މިދިޔަ ހުކުރުދުވަހު އިރުއޮއްސުނުފަހުން ހިޔާ 5 ވަނަ ޓަވަރުގައި ހިނގާދިޔަ އަލިފާނުގެ ހާދިސާގައި ގިނަ އަދަދެއްގެ އޭސީ އައުޓްޑޯ ޔުނިޓްތައް ބޭނުންނުކުރެވޭވަރަށް ހަލާކުވެއްޖެއެވެ.

ހިޔާ ޓަވަރުގައި އަލިފާނުގެ މި ހާދިސާ ހިނގާފައިވަނީ، އެދުވަހުގެ 18:30 ހާއިރު އޭސީ އައުޓްޑޯ ޔުނިޓްތައް ބަހައްޓާފައި ހުންނަ ވައިގޮޅިތެރޭގައެވެ. އަލިފާނުގެ ހާދިސާއަށްފަހު ޖެހިގެން އައި ދުވަހު އެޗްޑީސީއާ ފުލުހުންގެ އިތުރުން ކަމާބެހޭ ފަރާތްތަކުން ވަނީ އަލިފާން ހިފި ވައިގޮޅި ސަރަހައްދު ސާފްކުރަން ފަށާފައެވެ. 

އަލިފާނުގެ ހާދިސާގައި އެންމެބޮޑަށް ގެއްލުން ލިބިފައިވަނީ އެޕާޓްމަންޓްތަކުގެ އޭސީ އައުޓްޑޯ ޔުނިޓްތަކަށެވެ. އެޗްޑީސީން ވަނީ ހަލާކުވި އޭސީ ޔުނިޓްތައް ޓަވަރުން ބޭރަށް ނެރެފައެވެ. ވޮއިސް އިން ބެލިބެލުމުން އެނގުނު ގޮތުގައި އޭސީ އައުޓްޑޯ ޔުނިޓްތަކުގެ ތެރެއިން 56 ޔުނިޓެއް ވަނީ ބޭނުން ނުކުރެވޭވަރަށް ހަލާކުވެފައެވެ. 

ހަލާކުވި ބައެއް އޭސީ އައުޓްޑޯ ޔުނިޓްތައް... ފޮޓޯ: ވޮއިސް

ހިޔާގައި ހިނގި އަލިފާނުގެ ހާދިސާއާ ގުޅިގެން ޓަވަަރު ފަހަކުން 18 އެޕާޓްމަންޓެއްގައި ދިރިއުޅެމުންއައި 85 ފަރާތަކަށް ވަގުތީ ބޯހިޔާވަހިކަން ވަނީ ފޯރުކޮށްދީފައެވެ. 

 ޓަވަރު 5 ގައި އަލިފާނުގެ ހާދިސާ ހިނގާފައިވަނީ، ވައިގޮޅީގެ ތެރޭގައި ހަރުލާފައިހުރި ކުނިތަކެއްގައި ރޯވެގެންނެވެ. މި ހާދިސާ ހިނގަން ދިމާވި ސަބަބު އަދި މިހާތަނަށް ހޯދިފައެއް ނުވެއެވެ.