އީރާނާއެކު ވިޔަފާރި ކުރާ ޤައުމުތަކުން އެމެރިކާއަށް މުދާ އެތެރެކުރާނަމަ ބޮޑު ޓެރިފެއް ނަގަން އެމެރިކާއިން ނިންމައިފިއެވެ.

މިގޮތުން، އީރާނާ އެކު ވިޔަފާރިކުރާ ހުރިހާ ގައުމެއްގެ މުދަލުން 25 ޕަސެންޓުގެ ޓެރިފް ނަގަން ނިންމައި އެގައުމުގެ ރައީސް ޑޮނަލްޑް ޓްރަމްޕު ވަނީ އިއުލާނުކުރައްވާފައެވެ. މިކަމާއި ގުޅޭ އެއްވެސް ރަސްމީ ލިޔެކިޔުމެއް ނުވަތަ ޤާނޫނީ ހަމައެއް އެމެރިކާގެ ސަރުކާރުން މިހާތަނަށް ޙިއްޞާކޮށްފާ ނުވިނަމަވެސް އެ ނިންމުމަށް ވަގުތުން ޢަމަލުކުރަން ފަށާފައިވާ ކަމަށް ޓްރަމްޕް ވަނީ ވިދާޅުވެފައެވެ. 

އީރާނާ އެކު ވިޔަފާރިކުރާ ގައުމުތަކުގެ މުދަލުން ޓެރިފް ނަގާނެކަން ޓްރަމްޕު އިއުލާނުކުރައްވާފައި މި ވަނީ މިދިޔަ ޑިސެމްބަރު މަހުގެ ފަހުކޮޅު އިރާންގެ ރައްޔިތުން އެގައުމުގައި  ތަކެތީގެ އަގުތައް އިންތިހާއަށް އުފުލިފައިވާތީ އެކަމާ ދެކޮޅަށް މުޒާހަރާކުރަން ފަށާ، އެ މުޒާހަރާތައް މިހާރު އެކި ސަރަޙައްދުތަކަށް ފެތުރި، ސަލާމަތީ ބާރުތަކާއި މުޒާހަރާގެ ބައިވެރިންނާ ދެމެދު ކުރިމަތިލުންތައް ހިނގައި، ބޮޑެތި ގެއްލުންތައް ދީ، އެތައް 100 ބަޔަކު މަރުވެފައިވުމުން، އީރާން ސަރުކާރާ ދެކޮޅަށް މުޒާހަރާކުރާ މީހުން ހުއްޓުވަން ކުރާ މަސައްކަތުގައި މީހުން ގަސްތުގައި މަރަމުންދާ ކަމަށް ބުނެ އީރާނަށް ހަމަލާ ދިނުމުގެ އިންޒާރު ވެސް ތަކުރާރުކޮށް ދެއްވުމަށް ފަހުގައެވެ. 

އިރާނުގައި ހިނގަމުންދާ ހަމަނުޖެހުންތަކުގެ ތެރެއިން-- ފޮޓޯ/ ޔަހޫ ނިއުސް

މީގެ އިތުރުން، އިތުރު ދަތިކުރުމުގެ ފިޔަވަޅުތައް ހިމެނޭ ގޮތަށް އީރާނާ ދެކޮޅަށް އެޅިދާނެ ތަފާތު ފިޔަވަޅުތަކާމެދު ވިސްނަވަމުންދާ ކަމަށް ވެސް ޓްރަމްޕް ވަނީ ވިދާޅުވެފައެވެ.

މީގެ ރައްދުގައި މި އިންޒާރުތަކަށް އަމަލުކުރައްވައިފިނަމަ އެމެރިކާގެ އަސްކަރީ މަރުކަރުތަކަށް ހަމަލާދޭނެ ކަމަށް އީރާނުން ވަނީ ބުނެފައެވެ.

އީރާނާ އެކު މައިގަނޑު ގޮތެއްގައި ވިޔަފާރިކުރާ ގައުމުތަކަކީ ޗައިނާ، ތުރުކީ، ޔުނައިޓެޑް އަރަބް އެމިރޭޓްސް އަދި އިރާގު ކަމަށް ޓްރޭޑިން އިކޮނިމިކްސްގެ ޑޭޓާބޭސް އިން ދައްކަ އެެވެ. މި ގައުމު ތަކުގެ މުދަލުން މިހާ ބޮޑު އަދަދެއްގެ ޓެރިފް ނަގަން ފަށައިފިނަމަ އޭގެ ނޭދެވޭ ފައިދާ މުޅި ދުނިޔޭގެ އިގްތިޞާދަށްވެސް ކުރާނެއެވެ. 

އެގޮތުން، މި ފިޔަވަޅާއި ގުޅިގެން ޗައިނާގެ މުދަލުން އެމެރިކާއިން ނަގަމުން ދިޔަ ޓެރިފް ވަނި %20 އިން %45 އަށޤ އަރާފައެވެ. 

2025 ވަނަ އަހަރުގެ ފުރަތަމަ 11 މަސްދުވަހުގެ ތެރޭގައި ޗައިނާއިން އީރާނަށް 6.2 ބިލިއަން ޑޮލަރުގެ މުދާ އެކްސްޕޯޓްކޮށް 2.85 ބިލިއަން ޑޮލަރު އިމްޕޯޓްކޮށްފައިވާ ކަމަށް ޗައިނާގެ ކަސްޓަމްސް ތަފާސް ހިސާބުތަކުން ދައްކައެވެ.