މިނިމުނު ޖަނަވަރީމަހު ރާއްޖެއަށް ރެކޯޑު އަދަދަކަށް ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކައިފިއެވެ. 

މި ތަފާސްހިިސާބުތަކުގައި ވާގޮތުން، މިދިޔަ މަހު ރާއްޖެއަށް ވަނީ 224,788 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ ޖަނަވަރީމަހު ރާއްޖެއަށް އައިސްފައިވާ 214,863 ފަތުރުވެރިންނާއި އަޅާބަލާއިރު %4.6 ގެ ކުރިއެރުމެކެވެ. 

މިއާއިއެކު މިދިޔަ މަހަކީ، އެއް މަސްތެރޭ ރާއްޖެއަށް އެންމެ ގިނަ ފަތުރުވެރިން އައި މަހުގެ ރިކޯޑު ހޯދި މަހެވެ. މީގެ ކުރިން އެންމެ ގިނައިން ފަތުރުވެރިން އައިކަމަށް ރިކޯޑު ކުރެވުނީ މިދިޔަ އަހަރުގެ ޑިސެންބަރު މަހުއެވެ. އެމަހު ރާއްޖެއަށް އައިސްފައިވަނީ 224،455 ފަތުރުވެރިންނެވެ.

ޖަނަވަރީ މަހުގެ ތެރޭގައި އެއްދުވަހެއްގެތެރޭގައި އެންމެ ގިނައިން ފަތުރުވެރިން ޒިޔާރަތްކޮށްފައިވަނީ، މަހުގެ 11 ވަނަ ދުވަހުއެވެ. އެ ދުވަހު 9،596 ފަތުރުވެރިން ވަނީ ޒިޔާރަތްކޮށްފައެވެ.

މިނިސްޓްރީގެ ތަފާސްހިސާބުތަކުން ދައްކާގޮތުގައި ރާއްޖެއަށް މިހާރު އެވްރެޖްކޮށް ކޮންމެ ދުވަހަކު 7,251 ފަތުރުވެރިން ޒިޔާރަތްކުރެއެވެ. އަދި ނިމިދިޔަ އަހަރު ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ޗައިނާއިން ކަމުގައިވީ ނަމަވެސް، މިއަހަރުގެ މިހާތަނަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ.  އެގޮތުން، ރަޝިއާއިން 29,370 ފަތުރުވެރިން ޒިޔާރަަތްކޮށްފައިވެއެވެ. އެއާ ޖެހިގެން، އިޓަލީވިލާތުން ޒިޔާރަތްކޮށްފައިވަނީ 23,171 ފަތުރުވެރިންނެވެ. ޗައިނާއިން ޒިޔާރަތްކޮށްފައިވަނީ 22,676 ފަތުރުވެރިންނެވެ. 

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީވެލާނާ އިންޓަރނޭޝަނަލް އެއާޕޯޓުންނެވެ. އެއާ ޖެހިގެން، މާފަރު އިންޓަރނޭޝަނަލް އެއާޕޯޓު އަދި ގަން އިންޓަރނޭޝަނަލް އެއާޕޯޓުންނެވެ. އެގޮތުން އަހަރުގެ މިހާތަނަށް ވެލާނާ އިންޓަރނޭޝަނަލް އެއާޕޯޓުން ރާއްޖެއަށް ވަނީ 221,994 ފަތުރުވެރިން އެތެރެވެފައިވެއެވެ. އަދި މާފަރު އެއާޕޯޓުން 786 ފަތުރުވެރިން ވަނީ ރާއްޖެ އައިސްފައެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށޤ ދަނީ ބޮޑެތި ކުރިއެރުންތަކެއް ލިބެމުންނެވެ. އެގޮތުން މިދިޔަ އަހަރުވެސް ވަނީ 2 މިލިއަނަށް ވުރެ ގިނަ ފަތުރުވެރިންނާއިއެކު، އަހަރެއްގެ ތެރޭގައި އެންމެ ގިނަ ފަތުރުވެރިން ޒިޔާރަތްކުރި އަހަރަށްވެފައެވެ.