އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން، ދުނިޔޭގެ ސިއްޙަތު ޖަމްޢިއްޔާ (ޑަބްލިޔު.އެޗް.އޯ) އިން އެމެރިކާ ވަކިވުމުގެ ހުރިހާ މަރުޙަލާއެއް ފުރިހަމަކޮށްފައިވާ ކަމަށް އެމެރިކާގެ ޑިޕާޓްމަންޓް އޮފް ހެލްތު އެންޑް ހިއުމަން ސާވިސަސް (އެޗް.އެޗް.އެސް) އިން އިޢުލާންކޮށްފިއެވެ.
ބުރާސްފަތި ދުވަހު އެޗް.އެޗް.އެސް އިން ހާމަކުރި ގޮތުގައި، ޑަބްލިޔު.އެޗް.އޯ އަށް އެމެރިކާ ސަރުކާރުން ދެމުންދިޔަ ހުރިހާ ފައިސާއެއްގެ އެހީ މިހާރު ވަނީ ހުއްޓާލާފައެވެ. އަދި އެ ޖަމްޢިއްޔާގައި މަސައްކަތްކުރާ އެމެރިކާގެ މުވައްޒަފުންނާއި ކޮންޓްރެކްޓަރުން އަނބުރާ ގެނެސް، ޖަމްޢިއްޔާގެ އެކި ކޮމިޓީތަކާއި ފަންނީ މަސައްކަތްތަކުގައި ބައިވެރިވުން ވެސް ވަނީ ނިމުމަކަށް ގެނެސްފައެވެ.
ރައީސް ޓްރަމްޕްގެ ފުރަތަމަ ދައުރުގައި ވެސް ޑަބްލިޔު.އެޗް.އޯ އިން ވަކިވާން މަސައްކަތް ކުރިއިރު، ދެވަނަ ދައުރުގެ ފުރަތަމަ ދުވަހު ވަނީ އެކްޒެކެޓިވް އޯޑަރެއް މެދުވެރިކޮށް އެކަން ރަސްމީކޮށްފައެވެ. ޤާނޫނު ބުނާގޮތުން ޖަމްޢިއްޔާއިން ވަކިވުމުގެ އެއް އަހަރު ކުރިން ނޯޓިސް ދޭންޖެހޭއިރު، ދައްކަންޖެހޭ ހުރިހާ ފައިސާއެއް ވެސް ދައްކަންޖެހެއެވެ. އެމެރިކާއިން އެ ޖަމްޢިއްޔާއަށް ގާތްގަނޑަކަށް 260 މިލިއަން ޑޮލަރު ދައްކަން އޮތް ނަމަވެސް، އެ ފައިސާ ދައްކާފާނެ ކަމަކަށް މާހިރުން ލަފައެއް ނުކުރެއެވެ.
ސަރުކާރުގެ އިސް އޮފިޝަލަކު ބުނި ގޮތުގައި، މިއީ "ވީ ވަޢުދެއް ފުއްދުން" ކަމަށާއި، ޑަބްލިޔު.އެޗް.އޯ އިން އަމަލުކޮށްފައިވަނީ އެމެރިކާގެ މަސްލަހަތާ ދެކޮޅަށް ކަމަށެވެ. ޚާއްޞަކޮށް ކޮވިޑް-19 ގެ ބަލިމަޑުކަމުގައި ޑަބްލިޔު.އެޗް.އޯ އިން ފެއިލްވެފައިވާ ކަމަށާއި، ޗައިނާގެ ދިފާޢުގައި މަސައްކަތްކޮށް، ބަލި ފެތުރޭކަން ދުނިޔެއަށް އެންގުމުގައި ލަސްތަކެއް ކުރިމަތިކުރުވި ކަމަށް އެމެރިކާ އިން ތުހުމަތު ކުރެއެވެ.
މި ނިންމުމާއެކު، އެމެރިކާގެ ސިއްޙީ ސިޔާސަތުތައް ބޭރުގެ "ޒިންމާދާރުކަން ކުޑަ" ބިއުރޯކްރެޓުންގެ ބާރުގެ ދަށުގައި ދެން ނޯންނާނެ ކަމަށް އެޗް.އެޗް.އެސް އިން ބުނެފައިވެއެވެ. ނަމަވެސް، ދުނިޔޭގެ ސިއްޙީ ދާއިރާގައި އެމެރިކާ އަދިވެސް އިސް ދައުރެއް އަދާކުރާނެ ކަމަށާއި، ވަކިވަކި ޤައުމުތަކާއި ޖަމްޢިއްޔާތަކާ ގުޅިގެން ބަލިތައް ކޮންޓްރޯލް ކުރުމުގެ މަސައްކަތް ސީ.ޑީ.ސީ މެދުވެރިކޮށް ކުރިއަށް ގެންދާނެ ކަމަށް ސަރުކާރުން ބުނެއެވެ.
ބައެއް މާހިރުން އިންޒާރު ދޭ ގޮތުގައި، ޑަބްލިޔު.އެޗް.އޯ ފަދަ މަރުކަޒީ ނިޒާމެއް ނެތި ވަކިވަކި ޤައުމުތަކާއެކު މަސައްކަތް ކުރުމަކީ ދުނިޔޭގެ ސިއްޙީ ރައްކާތެރިކަމަށް އޮތް ގޮންޖެހުމެކެވެ. އެމެރިކާއަކީ މީގެ ކުރިން އެ ޖަމްޢިއްޔާއަށް އެންމެ ބޮޑު މާލީ އެހީތެރިކަމެއް ފޯރުކޮށްދެމުންދިޔަ ޤައުމެވެ.
Advertisement
This content is created and paid for by advertisers and does not involve Voice Journalists
