ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން 2026 ވަނަ އަހަރުގެ ފެބްރުއަރީ މަހު ފެށުމަށް ހަމަޖެހިފައިވާ ކޯސްތަކަށް ކުރިމަތިލުމުގެ ފުރުޞަތު ހުޅުވާލައިފިއެވެ.

މި އިންޓޭކުގައި ޔުނިވަރސިޓީގެ އެކި ފެކަލްޓީތަކުން ތަފާތު ދާއިރާތަކުން ކޯސްތަކުގައި ބައިވެރިވުމުގެ ފުރުޞަތު ވަނީ ހުޅުވާލެވިފައެވެ.

އެމްއެންޔޫ އިން ހާމަކޮށްފައިވާ ގޮތުގައި، މި އިންޓޭކަށް ފޯމު ހުށަހެޅުމުގެ އެންމެ ފަހު ތާރީޚަކީ 26 ޖަނަވަރީ 2026 އެވެ. ކޯސްތަކަށް ކުރިމަތިލާން ބޭނުންވާ ފަރާތްތަކުން އެމްއެންޔޫގެ އޮންލައިން ޕޯޓަލް portal.mnu.edu.mv މެދުވެރިކޮށް ފޯމު ހުށަހެޅޭނެއެވެ. އަދި ހިންގުމަށް ހަމަޖެހިފައިވާ ކޯސްތަކުގެ ތަފްޞީލު courses.mnu.edu.mv އިން ފެންނަން ހުންނާނެއެވެ.

ކޯސްތަކަށް ކުދިން ހޮވުމުގައި ޢަމަލުކުރާނެ އުޞޫލުތަކަށް ބަލާއިރު، ޝަރުޠު ހަމަވި ނަމަވެސް، ފޯމު ހުށަހަޅާ ތަރުތީބަށާއި ލިބޭ އެޕްލިކޭޝަންގެ އަދަދަށް ބަލައި، ހުރިހާ ދަރިވަރުންނަށް ފުރުޞަތު ނުލިބިދާނެ ކަމަށް ޔުނިވަރސިޓީން މަޢުލޫމާތު ދެއެވެ.

މީގެ އިތުރުން، ކޯހެއް ހިންގުމަށް ބޭނުންވާ އެންމެ މަދު އަދަދަށް ދަރިވަރުން ހަމަނުވާނަމަ، އެ ކޯހެއް ފަސްކުރުން ނުވަތަ ކެންސަލް ކުރެވިދާނެ ކަމަށް ބުންޏެވެ. އެގޮތުން ސެޓްފިކެޓް އަދި އެއް އަހަރުގެ ޑިޕްލޮމާ ކޯސްތަކަށް މަދުވެގެން ދަރިވަރުން، އަދި ޑިގްރީ ކޯސްތަކަށް މަދުވެގެން 15 ދަރިވަރުން ބޭނުންވާނެއެވެ.

ދަރިވަރުންގެ ފެންވަރު ވަޒަންކުރުމުގައި ގެންގުޅޭ މިންގަނޑުތަކަށް ބަލާއިރު، ޖީސީއީ އޯލެވެލް، އެސްއެސްސީ އަދި އެޗްއެސްސީ އިމްތިޙާނުތަކުން "ސީ" އިން ފެށިގެން މަތީ ގްރޭޑްތަކަކީ ފާސް މާކްސްގެ ގޮތުގައި ބަލާނެއެވެ. އަދި ޖީސީއީ އޭލެވެލް އިން "އީ" އިން ފެށިގެން މަތީ ގްރޭޑްތައް ފާސް މާކްސްގެ ގޮތުގައި ބަލާނެ ކަމަށް ޔުނިވަރސިޓީން ބުނެއެވެ.

ފައުންޑޭޝަން ކޯސްތަކަށް ކުރިމަތިލާ ދަރިވަރުން، އެ ކޯސް ނިންމުމަށްފަހު ދެން ވަންނަން ބޭނުންވާ ޑިގްރީ ކޯހުގެ ޝަރުޠުތައް ހަމަވާނެކަން ކުރިއާލާ ކަށަވަރު ކުރުމަށްވެސް ޔުނިވަރސިޓީން އިރުޝާދު ދެއެވެ.

މިކަމާ ގުޅޭ އިތުރު މަޢުލޫމާތު ހޯދުމަށް ބޭނުންވާ ފަރާތްތަކުން [email protected] އަށް އީމެއިލް ކުރުމަށް ނުވަތަ ޔުނިވަރސިޓީގެ ރަސްމީ ވެބްސައިޓް www.mnu.edu.mv އަށް ޒިޔާރަތްކުރުމަށް އެމްއެންޔޫ އިން އެދެއެވެ.