އީރާނުގައި ތިބި އިންޑިއާގެ ރައްޔިތުން އަނބުރާ ޤައުމަށް ދިއުމަށް ތެހެރާނުގައި ހުންނަ އެޤައުމުގެ އެމްބަސީން އެދިއްޖެއެވެ.

ތެހެރާނުގައި ހުންނަ އިންޑިއާގެ އެމްބަސީން މިއަދު ނެރުނު ބަޔާނުގައި ބުނީ، އީރާނުގެ މަޝްރަހް ކުރިއަށްދާގޮތުން މިވަގުތަށް އޮތް އެންމެ ރައްކާތެރި ގޮތަކީ އެޤައުމު ދޫކޮށް ދިއުންކަމަށެވެ. އެގޮތުން އީރާންގައި އެކި ބޭނުންތަކުގައި މިވަގުތު ތިބި އިންޑިއާގެ ރައްޔިތުން ފްލައިޓް ހަމަޖެހފައި އޮތްނަމަ ވީހާވެސް އަވަހަކަށް އިންޑިއާއަށް ދިއުމަށް އެމްބަސީން ވަނީ އެދިފައެވެ.

އެމްބަސީން ނެރުނު ބަޔާނުގައި ވަނީ މުޒާހަރާތައް ހިނގާ ސަރަހައްދުތަކަށް ގޮސް ނޫޅުމަށް އިލްތިމާސްކޮށްފައެވެ. އަދި ބޭރަށް ނިކުންނަން ޖެހިއްޖެ ހާލަތެއްގައި އެންމެ ފަހުގެ މައުލޫމާތުތައް ހޯދުމަށްވެސް ވަނީ އެދިފައެވެ. 

އީރާނުގައި ހިނގަމުންދާ މުޒާހަރާތައް އިތުރުވެ، މަރުވާ މީހުންގެ އަދަދު އިތުރުވަމުން ދިއުމާ ގުޅިގެން މިހާރުވެސް ގިނަ ޤައުމުތަކަކުން ވަނީ އީރާނުގައި ތިބި އެޤައުމުތަކުގެ ރައްޔިތުން އައުމަށް އިލްތިމާސްކޮށްފައެވެ. ތެހެރާންގެ ހިނގާދާ ހަމަނުޖެހުންތައް ދުވަހެއް ދުވަހަކަށް އިތުރުވަމުންދާއިރު، އީރާނާ އެމެރިކާ އާ ދެމެދު ހަނގުރާމައެއް ފެށުމުގެ ބިރުވެސް ވަނީ ބޮޑުވެފައެވެ.