ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން 2026 ވަނަ އަހަރުގެ ފެބްރުވަރީ މަހު ފެށުމަށް ހަމަޖެހިފައިވާ ކޯސްތަކުގެ ތެރެއިން ޖާގަ ހުރި ކޯސްތަކަށް ފޯމު ހުށަހެޅުމުގެ މުއްދަތު އިތުރުކޮށްފި އެވެ.
އެމްއެންޔޫއިން ބުނި ގޮތުގައި، ޖާގަ ހުރި ކޯސްތަކަށް އެދި ފޯމު ހުށަހެޅުމުގެ ފުރުޞަތު މިހާރު ވަނީ 11 ފެބްރުވަރީ 2026 ވާ ބުދަ ދުވަހުގެ މެންދުރުފަހު 14:00 އާ ހަމައަށް އިތުރުކޮށްފައެވެ.
މި ފުރުޞަތުގެ ދަށުން ޖާގަ ހުރި ކޯސްތަކުގެ ލިސްޓު މިއަދު ޔުނިވަރސިޓީގެ ވެބްސައިޓް (https://mnu.edu.mv/registration/) ގައި ޝާއިޢުކުރާނެ ކަމަށް އެ ޔުނިވަރސިޓީން މަޢުލޫމާތުދެއެވެ. އަދި މި ލިސްޓަށް ބަދަލު އަންނަ މިންވަރަކުން ވެބްސައިޓްގައިވާ މަޢުލޫމާތުތައް އަދާހަމަ ކުރެވެމުންދާނެއެވެ.
މި ކޯސްތަކަށް އެޕްލިކޭޝަން ފޯމު ބަލައިގަތުމަށް ފެށުމަށް ހަމަޖެހިފައިވަނީ މިއަދު މެންދުރު 12:00 އިން ފެށިގެންނެވެ. ކޯސްތަކަށް ކުރިމަތިލާ ފަރާތްތަކުން ފޯމު ހުށަހަޅަންވާނީ ޔުނިވަރސިޓީގެ އޮންލައިން ޕޯޓަލް (portal.mnu.edu.mv) މެދުވެރިކޮށެވެ.
ކޯސްތަކަށް ޖާގަ ދިނުމަށް ހަމަޖެހިފައިވާ އުސޫލާއި، ކޯސްތަކުގެ ޝަރުތުތަކާ ގުޅޭ ތަފްޞީލް ޔުނިވަރސިޓީގެ ވެބްސައިޓްގައިވާ ޚާއްޞަ ލިންކެއް (https://mnu.edu.mv/application-announcements-2026-term-1) މެދުވެރިކޮށް ބައްލަވާލެއްވޭނެއެވެ.
މިކަމާ ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެމްއެންޔޫގެ ކޯސްތަކާބެހޭ ވެބްސައިޓް (https://courses.mnu.edu.mv/) ބައްލަވާލެއްވުމަށް ނުވަތަ [email protected] އަށް އީމެއިލް ކުރެއްވުމަށް އެ ޔުނިވަރސިޓީން އެދެއެވެ. މީގެ އިތުރުން ޔުނިވަރސިޓީގެ ހޮޓްލައިން ނަންބަރު 1445 އަށް ގުޅައިގެންވެސް މަޢުލޫމާތު ސާފުކުރެވޭނެއެވެ.
Advertisement
This content is created and paid for by advertisers and does not involve Voice Journalists
