ވިޔަފާރިކުރާ ފަރާތްތަކުގެ މެދުގައި މި ސަރަހައްދުގައި ބާއްވާ އެންމެބޮޑު ފެއާކަމަށްވާ ޝާރުޖާ އޮންޓަޕްރިނިއަރޝިޕް ފެސްޓިވަލުގައި ރާއްޖެއިން ބައިވެރިވެއްޖެއެވެ.

ޔޫއޭއީގައި މިއަދުން ފެށިގެން މާދަމާގެ ނިޔަލަށް ކުރިއަށްދާ މި ފެސްޓިވަލުގައި ދިވެހިރާއްޖެ ތަމްސީލްކުރާ ވަފުދުގައި އިސްކޮށް ޙަރަކާތްތެރިވަނީ ބިޒްނަސް ސެންޓަރ ކޯޕަރޭޝަން (ބީސީސީ) އިންނެވެ.

މި ފެސްޓވަލްގައި ރާއްޖޭގެ ޓެކްނޮލޮޖީ ދާއިރާގައި ފާހަގަކޮށްލެވޭ ތިން ވިޔަފާރިއެއް ބައިވެރިވެއެވެ. އޭގެ ތެރޭގައި ޕައި ނެޓްވޯކްސް، ޖަވާބު އަދި މަޝްހޫރު އީޒެޕް ފާހަގަކޮށްލެވެއެވެ. ބީސީސީން ބުނީ މި ފެސްޓިވަލްގައި ބައިވެރިވުމުގެ މައިގަނޑު މަގްސަދަކީ ދިވެހި އީޖާދީ މަސައްކަތްތައް ސަރަހައްދީ ފެންވަރުގައި ދައްކާލުމާއި، އިސްތިރާތީޖީ ގުޅުންތައް ގާއިމުކުރުން ކަމަށެވެ.

ފެސްޓިވަލްގައި ބައިވެރވި ރާއްޖޭގެ ޓީމް.. ފޮޓޯ: ބީސީސީ

މީގެ އިތުރުން، ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ބައިނަލްއަގުވާމީ މާކެޓްތަކުން ފުރުސަތު ހޯދައިދިނުމަކީވެސް މި ދަތުރުގެ މުހިންމު ބޭނުން ކަމަށާއި، މި ފެސްޓިވަލްގެ ތެރެއިން ކުރިއަށްދާ އެގްޒިބިޝަންތަކާއި ނެޓްވޯކިންގް ސެޝަންތަކުގެ އެހީގައި، ޓެކްނޮލޮޖީގެ ދާއިރާއިން އެއްބާރުލުން ދިނުމާއި އިންވެސްޓްމަންޓްތައް ހޯދުމުގެ ފުރުސަތުތައް ދިވެހި ވިޔަފާރިތަކަށް ފަހިވެގެންދާނޭ ކަމަށެވެ.

މި ފެސްޓިވަލަކީ މެދުއިރުމައްޗާއި އެ ސަރަހައްދުގެ ގައުމުތަކުގެ ސްޓާޓްއަޕްތަކާއި، އީޖާދީ މަސައްކަތްތަކާއި، އަދި އެކި ގައުމުތަކުގެ މެދުގައި ގުޅުން ބަދަހިކުރުމަށް ބާއްވާ އެންމެ ފާހަގަކޮށްލެވޭ އެއް ހަރަކާތެވެ. މި ހަރަކާތުގައި އިންވެސްޓަރުންނާއި، ސިޔާސަތު އެކުލަވާލާ ފަރާތްތަކުގެ އިތުރުން ވިޔަފާރީގެ ދާއިރާ ކުރިއަރުވާ ފަރާތްތަކުން ބައިވެރިވެއެވެ.

ބީސީސީން މި ފެސްޓިވަލްގައި ބައިވެރިވެފައިވަނީ ދިވެހި ވިޔަފާރިތައް ކުރިއެރުވުމަށާއި، ޕްރައިވެޓް ސެކްޓަރުގެ ވާދަވެރިކަން އިތުރުކުރުމަށް އެ ކޯޕަރޭޝަނުން ކުރަމުންދާ މަސައްކަތުގެ ދަށުން ކަމަށާއި، މިކަމުގެ ސަބަބުން ދިވެހި ވިޔަފާރިތައް ބައިނަލްއަގުވާމީ އީޖާދީ ވިއުގަތަކާ ގުޅުވައިދިނުމަށް ބޮޑު އެހީއަކަށް ވެގެންދާނޭކަމަށް ކުންފުނިން ވަނީ ބުނެފައެވެ.