އެމެރިކާއަށް އެރި ފިނި މޫސުމުގެ ތޫފާނެއްގައި އެތައް ހާސް ފްލައިޓެއް ކެންސަލްވެ، ބޮޑު ސަރަހައްދެއްގެ ކަރަންޓު ކެނޑިއްޖެއެވެ. 

"ވިންޓަރ ސްޓޯމް ފަރން" ގެ ނަމުން ނަންދެވިފައިވާ މި ތުފާނަކީ މި މޫސުމުގައި ކުރިމަތިވި އެންމެ ނުރައްކާތެރި އެއް ތޫފާނެވެ. މި ތޫފާން އެމެރިކާގެ ދެކުނު ސަރަޙައްދުތަކުން ފެށިގެން އިރުއުތުރުގެ ސްޓޭޓްތަކާ ހަމައަށްވެސް ދަތުރުފަތުރަށާއި ކަރަންޓުގެ ޚިދުމަތަށް ބޮޑެތި ބުރޫތަކެއް ކުރިމަތިކުރުވާފައިވެއެވެ. 

އެންމެ ފަހުގެ ނޫސް ރިޕޯޓުތަކުން ދައްކާގޮތުން، މުޅި އެމެރިކާގައި މިހާތަނަށް 14,000 އަށްވުރެ ގިނަ ފްލައިޓް ވަނީ ކެންސަލްކޮށްފައެވެ. މީގެ ތެރޭގައި ޑަލަސް-ފޯޓް ވޯތު، އެޓްލާންޓާ، ބޮސްޓަން އަދި ނިއު ޔޯކް ފަދަ މައިގަނޑު އެއަރޕޯޓްތައް ހިމެނެއެވެ. އަދި ބޯކޮށް ސްނޯ ފޭބުމާއި، ގަނޑުފެނުގެ ވާރޭ ވެހުމުގެ ސަބަބުން އެތައް ހާސް ފްލައިޓެއް ލަސްވެ، އެއަރލައިންތަކުން ދަނީ ދަތުރުތައް ރޭވުމުގައި ބޮޑެތި ދަތިތަކަކާ ކުރިމަތިލަމުންނެވެ.

މި ތޫފާނުގެ ސަބަބުން ކަރަންޓު ފޯރުކޮށްދޭ ނިޒާމަށް ބޮޑެތި ގެއްލުންތަކެއް ލިބި، ޓެކްސަސް އަދި ލޫއިޒިއާނާ ހިމެނޭހެން 130,000 އަށްވުރެ ގިނަ ގޭބިސީން ވަނީ ކަރަންޓުގެ ޚިދުމަތް މެދުކެނޑިފައެވެ. ކަރަންޓު ނަރުތަކާއި ގަސްގަހުގައި ގަނޑުފެން ހިފުމުގެ ސަބަބުން، ޚިދުމަތް އަލުން އިއާދަކުރުމަށް މަސައްކަތްކުރާ ފަރާތްތަކަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. 

މި ޙާލަތާ ގުޅިގެން 16 ސްޓޭޓެއްގައާއި ވޮޝިންގޓަން ޑީ.ސީ. ގައި ވަނީ ކުއްލި ނުރައްކަލުގެ ޙާލަތު އިޢުލާނުކޮށްފައެވެ. އަދި ގެއްލުން ލިބުނު ސަރަޙައްދުތަކަށް އެހީތެރިކަން ފޯރުކޮށްދިނުމަށް ފެޑަރަލް އިމަޖެންސީ މެނޭޖްމަންޓް އޭޖެންސީ އިން މިހާރު ދަނީ މަސައްކަތް ކުރަމުންނެވެ.

އެގައުމުގެ ނޭޝަނަލް ވެދަރ ސަރވިސްއިން ވަނީ ކުރިއަށް އޮތް ހަފުތާގައިވެސް ބޯކޮށް ސްނޯ ފޭބުމާއި ފިނިމިން އިންތިހާއަށް ދަށްވާނެ ކަމަށް ލަފާކޮށް، އާންމުންނަށް ސަމާލުވުމަށް އިންޒާރު ނެރެފައެވެ. އަދި ކޮންމެހެން ކުރަންޖެހޭ ދަތުރެއް ފިޔަވައި އެހެން ދަތުރުތައް ނުކުރުމަށާއި، ކަރަންޓު ކެނޑިދާނެ ކަމަށް ބަލައި ކާބޯތަކެއްޗާއި ޒަރޫރީ ސާމާނު އެއްކުރުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ. މީގެ އިތުރުން، އެގައުމުގެ ބައެއް ހައިވޭތައް ބަންދުކޮށް، އާންމު ދަތުރުފަތުރުގެ ޚިދުމަތްތައް މެދުކަނޑާލާފައިވާއިރު، މަގުމަތީގެ ޙާލަތު ވަނީ ނުރައްކާތެރި ދަރަޖައަކަށް ގޮސްފައެވެ.

މޫސުމާ ބެހޭ މާހިރުން އިންޒާރު ދޭ ގޮތުގައި، އޮހާޔޯ ވެލީ، މިޑް-އެޓްލާންޓިކް އަދި އިރުއުތުރުގެ ސަރަޙައްދުތަކުގައި މި ތޫފާނުގެ ބާރު އިތުރަށް ގަދަވެ، ފިނިހޫނުމިން އިތުރަށް ދަށްވުން އެކަށީގެންވެއެވެ.

.