ކުރިއަށް އޮތް ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންތިޒާމުކުރާ "ރޯދަ ބާޒާރު" މާދަމާ ހުޅުމާލޭގައި ފެށުމަށް ނިންމައިފިއެވެ.

އެޗްޑީސީން ބުނެފައިވަނީ، މި ބާޒާރަކީ އެ ކޯޕަރޭޝަނާއި ހައިރައިސް ގުޅިގެން ކުރިއަށްގެންދާ ހަރަކާތެއް ކަމަށެވެ. މި ބާޒާރު ކުރިއަށްދާނީ މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް ހުޅުމާލޭ ސެންޓްރަލް ޕާކުގައެވެ.

ބާޒާރު ހުޅުވިފައި ހުންނާނީ ކޮންމެ ދުވަހެއްގެ ހަވީރު 04:00 އިން 06:00 އަށް އަދި ރޭގަނޑު 08:00 އިން 11:30 އަށެވެ.

މި ފަހަރުގެ ރޯދަ ބާޒާރުގައި ޖުމްލަ 50 ސްޓޯލް ބެހެއްޓުމަށް ވަނީ ހަމަޖެހިފައެވެ. މި ސްޓޯލްތަކުން ރަމަޟާން މަހަށް ބޭނުންވާ ގިނަ ބާވަތްތަކެއް ލިބެން ހުންނާނެއެވެ. އޭގެ ތެރޭގައި ކައްކާ ތެއްޔާއި ބަދިގޭގައި ހިފާ ގެންގުޅޭ ސާމާނު، ގޭތެރެ ޒީނަތްތެރިކުރާ ތަކެތި، އަންނައުނު، ހާޑްވެއާ ސާމާނު އަދި އެކި ބާވަތްތަކުގެ ކާބޯތަކެތި ހިމެނެއެވެ.

އެޗްޑީސީން ހާމަކުރި ގޮތުގައި މި ބާޒާރު ބޭއްވުމުގެ މައިގަނޑު މަގުސަދަކީ، ރަމަޟާން މަހަށް ތައްޔާރުވުމަށް ގޭތެރެއަށް ބޭނުންވާ ތަކެތި އާންމު ރައްޔިތުންނަށް އެއްތަނަކުން ފަސޭހަކަމާއެކު، އަދި ހެޔޮ އަގުގައި ލިބޭނެ އިންތިޒާމު ހަމަޖައްސައިދިނުމެވެ.

އެޗްޑީސީން އިތުރަށް ބުނީ، އެ ކޯޕަރޭޝަނުގެ އަބަދުވެސް އަމާޒަކީ ހުޅުމާލެއަކީ ހުރިހާ ހިދުމަތްތަކެއް ފަސޭހަކަމާއެކު ލިބެން ހުންނަ، ރައްޔިތުންނަށް ދިރިއުޅެން ހިތްފަސޭހަ މާހައުލަކަށް ހެދުން ކަމަށެވެ.