އީރާނުގައި ކުރަމުންދާ ސަރުކާރާ ދެކޮޅު ވަރުގަދަ މުޒާހަރާތަކާ ގުޅިގެން، އެމެރިކާއިން އެ ގައުމަށް އަސްކަރީ ހަމަލާއެއް ދީފިނަމަ، އިސްރާއީލާއި މެދުއިރުމަތީގައި ތިބި އެމެރިކާގެ ސިފައިންނަށް ހަމަލާދޭނެ ކަމުގެ ވަރުގަދަ އިންޒާރެއް އީރާނުގެ މަޖިލީހުގެ ރައީސް މުޙައްމަދު ބާޤިރު ޤާލީބާފް ދެއްވައިފިއެވެ.

އީރާނުގެ ވެރިރަށް ތެހެރާނާއި އެހެނިހެން ބޮޑެތި ސިޓީތަކުގައި މުޒާހަރާ ކުރާތާ ދެ ހަފުތާއަށްވުރެ ގިނަ ދުވަސްވެފައިވާއިރު، މި ހަމަނުޖެހުންތަކުގައި މިހާތަނަށް މަދުވެގެން 116 މީހުން މަރުވެ، 2,600 އަށްވުރެ ގިނަ މީހުން ހައްޔަރުކޮށްފައިވާ ކަމަށް އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ބުނެއެވެ.

އީރާނު ސަރުކާރުން ވަނީ މުޒާހަރާތަކުގެ މައުލޫމާތު ބޭރަށް ދިޔަ ނުދިނުމަށްޓަކައި އިންޓަރނެޓާއި ފޯނުގެ ޚިދުމަތްތައް މެދުކަނޑާލާފައެވެ.

މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނު މައްސަލައިގެ ތެރެއަށް އެ ގައުމުން ވަންނަން އުޅޭކަމަށް ބުނެފައެވެ. 

ޓްރަމްޕް އެކަން އިއުލާނު ކުރުމާއެކު، އީރާނުގެ މަޖިލީހުގައި ވާހަކަދައްކަވަމުން ޤާލީބާފް ވިދާޅުވީ، އީރާނަށް ދޭ ކޮންމެ ހަމަލާއަކަށް ރައްދު ދޭނެ ކަމަށާއި، އިސްރާއީލުގެ ބިންތަކަށާއި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކާއި މަނަވަރުތަކަށް ހަމަލާދޭން ފަސްނުޖެހޭނެ ކަމަށެވެ. މި ޖަލްސާގައި އީރާނުގެ ގާނޫނު ހަދާ މަޖިލީހުގެ މެންބަރުން ވަނީ "އެމެރިކާ ހަލާކުވެދާށި" (Death to America) އޭ ބުނެ އަޑުގަދަކޮށްފައެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ މުޒާހަރާގެ ބައިވެރިންނަށް ތާއީދުކޮށް، އީރާނުގެ ރައްޔިތުން މިނިވަންކަމަށް އެދި ގޮވަމުންދާ ކަމަށް ބުނެފައެވެ. މީޑިއާ ރިޕޯޓްތައް ބުނާގޮތުން، އީރާނަށް ހަމަލާދިނުމަށްޓަކައި އަސްކަރީ އެކި ގޮތްތައް ޓްރަމްޕަށް ވަނީ ހުށަހެޅިފައެވެ. އެމެރިކާގެ ސްޓޭޓް ޑިޕާޓްމަންޓުން ވެސް ވަނީ ޓްރަމްޕްގެ އިންޒާރުތަކަކީ ސީރިއަސް އިންޒާރުތަކެއް ކަމަށް ބުނެ އީރާނަށް އިންޒާރު ދީފައެވެ.

ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި، ތެހެރާނުގެ ޕުނާކް އަވަށާއި، ދީނީ ގޮތުން މުހިންމު ސިޓީއެއް ކަމަށްވާ މަޝްހަދުގައި މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ދަނީ ވަރުގަދަ ކުރިމަތިލުންތަކެއް ހިނގަމުންނެވެ. މަޝްހަދުގައި މުޒާހަރާގެ ބައިވެރިން ވަނީ މަގުތައް ބަންދުކޮށް، ސަލާމަތީ ބާރުތަކާ ކުރިމަތިލާފައެވެ.

އީރާނުގެ ދައުލަތުގެ މީޑިއާއިން ބައެއް ސިޓީތަކަކީ އަމާން ތަންތަން ކަމަށް ދެއްކުމަށް މަސައްކަތް ކުރި ނަމަވެސް، ގައުމުގެ އެކި ކަންކޮޅުތަކުގައި މުޒާހަރާތައް ދަނީ ފެތުރެމުންނެވެ. މި ހަނގުރާމަވެރި މާހައުލުގައި އީރާނުން އަސްކަރީ ފިޔަވަޅެއް އަޅާނެތޯ ނިންމަވާނީ އެ ގައުމުގެ އެންމެ މަތީ ވެރިޔާ އާޔަތުالله އަލީ ޚާމަނާއީއެވެ. އެމެރިކާގެ އަސްކަރިއްޔާއިން ބުނެފައިވަނީ އެމެރިކާގެ މަސްލަހަތުތައް ހިމާޔަތްކުރުމަށްޓަކައި ފުރިހަމައަށް ތައްޔާރުވެފައިވާ ކަމަށެވެ.