔަވަޅުތަކެއް އެޅުމަށް ވިސްނަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހާމަކޮށްފިއެވެ.

އާދީއްތަ ދުވަހުގެ ރޭ "އެއާ ފޯސް ވަން" ގައި ނޫސްވެރިންނާ ވާހަކަދައްކަމުން ޓްރަމްޕް ބުނީ، އީރާނާ މެދު އެޅޭނެ "ވަރުގަދަ ފިޔަވަޅުތަކެއް" އެމެރިކާގެ އަސްކަރިއްޔާއިން ވަރަށް ސީރިއަސްކޮށް ދިރާސާކުރަމުންދާ ކަމަށެވެ.

ޓްރަމްޕް ބުނި ގޮތުގައި، އަސްކަރީ ފިޔަވަޅު އަޅާނެ ކަމުގެ އިންޒާރު ދިނުމާ ގުޅިގެން އީރާނުގެ ލީޑަޝިޕުން ވަނީ މަޝްވަރާ ކުރުމަށް އެދިފައެވެ. އަދި މިކަމާ ގުޅޭ ބައްދަލުވުމެއް ބޭއްވުމުގެ އިންތިޒާމުތައް ހަމަޖެހެމުންދާ ކަމަށް ވެސް އޭނާ ބުންޏެވެ. ނަމަވެސް، އެ ބައްދަލުވުމުގެ ކުރިން ވެސް އީރާނާ މެދު ފިޔަވަޅު އަޅަން ޖެހިދާނެ ކަމުގެ އިޝާރާތެއް ޓްރަމްޕް ވަނީ ދީފައެވެ.

އެމެރިކާގެ މި އިންޒާރުތަކާ ގުޅިގެން އީރާނުގެ މަޖިލީހުގެ ރައީސް މުޙައްމަދު ބާޤިރު ޤާލީބާފް ވަނީ ވަރުގަދަ ރައްދެއް ދެއްވާފައެވެ. އޭނާ ވިދާޅުވީ އީރާނަށް ހަމަލާއެއް ދީފިނަމަ، އިސްރާއީލުގެ ބިންތަކާއި، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކާއި މަނަވަރުތަކަށް އީރާނުން ހަމަލާދޭނެ ކަމަށެވެ.

އީރާނުގައި މި މުޒާހަރާތައް ފެށުނީ މިދިޔަ ޑިސެމްބަރު މަހުގެ 28 ވަނަ ދުވަހު، އެ ގައުމުގެ ފައިސާގެ އަގު ދަށަށް ދިއުމާ ގުޅިގެން ތެހެރާންގެ ގްރޭންޑް ބާޒާރުގެ ވިޔަފާރިވެރިން ފިހާރަތައް ބަންދުކޮށް އިހުތިޖާޖު ކުރަން ފެށުމުންނެވެ. މި މުޒާހަރާތައް މުޅި ގައުމަށް ފެތުރިގެން ދިޔައިރު، މިހާރު މުޒާހަރާގެ ބައިވެރިން ދަނީ 1979 ވަނަ އަހަރުން ފެށިގެން އީރާނުގައި އޮތް ދީނީ ވެރިކަމާ ދެކޮޅަށް އަޑުއުފުލަމުންނެވެ.

އީރާނުގެ ދައުލަތުގެ މީޑިއާއިން ރިޕޯޓްކުރާ ގޮތުގައި މި ހަމަނުޖެހުންތަކުގައި ސަލާމަތީ ބާރުތަކުގެ 109 މީހުން ވަނީ މަރުވެފައެވެ. ނަމަވެސް، ގައުމުން ބޭރުގައި ތިބި އިދިކޮޅު ހަރަކާތްތެރިން ބުނާ ގޮތުގައި މަރުވި މީހުންގެ އަދަދު މިއަށްވުރެ މާ ގިނަ އެވެ.

އީރާނާ މެދު އެޅޭނެ ފިޔަވަޅުތަކާ ގުޅޭގޮތުން މަޝްވަރާކުރުމަށް އަންގާރަ ދުވަހު އިސް މުޝީރުންނާ، ޓްރަމްޕް ބައްދަލުކުރުމަށް ވަނީ ހަމަޖެހިފައެވެ. ރިޕޯޓްތައް ބުނާ ގޮތުގައި މި ފިޔަވަޅުތަކުގެ ތެރޭގައި އަސްކަރީ ހަމަލާތަކާއި، ސައިބަރ ހަމަލާތަކާއި، ދަތިކުރުމުގެ ފިޔަވަޅުތައް އިތުރުކުރުން ހިމެނެއެވެ. މީގެ އިތުރުން، އީރާނުގައި އިންޓަނެޓްގެ ހިދުމަތް ކެނޑިފައިވާތީ، މަހުޖަނު އީލޮން މަސްކްގެ ސްޓާލިންކް މެދުވެރިކޮށް އެ ގައުމަށް އިންޓަނެޓް ފޯރުކޮށްދިނުމާ ގުޅޭގޮތުން ވެސް ޓްރަމްޕް މަޝްވަރާ ކުރާނެ ކަމަށް ބުނެފައިވެއެވެ.

މީގެ އިތުރުން، ގްރީންލޭންޑް ބައްލަވައިގަތުމާ ގުޅޭގޮތުން ޑެންމާކާ ވާހަކަދައްކަވަމުންދާ ކަމަށާއި، ވެނެޒުއޭލާގެ އިދިކޮޅު ލީޑަރު މާރިއާ ކޮރީނާ މަޗާޑޯއާ ކުރިއަށް އޮތް ދެ ދުވަހެއްގެ ތެރޭގައި ބައްދަލުކުރާނެ ކަމަށް ވެސް ރައީސް ޓްރަމްޕް ވަނީ ހާމަކޮށްފައެވެ.