ދައުލަތުގެ ބެލުމުގެ ދަށުގައި ތިބޭ ކުދިން އަނބުރާ މުޖުތަމަޢަށް ނެރުމަށް ކުރަމުންދާ މަސައްކަތުގެ ދަށުން، ނިމިދިޔަ ޑިސެންބަރު މަހު 4 ކުއްޖަކު އަނބުރާ އެކުދިންގެ ޢާއިލާތަކާ ހަވާލުކޮށް، 3 ކުއްޖަކު ފޯސްޓާ ޢާއިލާތަކާ ހަވާލުކޮށްފިއެވެ. 

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އާންމުކޮށްފައިވާ 2025 ވަނަ އަހަރުގެ ޑިސެންބަރު މަހުގެ ތަފާސްހިސާބުތަކަށް ބަލާއިރު، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން 31 ޑިސެންބަރުގެ ނިޔަލަށް ދައުލަތުގެ ބެލުމުގެ ދަށުގައި ޖުމްލަ 122 ކުދިން އެބަތިއްބެވެ. މީގެ ތެރޭގައި ހިމެނެނީ 84 ފިރިހެން ކުދިންނާއި 68 އަންހެން ކުދިންނެވެ.

އަދި ދައުލަތުގެ ބެލުމުގެ ދަށުގައިވާ 4 ކުއްޖަކު ޢާއިލާތަކާއި ރީއިންޓެގްރޭޓް ކުރެވި، 3 ކުއްޖަކު ފޯސްޓަރ ޢާއިލާތަކާއި ހަވާލުކުރެވިފައިވެއެވެ.

ވުޒާރާގެ ތަފާސްހިސާބުތައް ދައްކާގޮތުން ޑިސެންބަރު މަހު އެކަނިވެސް އެކި ކަންކަމާ ގުޅޭގޮތުން ޖުމްލަ 2,633 ކޯލު ހެލްޕްލައިންތަކަށް ވަނީ ލިބިފައެވެ.

އެގޮތުން ޗައިލް ހެލްޕްލައިން (1412) އަށް ޖުމްލަ 2,260 ކޯލު ލިބުނެވެ. މީގެ ތެރޭގައި ކުޑަކުދިން ގުޅި 115 ކޯލާއި، ބޮޑެތި މީހުން ގުޅި 1,834 ކޯލު ހިމެނެއެވެ. އަދި ކާކުކަން ނޭނގޭ ގޮތަށް 311 ފަރާތަކުން ގުޅާފައިވެއެވެ.

ސޯޝަލް ސަރވިސް ހެލްޕްލައިން (1421) ނަންބަރަށް ޖުމްލަ 373 ކޯލު ލިބިފައިވެއެވެ.

އިޖުތިމާޢީ ދުޅަހެޔޮކަން ކަށަވަރުކުރުމަށް ވުޒާރާއިން ކުރަމުންދާ މަސައްކަތުގެ ތެރެއިން، ފާއިތުވި މަހު 107 ފަރާތަކަށް ކައުންސިލިން ސެޝަންތައް ފޯރުކޮށްދީފައިވެއެވެ. މީގެ އިތުރުން 10 ފަރާތަކަށް ޓްރޭނިންގ ސެޝަން، 10 ފަރާތަކަށް ޕޭރެންޓިންގ ސެޝަން އަދި 10 ފަރާތަކަށް ސައިކޯސޯޝަލް ސަޕޯޓް ވަނީ ދީފައެވެ. އަދި އަތޮޅުތެރޭގައި ހިނގި 2 މައްސަލައަކަށް ވުޒާރާއިން ވަނީ އެޓެންޑުވެފައެވެ.

އިޖުތިމާޢީ އެހީތެރިކަން ބޭނުންވެގެން ޑިސެންބަރު މަހު 3 މައްސަލައެއް ރިޕޯޓުކޮށްފައިވެއެވެ. އޭގެ ތެރޭގައި ހިމެނެނީ ބޯހިޔާވަހިކަން ފޯރުކޮށްދިނުމުގެ ކުޅަދާނަކަން ނެތުމުގެ 1 މައްސަލައާއި، ފައިދާހުރި ކާނާ ފޯރުކޮށްދިނުމުގެ ދަތިކަން ހުރި 2 މައްސަލައެކެވެ. މި ހުރިހާ މައްސަލައަކީވެސް އަންހެނުންނާ ގުޅުންހުރި މައްސަލަތައް ކަމަށް އެ ވުޒާރާއިން މަޢުލޫމާތު ދެއެވެ.