ދިރާސީ އައު އަހަރުގެ ކިޔެވުން މާދަމާ ފެށުމަށް ތައްޔާރުވަމުންދާއިރު، ހިޔާ ސަހަރުގައި ދިރިއުޅެމުންދާ ގިނަ އަދަދެއްގެ ކުދިން މާދަމާ ކިޔަވަންދާނެ ސްކޫލަކީ ރަތް ޓަވަރުތައް ކައިރީ ބިނާކުރި ޝަހީދު އަލީ ސްކޫލެވެ.

ޝަހީދު އަލީ ސްކޫލް މާދަމާ ހުޅުވުމަށް ތައްޔާރުވަމުންދާއިރު، އެ ސްކޫލަށް ނަން ދީފައިވަނީ އަލި ރަސްގެފާނަށް ނިސްބަތްކޮށެވެ. އެޑިއުކޭޝަން މިނިސްޓްރީން ބުނެފައިވަނީ އެ ސްކޫލަށް ޝަހީދު އަލި ރަސްގެފާނުގެ ނަމުން ނަންދިނުމަށް ނިންމީ، އެ މަނިކުފާނުގެ ޒިކުރާ އާކޮށް ކުދިންގެ ހިތުގައި ރަސްގެފާނުގެ އަގުވަޒަން ކުރުމުގެ ނިޔަތުގައިކަމަށެވެ. 

ޝަހީދު އަލީ ސްކޫލް ހުޅުވުމުގެ އެންމެ ފަހުގެ ތައްޔާރީތައް ވަުން އަންނައިރު ސްކޫލްގެ މައިގަނޑު ހުރިހާ މަސައްކަތްތަކެއްހެން މިހާރުވަނީ ނިމިފައެވެ. ޝަހީދު އަލީ ސްކޫލް ފަރުމާކުރުމުގައި ކުލަތައް ކަނޑައަޅާފައިވަނީ އެ ސްކޫލް ނިސްބަތްވާ އަލި ރަސްގެފާނާ ގުޅުވައިގެންނެވެ. މަޝްހޫރު އަލި ރަސްގެފާނަކީ ދިވެހި ތާރީހުން ފެންނަ ގޮތުގައި އެންމެ ހިތްވަރުގަދަ އަދި އެންމެ ޤައުމީވަންތަ ރަސްގެފާނެވެ. އެ ރަސްގެފާނަކީ ވަރަށް ޖެހިލުންކުޑަ ޝަހްސިއްޔަތެކެވެ. އަލިރަސްގެފާނު ޝަހީދުވެ ވަޑައިގަތީ ޕޯޗްގީޒުންނާ ހަނގުރާމަ ކުރައްވަނިކޮށެވެ. އެއީ މީލާދީ ސަނަތުންނަމަ 1558 ވަނަ އަހަރުގެ މެއި މަހުގެ 19 ވަނަ ދުވަހެވެ.

އެންމެ ގާތުން އެ ފެންނަނީ ހިޔާ ޝަހަރުގައި ހުންނަ ޝަހީދު އަލީ ސްކޫލް... ފޮޓޯ: ވޮއިސް

ދިވެހިންގެ ހިތްތަކުގައި އަލިރަސްގެފާނަށް ދެވިފައިވާ ޤަދަރު ނިކަން ބޮޑެވެ. މިކަން މާލޭގައި ފެންނަން ހުރި އެ ރަސްގެފާނަށް ނިސްބަތްވާ ބިނާތަކަށް ބަލާލުމުން ވަރަށް ރަނގަޅަށް އެނގިގެންދެއެވެ. އަލި ރަސްގެފާނުގެ ހަނދާނީ ބިނާއެއް ހުންނައިރު، އެ ރަސްގެފާނުގެ ނަންފުޅު ރަމްޒުކޮށްދޭ މިސްކިތެއްވެސް ވަނީ ބިނާކޮށްފައެވެ. އަލި ރަސްގެފާނުގެ ހަނދާނުގައި އެންމެފަހުން ބިނާކުރެވިގެން މިދިޔައީ ކުދިންނަށް ތައުލީމްދޭ ބޮޑު މަދަރުސާއެކެވެ.

މި މަދަރުސާއަށް ޝަހީދު ޢަލީ ނަމުން ނަންދީފައިވާއިރު އެންމެ ފާހަގަކުރެވިފައިވަނީ މަދަރުސާގެ ލޯގޯއެވެ. ޝަހީދު ޢަލީ ސްކޫލް ލޯގޯ ފަރުމާކޮށްފައިވަނީ އަރަބިވަންތަ ނިކަން ރީތި ތާނަ ފޮންޓަކުންނެވެ. ލޯގޯއިން ފެންނަނީ ޝަހީދު ޢަލީ ދިވެހިން ލިޔެފަ އޮންނައިރު، އެ ދެ ނަން ފެށޭ ތާނައިގެ "ޝ" އަދި "ޢ" އަކުރެވެ.

ޝަހީދު އަލީ ސްކޫލްގެ ލޯގޯ... ފޮޓޯ: ވޮއިސް

ޝަހީދު އަލީ ސްކޫލް ބިނާކުރުމުގެ މަސައްކަތް ފަށާފައިވަނީ 2023 ވަނަ އަހަރުގެ ޑިސެމްބަރުމަހުގެ 23 ވަނަ ދުވަހުއެވެ. މި މަދަރުސާ އިމާރާތްކުރުމުގެ މަސައްކަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. ޝަހީދު އަލީ ސްކޫލް އިމާރާތް ކުރުމުގެ މަސައްކަތް ފެށިތާ ބަރާބަރު ދެ އަހަރު ވީއިރު އެ ސްކޫލުގެ މަސައްކަތް ނިމި ކިޔަވައިދޭން ފެށުމަށް ތައްޔާރުވެފައިވާއިރު، މި ސްކޫލަކީ 1،500 ކުދިންގެ ޖާގައިގެ ސްކޫލެކެވެ. ނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް އެޑިއުކެޝަނުން ވަނީ ބުނެފައެވެ.

މި ސްކޫލް ބިމާކޮށްފައިވަނީ ދަރިވަރުންނާއި ޓީޗަރުންނަށް ބޭނުންވާނެ ގިނަ ވަސީލަތްތަކާ އެކުގައެވެ. އެގޮތުން މި ސްކޫލްގައި  އޭސީކޮށްފައިވާ 54 ކްލާސްރޫމާއި، މަލްޓިޕާޕަސް ހޯލެއްގެ އިތުރުން ޓާފްދަނޑެއް ހިމެނެއެވެ. މި ސްކޫލް ބިނާޮށްފައިވަނީ ޒަމާނީ ވަސީލަތްތައް ހިމަނައިގެންނެވެ. ދިރާސީ އައު އަހަރުގެ ކިޔެވުން މާދަމާ ފެށިގެންދާއިރު، ޝަހީދު އަލީ ސްކޫލަށް ފުރަތަމަ ފަހަރަށް މާދަމާ ހެދުނު ދަރިވަރުން ގޮސް ދިރާސީ އައު އަހަރުގެ ކިޔެވުން ފަށާނެއެވެ.