ފަތިސްނަމާދުން ދަރިވަރުން ދުވަސް ފެށުމަށާއި އެކަން މައިންބަފައިން ކަށަވަރުކޮށް، ދަރިވަރުން އެގޮތަށް ބައްޓަންކޮށްދެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެދިވަަޑައިގެންފިއެވެ.

ދިރާސީ އައު އަހަރު މިއަދު ފެށިފައިވާއިރު، ހުޅުމާލޭގައި މި އަހަރު އަލަށް ހުޅުވާ، ޝަހީދު ޢަލީ ސުކޫލްގައި ހުޅުވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން ދިވެހިންނަކީ މުސްލިމުން ކަމުގައިވާއިރު ދިވެހިން ވާންޖެހޭނީ އެކަން ހަނދާންކޮށް ދީނުގައި އަންގަވާފައިވާ ގޮތަށް ކަންކަން ތަރުތީބު ކުރާ ބަޔަކަށް ކަމަށެވެ. އެގޮތުން ފަރުޟު ފަސް ނަމާދު އޭގެ ވަގުތުގައި އަދާކުރުމަށް އެމަނިކުފާނު ވަނީ އިލްތިމާސްކުރައްވާފައެވެ. 

ޝަހީދު ޢަލީ ސުކޫލްގައި ހުޅުވުމުގެ ގޮތުން ބޭއްވި ރަސްމިއްޔާތުގައި ރައީސް މުޢިއްޒު ވާހަކަދައްކަވަނީ: ފޮޓޯ/ ރައީސް އޮފީސް

ރައީސް އިތުރަށް ވިދާޅުވީ، އިސްލާމްދީނުގައި ކަންކަން ބަޔާން ކޮށްފައި އޮންނަނީ ވަރަށް މާތް މަޤުސަދެއްގައި ކަމަށެވެ. އެކަންކަމަކީ ފޮތެއްގައި ލިޔެވި، ޢަމަލީ ގޮތުން އަހަރެމެންގެ ޙަޔާތުން ކޮންމެ ދުވަހަކުވެސް ފެންނަންޖެހޭ ކަމެއް ކަމަށް އެމަނިކުފާނު ވިދާޅުވިއެވެ. 

އެގޮތުން ސުކޫލްތަކުގައި ނަމާދު ކުރުމަށް ޚާއްސަ ތަންތަން ހުންނަކަން ފާހަގަކުރައްވައި ރައީސް ވަނީ ނަމާދަށް ފަރުވާތެރިވުމަށް ދަރިވަރުންނަށް ތަކުރާރުކޮށް ނަޞޭޙަތްތެރިވެވަޑައިގެންފައެވެ. 

މީގެ އިތުރުން، ދަރިވަރުންނަކީ މައިންބަފައިންނަށް ކިޔަމަންތެރި ޓީޗަރުން ބުނާ ބަސް އަހާ ބަޔަކަަށް ވުމަށް އިލްތިމާސްކުރައްވާފައެވެ.

”އޭރުން އަޅުގަނޑުމެންގެ ތުއްތު ކުދިންގެ މުސްތަގުބަލަށް އެ އެޅިގެންދަނީ ގުޑުވާ ނުލެވޭ ވަރުގެ ވަރުގަދަ ބިންގަލެއް“ ރައީސް ވިދާޅުވިއެވެ. 

.