މިދިޔަ 2025 ވަނަ އަހަރު މަތީ ތަޢުލީމު ޙާސިލުކުރަމުންދާ ދަރިވަރުންނަށް ސްޓޫޑެންޓް ލޯންގެ ގޮތުގައި 548 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހާމަކޮށްފިއެވެ.

އެ ވުޒާރާގެ ތަފާސްހިސާބުތަކުން ދައްކާގޮތުގައި 2024 ވަނަ އަހަރާއި 2025 ވަނަ އަހަރު އެއްކޮށް، ސްޓޫޑެންޓް ލޯނުގެ ގޮތުގައި 1.24 ބިލިއަނަށްވުރެ ގިނަ ރުފިޔާ ދައުލަތުން ވަނީ ޚަރަދުކޮށްފައެވެ. މީގެ ތެރެއިން މިދިޔަ އަހަރު ހަރަދުކޮށްފައިވަނީ 548،162،080 ރުފިޔާއެވެ. އެއަހަރުގެ ތެރޭގައި 359 އަންހެން ދަރިވަރުންނާއި، 237 ފިރިހެން ދަރިވަރުން ހިމެނޭނެހެން، ޖުމުލަ 596 ދަރިވަރުންނަކަށް ލޯނު ހަމަޖައްސައިދީފައިވެއެވެ. 2025 އަދި 2024 ވަނަ އަހަރު އެއްކޮށް 749 އަންހެން ދަރިވަރުންނާއި، 568 ފިރިހެން ދަރިވަރުން ހިމެނޭނެހެން، ޖުމުލަ 1438 ދަރިވަރަކަށް ސްޓޫޑެންޓު ލޯނު ސަރުކާރުން ވަނީ ހަމަޖައްސައިދީފައެވެ. 

ކޮންމެ އަހަރަކުވެސް 500 ކުދިންނަށް ލޯނު ދިނުމަށް އިއުލާނުކޮށް، ވޭތުވެދިޔަ 2 އަހަރު، ޖުމުލަ 1000 ކުދިންނަށް ލޯނު ދިނުމަށް އިއުލާންކުރެވިފައިވާކަމަށްވެސް މިނިސްޓްރީގެ ތަފާސްހިސާބުތަކުން ދައްކައެވެ. މި ފުރުސަތުގައި ޝަރުތު ހަމަވާ ގިނަ ކުދިންތަކެއް ކުރިމަތިލުމާ ގުޅިގެން ސަރުކާރުންވަނީ ޝަރުތު ހަމަވާ ހުރިހާ ކުދިންނަށް ފުރުސަތު ދިނުމަށް 2025 ވަނަ އަހަރު ނިންމާ، އެ އަހަރު އެކަނިވެސް 862 ދަރިވަރުންނަށް، ސްޓޫޑެންޓް ލޯންގެ ދަށުން ފުރުސަތު ދީފައެވެ. މިއާއިއެކު ވޭތުވެދިޔަ 2 އަހަރު ސްޓޫޑެންޓު ލޯނު ދޫކުރި ދަރިވަރުންގެ އަދަދު ވަނީ  ޖުމުލަ 2108 އަށް އަރާފައެވެ. 

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވީ، ސްޓޫޑެންޓް ލޯނުގެ ދަށުން މިވަގުތު ރާއްޖެއާއި ރާއްޖެއިން ބޭރުގެ 36 ޤައުމެއްގައި 1740 ދަރިވަރަކު ތަޢުލީމު ޙާސިލުކުރަމުން އަންނަކަމަށެވެ.

ދައުލަތުން މަތީ ތަޢުލީމަށް ކުރަމުންދާ ޚަރަދު އަހަރުން އަހަރަށްދަނީ އިތުރުވަމުންނެވެ. އެގޮތުން ގިނަ ކުދިންނަށް މަތީ ތައުލިމު ހާސިލުކުރުމުގެ ފުރުސަތު ފަހި ކޮށްދިނުމުގެ ގޮތުން ދޭން ފަށައިފާއިވާ ސްޓޫޑެންޓު ލޯނުތަކަކީވެސް މިގޮތުން އެޅުނު މުހިންމު ފިޔަވަޅެކެވެ. މި ލޯނުގެ ދަށުން އެކުއްޖަކު ބޭނުން ޤައުމަކުން ކިޔެވުމުގެ އިންތިޒާމު ވެސް ސަރުކާރުން ދަނީ ހަމަޖައްސައިދެމުންނެވެ.