ފަލަސްތީނުގެ ވެސްޓްބޭންކްގެ ޔަހޫދީން އާބާދުކުރާ ހިސާބުތަކުގައި ހުރިހާ ހަމަނުޖެހުމެއް ހިންގަނީ ހައްދުފަހަނައެޅި ޔަހޫދީންކަމަށް އިސްރާއީލްގެ އަސްކަރިއްޔާއިން ނެރުނު ރިޕޯޓެއްގައި ބުނެފިއެވެ.

ފަލަސްތީނުގެ އެންމެ މުއްސަނދި ބިންތައް ފޭރިގަނެ، އިސްރާއީލުން ވަނީ އެ ބިންތަކުގައި ޔަހޫދީން އާބާދުކުރުމުގެ ވަރަށްބޮޑު މަޝްރޫޢުއެއް ފަށާފައެވެ. މީގެ ތެރެއިން ވެސްޓްބޭންކްގެ ބައެއް ސަރަހައްދުތަކުގައި އިސްރާއީލުން ޔަހޫދީން ވަޒަންވެރިކުރުވައި، މިދިޔަ އަހަރު ބޮޑެތި ހަމަނުޖެހުންތަކެއްވެސް ވަނީ ހިނގާފައެވެ. މި ހަމަނުޖެހުންތައް ފެށިގެން ގޮސްފައިވަނީ އޮލިވް ދަނޑުތަކަށް ޔަހޫދީގެ ހައްދުފަހަނަ އެޅި ޒުވާނުންތަކެއް ހަމަލާދޭންފެށި ހިސާބުންނެވެ.

އިސްރާއީލްގެ ޑިފެންސް ފޯސްއިން ނެރެފައިވާ މިދިޔަ އަހަރުގެ އަހަރީ ރިޕޯޓުގައި ބުނެފައިވަނީ، ވެސްޓްބޭންކުގެ ވަޒަންވެރިކުރުވި ޔަހޫދީންގެ ސަބަބުން އެ ސަރަހައްދުތަކުގައި ހަމަނުޖެހުންތައް ހިނގާދިޔަ މިންވަރު 50 އިންސައްތައަށް އިތުރުވެފައިވާކަމަށެވެ. މިކަމުގެ ސަބަބެއްކަމަށް ރިޕޯޓްގައި ބުނެފައިވަނީ ހައްދުފަހައެޅި 300 ވަރަކަށް ޔަހޫދީންގެ ވާހަކައެވެ. އިސްރާއީލްގެ މި ރިޕޯޓްގައި ވަނީ ހައްދުފަހަނައެޅި ޔަހޫދީންގެ ސަބަބުން އިސްރާއީލް ސިފައިންނަށްވެސް އެކި ކަހަލަ ގޮންޖެހުންތައް ކުރިމަތިވާކަން ފާހަގަކޮށްފައެވެ.

އިސްރާއީލް ސިފައިން ފާހަގަކުރާ ހައްދުފަހަނައެޅި ޔަހޫދީންނަކީ ފަލަސްތީނު މީހުންގެ ދަނޑުތަކުގައި ހުޅުޖެހުންފަދަ އަމަލުތައް ހިންގާ ވަރަށް އަނިޔާވެރިބައެކެވެ. އެމީހުންގެ އުނދަގޫ އެންމެބޮޑަށް ޖެހެނީ އޮލިވް މޫސުން އައިސް ފަލަސްތީނުގެ ދަނޑުތަކުގައި ހުންނަ އޮލިވް ގަސްތަކުގައި އޮލިވްތައްއަޅާފައި އޮންނަދުވަސްވަރެވެ. 

ފަލަސްތީނު މީހެއްގެ އޮލިވް ގަސްތައް ހުންނަ ބިމެއްގައި ހުޅުޖަހާފައި.. ފޮޓޯ: އޭއެފްޕީ

ފަލަސްތީނުގެ އޮލިވް ދަނޑުތަކަކީ އެމީހުންގެ ދިރިއުޅުމުގެ އެންމެ މުހިންމު އެއް ބައެވެ. ފަލަސްތީނު ރައްތިތުންގެ ތެރެއިން 80،000 އާއި 100،000 މީހުންނަކީ އޮލިވްދަނޑުތަކުން ލިބޭ ނަފާއިން ދިރިއުޅުން ކުރިއަށްގެންދާ މީހުންނެވެ. މި މަސައްކަތް ކުރާ މީހުންގެ 15 އިންސައްތަ އަކީ އަންހެނުންނެވެ. ކޮންމެ އަހަރެއްގެވެސް އޮކްޓޯބަރު އަދި ނޮވެމްބަރަކީ އޮލިވްގެ ވިޔަފާރި އެންމެ ރަނގަޅު ދުވަސްވަރެވެ. ރިޕޯޓްތައް ބުނާގޮތުގައި 2018 ވަނަ އަހަރާ ހަމަޔަށް އާއިރު، އޮލިވް ވިޔަފާރިން ފަލަސްތީނަށް އަހަރެއްގެ މައްޗަށް ޖުމްލަ 191 މިލިއަން ޑޮލަރުގެ އާމްދަނީއެއް ލިބެއެވެ. މި ސަބަބަށްޓަކައި އިސްރާއީލްގެ ހައްދުފަހަނައެޅި ޔަހޫދީންގެ ގްރޫއްޕުތަކުން ވަނީ އޮލިވްދަނޑުތައް ހުންނަ ސަރަހައްދުތަކުން ފަލަސްތީނު ރައްޔިތުން ބޭލުމަށް ހަރަކާތްތަކެއްވެސް ފަށާފައެވެ.

އިސްރާއީލްގެ ހައްދު ފަހަނައެޅި ޒުވާނުންގެ ބަޔަކު މިދިޔަ އަހަރުގެ އޮލިވް މޫސުމްގައި ފަލަސްތީނު ރައްޔިތުންގެ ގިނަ އަދަދެއްގެ އޮލިވްދަނޑުތަކުގައި ހުޅުޖެހިއިރު، ދަނޑަށް އަންނަ ފަލަސްތީނުގެ އުމުރުން ދުވަސްވީ އަންހެނުންނަށް ހަމަލާދިނުމުގެ ހާދިސާތައް ވަރަށްގިނައިން ހިނގާފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.